Read La Bible en Malgache 2Tantara 18 Bible Online

2Tantara 18 - La Bible en Malgache bible

2Tantara 18

¹Nanana harena sy voninahitra be i Josafata; ary ny zanany lahy dia nampanambadiny ny zanakavavin’i Ahaba.

²Koa nony ela dia nidina nankany amin’i Ahaba tany Samaria izy. Namono ondry aman’osy sy omby betsaka ho azy sy ho an’ny olona nanaraka azy i Ahaba dia nitaona azy hiakatra ho any Ramota-Gileada.

³Ary hoy i Ahaba, mpanjakan’ny Israely, tamin’i Josafata, mpanjakan’ny Joda: Mba hiaraka amiko ho any Ramota-Gileada va ianao? Dia hoy izy taminy: Eny, fa tahaka ny tenanao ihany aho ka ny oloko dia olonao; koa hiaraka aminao ho any an-tafika izahay.

⁴Hoy anefa i Josafata tamin’ny mpanjakan’ny Israely: Miangavy anao aho, anontanio aloha ny tenin’NY TOMPO.

⁵Ary ny mpanjakan’ny Israely dia nanangona ny mpaminany efajato lahy ka niteny taminy hoe: Handeha hanafika an’i Ramota-Gileada va isika, sa hijanona ihany aho? Dia hoy ireo: Mandehana fa hatolotr’Andriamanitra eo an-tananao izy, ry mpanjaka.

⁶Ary hoy kosa anefa i Josafata: Moa tsy misy mpaminanin’NY TOMPO koa va eto mba hanontaniantsika?

⁷Dia hoy ny mpanjakan’ny Israely tamin’i Josafata: Mbola misy lehilahy iray ihany ahazoantsika manontany amin’NY TOMPO, saingy halako izy, satria tsy mbola naminany soa ho ahy, fa loza ihany mandrakariva; I Mikaia, zanak’i Jimla, no anarany. Dia hoy i Josafata: Aza manao izany, ry mpanjaka.

⁸Ary niantso tandapa iray ny mpanjakan’ny Israely ka niteny taminy hoe: Antsoy haingana i Mikaia, zanak’i Jimla.

⁹Ary ny mpanjakan’ny Israely sy i Josafata, mpanjakan’ny Joda, dia samy nipetraka teo amin’ny sezafiandrianany avy teo amin’ny famoloana eo anoloan’ny vavahadin’i Samaria sady samy efa niakanjo ny fanamiany avy; ary ny mpaminany rehetra dia naminany teo anatrehany.

¹⁰Ary i Zedekia, zanak’i Kenana, dia nanao tandroka vy ka niteny hoe: Izao no lazain’NY TOMPO: Ireto no hanotoanao ny Arameana mandra-paharingany.

¹¹Ary ny mpaminany rehetra koa dia naminany hoe: Mandehana ho any Ramota-Gileada dia hambinina ianao; fa hatolotry NY TOMPO eo an-tananao izy, ry mpanjaka.

¹²Ary ilay iraka izay nandeha naka an’i Mikaia dia niteny taminy hoe: Indro, iray teny avokoa izao ny mpaminany ka samy milaza soa ho an’ny mpanjaka; koa miangavy anao aho, aoka re ny teninao mba ho tahaka ny an’ny iray amin’ireo ka mba mitenena soa koa.

¹³Dia hoy i Mikaia: Raha velona koa NY TOMPO dia izay lazain’Andriamanitro ihany no hambarako.

¹⁴Dia nankany amin’ny mpanjaka izy. Ary hoy ny mpanjaka taminy: Ry Mikaia, handeha hanafika an’i Ramota-Gileada va isika, sa hijanona ihany aho? Ary hoy izy: Mandehana, dia hambinina ianareo, fa hatolotra eo an-tanànareo izy.

¹⁵Hoy koa ny mpanjaka taminy: Impiry no hampianianako anao mba tsy hilaza na inona na inona amiko amin’ny anaran’NY TOMPO afa-tsy izay marina ihany?

¹⁶Dia hoy i Mikaia: Hitako fa indreny, ny Israely rehetra niely teny an-tendrombohitra toy ny ondry tsy misy mpiandry, ary hoy NY TOMPO: Tsy manan-tompo ireto ka aoka izy samy hody soa amantsara any an-tranony avy.

¹⁷Dia hoy ny mpanjakan’ny Israely tamin’i Josafata: Tsy efa voalazako taminao va fa tsy mba mety maminany soa ho ahy izy fa loza ihany?

