Read La Bible en Malgache 2Tantara 20 Bible Online

2Tantara 20 - La Bible en Malgache bible

2Tantara 20

¹Nony afaka izany dia avy hiady amin’i Josafata ny taranak’i Moaba sy ny taranak’i Amona mbamin’ny Meonita.

²Ary nisy tonga ka nanambara tamin’i Josafata hoe: Indreo, misy olona betsaka avy any andafin’ny ranomasina, dia avy any Arama, ho avy hiady aminao; indreo, ao Hazezona-Tamara, na Eny-Gedỳ izy.

³Dia natahotra i Josafata ka nanatrika tsara hitady NY TOMPO sady niantso andro fifadian-kanina ho an’ny tanin’ny Joda rehetra.

⁴Dia niangona hangataka famonjena amin’NY TOMPO ny Joda; eny, ny avy tamin’ny tanànan’i Joda rehetra no tonga hitady NY TOMPO.

⁵Ary nijoro teo amin’ny fiangonan’i Joda sy i Jerosalema, tao amin’ny tranon’NY TOMPO, teo anoloan’ny kianja vaovao, i Josafata

⁶ka niteny hoe: RY TOMPO, Andriamanitry ny razanay ô, tsy Ianao va no Andriamanitra any an-danitra? Eny, Ianao no manapaka amin’ny fanjakan’ny Jentilisa* rehetra, ary eo an-tananao ny hery sy ny fahefana ka tsy misy mahasakana Anao.

⁷Ry Andriamanitray ô, tsy Ianao va no nandroaka ny mponina tamin’ity tany ity hiala teo anoloan’ny Israely olonao ka nanome azy mandrakizay ho an’ny taranak’i Abrahama sakaizanao?

⁸Ary nonina teto izy ka nanao fitoerana masina ho an’ny anaranao teto sady nilaza hoe:

⁹Raha manjo anay ny loza, na sabatra, na famaliana, na areti-mandringana, na mosary, ary hitsangana manatrika ity trano ity sy eto anatrehanao izahay, fa ny anaranao no amin’ity trano ity, koa raha hitaraina aminao amin’ny fahorianay izahay dia hihaino Ianao ka hamonjy.

¹⁰Koa indreo, ny taranak’i Amona sy i Moaba ary ny avy any an-tendrombohitra Seìra, dia ilay tsy navelanao hotafihin’ny Israely, fony izy nivoaka avy tany Ejipta ka nivily fa tsy nandringana azy;

¹¹nefa indreo, mamaly ratsy anay izy ka avy handroaka anay amin’ny lova nomenao anay.

¹²Ry Andriamanitray ô, tsy hitsara azy va Ianao? Fa izahay dia tsy manan-kery hanohitra ireo olona betsaka ireo, izay avy hamely anay, koa tsy hitanay izay hataonay; fa Ianao no andrandrain’ny masonay.

¹³Ny Joda rehetra mbamin’ny vady aman-janany koa dia samy nijoro teo anatrehan’NY TOMPO.

¹⁴Ary i Jahaziela, zanak’i Zakaria, zanak’i Benaia, zanak’i Jeiela, zanak’i Matania, levita* amin’ny taranak’i Asafa, dia voatsindrin’ny Fanahin’NY TOMPO teo anivon’ny fiangonana

¹⁵ka niteny hoe: Mihainoa ianareo, ry Joda rehetra sy ry mponina eto Jerosalema, ary ianao, ry Josafata mpanjaka: Izao no lazain’NY TOMPO aminareo: Aza matahotra na mivadi-po ny amin’ireo olona betsaka ireo, fa tsy anareo ny ady fa an’Andriamanitra.

¹⁶Rahampitso dia midìna hiady aminy ianareo; fa indreo, hiakatra amin’ny fiakarana Ziza izy; ary ianareo dia hahita azy eo amin’ny faran’ny lohasahan-driaka tandrifin’ny tany efitr’i Jeroela.

¹⁷Tsy ianareo anefa no hiady any; mijoroa tsara fa ho hitanareo ny hamonjen’NY TOMPO anareo, ry Joda sy Jerosalema. Aza matahotra na mivadi-po, fa rahampitso dia mivoaha hiady aminy; fa NY TOMPO no momba anareo.

¹⁸Dia niankohoka tamin’ny tany i Josafata; ary ny Joda sy ny mponina rehetra tany Jerosalema koa dia niankohoka teo anatrehan’NY TOMPO ka nivavaka.

