Read La Bible en Malgache 2Tantara 21 Bible Online

2Tantara 21 - La Bible en Malgache bible

2Tantara 21

¹Ary nodimandry any amin’ny razany i Josafata ka nalevina tao amin’ny razany tao an-Tanànan’i Davida izy; ary i Jehorama zanany no nanjaka nandimby azy.

²Nanana rahalahy, zanak’i Josafata, koa izy, dia i Azaria, i Jehiela, i Zakaria, i Azaria, i Mikaela ary i Sefatia; ireo rehetra ireo no zanak’i Josafata, mpanjakan’ny Israely.

³Nomen’ny rainy harena betsaka izy ireo, dia volafotsy sy volamena ary zava-tsoa mbamin’ny tanàna mimanda sasany tany Joda; fa ny fanjakana kosa dia nomeny an’i Jehorama, satria izy no lahimatoa.

⁴Nefa raha vao nanjaka tamin’ny fanjakan’ny rainy i Jehorama dia nitombo hery ka namono tamin’ny sabatra ny rahalahiny rehetra mbamin’ny mpanapaka sasany tamin’ny Israely.

⁵Roa amby telopolo taona i Jehorama raha nanomboka nanjaka ary valo taona no nanjakany tany Jerosalema.

⁶Nandeha tamin’ny lalan’ireo mpanjakan’ny Israely izy, dia tahaka ny nataon’ny taranak’i Ahaba, fa zanakavavin’i Ahaba no vadiny; eny, nanao izay ratsy teo imason’NY TOMPO izy.

⁷Nefa NY TOMPO tsy nety nandringana ny taranak’i Davida noho ny fanekena nataony tamin’i Davida sy ny nilazany fa homeny jiro mandrakizay izy mbamin’ny taranany.

⁸Tamin’ny andron’i Jehorama no nikomian’ny Edomita tsy hanoa ny Joda fa nanangana mpanjaka ho azy izy.

⁹Dia niainga i Jehorama sy ireo mpanapaka sy ny kalesy fitondrany miady rehetra; ary nanaovany latsaka alina ny Edomita izay nanodidina azy sy ny komandin’ny kalesy fitondra miady.

¹⁰Nefa ny Edomita dia mbola nikomy ka tsy nanoa ny Joda mandraka androany. Tamin’izany andro izany koa dia nikomy tsy nety nanoa an’i Jehorama i Libna, satria efa nahafoy NY TOMPO, Andriamanitry ny razany, izy.

¹¹Nanao toerana fanaovana sorona teny amin’ny tendrombohitr’i Joda koa i Jehorama sady nampijangajanga ny mponina tany Jerosalema no nitaona ny Joda mangingina hanao izany.

¹²Ary nisy soratra avy tamin’i Elia mpaminany tonga tao aminy nilaza hoe: Izao no lazain’NY TOMPO, Andriamanitr’i Davida rainao: Noho ny tsy nandehananao tamin’ny lalan’i Josafata rainao, na ny lalan’i Asa, mpanjakan’ny Joda,

¹³fa nandeha tamin’ny lalan’ireo mpanjakan’ny Israely kosa ianao ka nampijangajanga ny Joda sy ny mponina any Jerosalema toy ny fijangajangan’ny taranak’i Ahaba, sady novonoinao koa ny rahalahinao nateraky ny rainao, izay tsara noho ianao,

¹⁴dia indro, hasian’NY TOMPO areti-mandringana ny vahoakanao sy ny zanakao ary ireo vadinao mbamin’ny biby fiompinao rehetra;

¹⁵ary ho azon’ny aretina mafy koa ianao, dia aretina amin’ny tsinainao, mandra-pivoakan’ny tsinainao isanandro isanandro noho ny aretina.

¹⁶Ary NY TOMPO nampirisika ny Filistina sy ny Arabo izay ao akaikin’ny Kosita hamely an’i Jehorama.

¹⁷Niakatra tany Joda ireo ka nisesika tao, dia nobaboiny ny fananana rehetra izay an’ny ankohonan’ny mpanjaka mbamin’ny zanany sy ny vadiny koa ka tsy nisy zanany intsony, afa-tsy i Joahaza faralahiny ihany.

¹⁸Nony afaka izany rehetra izany, dia nasian’NY TOMPO aretina tsy azo sitranina tamin’ny tsinainy izy.

¹⁹Afaka elaela, izany hoe roa taona, dia nivoaka tsikelikely ny tsinainy noho ny aretiny; koa maty tamin’ny fangirifiriana mafy izy. Ary ny vahoakany dia tsy mba nandoro zavatra ho fisaonana azy toy ny nataony tamin’ny razany.

²⁰Roa amby telopolo taona izy, raha nanomboka nanjaka, ary valo taona no nanjakany tany Jerosalema; koa tsy nisy nalahelo azy. Ary nalevina tao an-Tanànan’i Davida ihany izy, nefa tsy mba tao amin’ny fasan’ny mpanjaka.