¹⁸Ary hoy i Mikaia: Henoy ary ny tenin’NY TOMPO: Nahita NY TOMPO nipetraka teo amin’ny sezafiandrianany aho, ary ny tafiky ny lanitra manontolo dia nijoro teo amin’ny ankavanany sy teo amin’ny ankaviany.

¹⁹Ary hoy NY TOMPO: Iza no hamitaka an’i Ahaba, mpanjakan’ny Israely, handeha ho any Ramota-Gileada ka ho lavo any? Ary ny iray dia niteny toy izao ary ny iray hafa kosa dia niteny toy izao.

²⁰Dia nandroso ny fanahy iray ka nitsangana teo anatrehan’NY TOMPO sady niteny hoe: Izaho no hamitaka azy. Ary hoy NY TOMPO taminy: Amin’inona anefa?

²¹Dia hoy izy: Handeha aho ka ho tonga fanahy mandainga ao am-bavan’ny mpaminaniny rehetra. Dia hoy indray NY TOMPO: Ho voafitakao izy ka hahomby ianao; mandehana ka ataovy araka izany.

²²Koa indro, ankehitriny NY TOMPO efa nanisy fanahy mandainga ao am-bavan’ireto mpaminaninao ireto ary Izy no efa nilaza ny loza hanjo anao.

²³Fa nanatona i Zedekia, zanak’i Kenana, dia namely ny takolak’i Mikaia sady niteny hoe: Taiza no lalana nialan’ny Fanahin’NY TOMPO tamiko mba hiteny aminao?

²⁴Dia hoy i Mikaia: Indro, ho hitanao izany amin’ny andro hitetezanao efitrano mba hierenao.

²⁵Dia hoy ny mpanjakan’ny Israely: Sambory i Mikaia ka ento miverina ho any amin’i Amona, mpifehy ny tanàna, sy ho any amin’i Joasy, zanaky ny mpanjaka

²⁶ary lazao hoe: Izao no lazain’ny mpanjaka: Ataovy ao an-tranomaizina Ilehio ka fahano mofom-pijaliana sy ranom-pijaliana izy mandra-piveriko soa amantsara.

²⁷Fa hoy i Mikaia: Raha toa ka ho tafaverina soa amantsara ianao dia tsy nampitenenin’NY TOMPO aho. Ary hoy koa izy: Samia mihaino izany ianareo, ry firenena rehetra.

²⁸Dia niakatra nankany Ramota-Gileada ny mpanjakan’ny Israely sy i Josafata, mpanjakan’ny Joda.

²⁹Ary hoy ny mpanjakan’ny Israely tamin’i Josafata: Mody hanao olon-kafa aho ka hitsarapaka any anatin’ny ady, fa ianao kosa dia manaova ny fanamianao ihany. Dia nody olon-kafa ny mpanjakan’ny Israely ka nitsarapaka tany anatin’ny ady.

³⁰Fa ny mpanjakan’i Arama dia efa nandidy ireo lehiben’ny kalesy fitondrany miady hoe: Aza miady na amin’ny kely na amin’ny lehibe, afa-tsy amin’ny mpanjakan’ny Israely ihany.

³¹Nony nahita an’i Josafata ireo lehiben’ny kalesy fitondra miady dia hoy izy: Iny mihitsy no mpanjakan’ny Israely. Dia nohodidininy izy mba hasiany, kanjo niantsoantso i Josafata ary namonjy azy NY TOMPO; eny, Andriamanitra nampiala ireo teo aminy.

³²Rehefa hitan’ireo lehiben’ny kalesy fitondra miady fa tsy izy no mpanjakan’ny Israely dia niverina niala taminy ireo.

³³Ary nisy lehilahy iray nandefa anjoanjo zana-tsipìka ka nahavoa ny mpanjakan’ny Israely teo amin’ny fitohizan’ny fiarovan-tratrany; ary hoy izy tamin’ny lehiben’ny kalesiny: Ahodino ny kalesy fitondra miady ka ento miala eto amin’ny mpiady aho fa voa.

³⁴Nihamafy ny ady tamin’izany andro izany; ary notohanana ny mpanjaka mba hijoro teo amin’ny kalesiny nanatrika ny Arameana mandra-paharivan’ny andro ny mpanjakan’ny Israely; nefa nony efa hilentika ny masoandro dia maty izy.