Read La Bible en Malgache 2Tantara 19 Bible Online

2Tantara 19 - La Bible en Malgache bible

2Tantara 19

¹Niverina soa amantsara ho any an-tranony tany Jerosalema i Josafata, mpanjakan’ny Joda.

²Niainga hitsena azy i Jeho, zanak’i Hanany mpahita ka niteny tamin’i Josafata mpanjaka hoe: Moa ny ratsy fanahy va no tokony hampiana, ary izay mankahala NY TOMPO va no tokony ho tianao? Koa izany no mahatezitra NY TOMPO aminao.

³Nefa mba misy fahatsaram-panahy hita ihany aminao, fa noravanao tsy ho eo amin’ny tany ny tsangankazon-tsampy ho an’ny Aseraha*, sady nampiomana ny fonao hitady an’Andriamanitra ianao.

⁴Nitoetra tany Jerosalema i Josafata; ary nandeha nitety ny olona indray izy hatrany Bery-Sheba ka hatrany amin’ny tany be havoana any Efraima ka nampiverina ny olona ho amin’NY TOMPO, Andriamanitry ny razany.

⁵Ary nanendry mpitsara tamin’ny tany izy, dia tamin’ny isan-tanàna mimanda manerana ny tanin’ny Joda,

⁶ka niteny tamin’izy ireo hoe: Tandremo izay hataonareo; fa tsy ho an’olona no hitsaranareo fa ho an’NY TOMPO, sady momba anareo ao amin’ny fitsarana Izy.

⁷Koa aoka ho ao aminareo ny tahotra NY TOMPO; tandremo ka ataovy izany, fa tsy mba misy heloka amin’NY TOMPO Andriamanitsika, na fizahan-tavan’olona, na fandraisana kolikoly.

⁸Tany Jerosalema koa no nanendren’i Josafata ny sasany tamin’ny levita* sy ny mpisorona ary ny lohan’ny fianakaviana tamin’ny Israely ho amin’ny fitsaran’NY TOMPO sy ny adin’olona, fa efa tafaverina tany Jerosalema izy tamin’izay,

⁹dia nandidy azy ireo izy hoe: Izao no hataonareo amin’ny fahatahorana NY TOMPO sy amin’ny fahamarinana ary amin’ny fo mahitsy:

¹⁰Na inona na inona ady avy amin’ny rahalahinareo izay monina amin’ny tanànany, na ny amin’ny mahafaty aina, na ny amin’ny hevitry ny lalàna sy ny didy ary ny fitsipika samihafa, dia anaro izy mba tsy ho meloka amin’NY TOMPO, fandrao iharan’ny fahatezerana ianareo sy ny rahalahinareo; izany no ataovy dia tsy ho meloka ianareo.

¹¹Ary indro, i Amaria mpisoronabe no ho lehibenareo amin’ny raharahan’NY TOMPO rehetra; i Zebadia, zanak’Ismaela, mpifehy ny taranak’i Joda, kosa no ho lehibenareo amin’ny raharahan’ny mpanjaka rehetra; ary ho mpifehy hanampy anareo ny levita. Mahereza ka mahefà, ary NY TOMPO anie homba izay manao ny tsara.