¹⁹Dia nitsangana hidera NY TOMPO, Andriamanitry ny Israely, tamin’ny feo mahery indrindra, ny levita, taranaky ny Kehatita sy taranaky ny Koraìta.

²⁰Ary nifoha vao maraina izy ireo dia niainga nankany an-tany efitr’i Tekoa; teo am-piaingàna dia nitsangana i Josafata ka niteny hoe: Mihainoa ahy, ry Joda, sy ianareo, ry mponina eto Jerosalema: Minoa NY TOMPO Andriamanitrareo dia ho tafatoetra ianareo; minoa ny mpaminaniny dia hambinina ianareo.

²¹Rehefa niara-nihevitra tamin’ny olona izy dia nanendry mpihira ho an’NY TOMPO hidera Azy amin’ny fihaingoana masina raha mandeha eo anatrehan’ny olona efa voaomana hiady izy ireo ka izao no holazainy: Miderà NY TOMPO, fa mandrakizay ny famindrampony.

²²Raha vao nanomboka nihoby sy nidera ireo dia nanaovan’NY TOMPO vela-pandrika ny taranak’i Amona sy i Moaba sy ny avy any an-tendrombohitra Seìra izay avy hamely ny Joda ka resy ireo.

²³Dia nitsangana ny taranak’i Amona sy i Moaba ka namely ny avy any an-tendrombohitra Seìra ary namono sy nandringana azy; nony voaringany ny mponina tany Seìra dia nifandringana ihany koa izy samy izy.

²⁴Nony tonga teo amin’ilay fitazanana any an-tany efitra ny Joda dia nijery ireo olona betsaka ireo izy, koa indreo, nisy faty niampatrampatra tamin’ny tany satria tsy nisy afa-nandositra.

²⁵Ary avy hamabo azy i Josafata sy ny vahoakany, dia nahita harena betsaka sy fitafiana ary fanaka sarobidy teo izy ka namabo mihoatra noho izay zakany hoentina; hateloana no nanangonany ny babo fa be dia be tokoa ireny.

²⁶Tamin’ny andro fahefatra dia nivory tao amin’ny lohasaha Beraka izy fa tany no nisaorany NY TOMPO; koa izay no nanaovany izany toerana izany hoe lohasaha Beraka[5] mandraka androany.

²⁷Dia niverina ny lehilahy rehetra amin’ny Joda sy Jerosalema ary nitarika azy tamin’ny fifaliana hankany Jerosalema indray i Josafata, fa NY TOMPO nampifaly azy ny amin’ny fahavalony.

²⁸Niditra tao Jerosalema nitondra valiha sy lokanga ary trompetra izy ka nankao amin’ny tranon’NY TOMPO.

²⁹Dia nahazo ny fanjakana rehetra manodidina ny fahatahorana an’Andriamanitra, nony reny fa NY TOMPO no niady tamin’ny fahavalon’ny Israely.

³⁰Ary nandry fehizay ny fanjakan’i Josafata; fa nomen’Andriamaniny fiadanana tamin’ny manodidina rehetra izy.

³¹Nanjaka tamin’ny Joda i Josafata; dimy amby telopolo taona izy raha nanomboka nanjaka, ary dimy amby roapolo taona no nanjakany tany Jerosalema. Ary ny anaran’ny reniny dia Azoba, zanakavavin’i Sily.

³²Nandeha tamin’ny lalana nalehan’i Asa rainy izy ka tsy niala tamin’izany fa nanao izay mahitsy teo imason’NY TOMPO;

³³kanefa tsy mba noravana ireo toerana fanaovana sorona; fa ny olona dia tsy mbola nampitodika ny fony hitady ny Andriamanitry ny razany.

³⁴Ary ny tantaran’i Josafata sisa, hatramin’ny voalohany ka hatramin’ny farany dia indro, voasoratra ao amin’ny tenin’i Jeho, zanak’i Hanany, izay nakambana ao amin’ny bokin’ny mpanjakan’ny Israely, izany.

³⁵Nefa nony afaka izany dia nikambana tamin’i Ahazia, mpanjakan’ny Israely, izay nanao izay ratsy, i Josafata, mpanjakan’ny Joda;

³⁶ary nikambana taminy hanao sambo hankany Tarsisy izy ka tao Eziona-Gebera no nanaovany azy.

³⁷Ary naminany ny amin’i Josafata i Eliezera, zanak’i Dodavaho, avy any Maresa hoe: Noho ny nikambananao tamin’i Ahazia dia horavan’NY TOMPO ny asanao. Dia nisy fahavakiana ny sambo ka tsy afaka nankany Tarsisy.