Read La Bible en Malgache 2Tantara 25 Bible Online

2Tantara 25 - La Bible en Malgache bible

2Tantara 25

¹Dimy amby roapolo taona i Amazia raha nanomboka nanjaka ary sivy amby roapolo taona no nanjakany tany Jerosalema. Ary ny anaran’ny reniny dia Joadana, avy any Jerosalema.

²Nanao izay mahitsy teo imason’NY TOMPO izy, nefa tsy dia tamin’ny fony manontolo.

³Nony tafapetraka tsara tamin’ny fanjakany izy dia novonoiny ireo mpanompony izay namono ny mpanjaka rainy.

⁴Nefa ny zanak’ireo namono dia tsy mba novonoiny fa nataony araka izay voasoratra ao amin’ny bokin’ny lalàna, ao amin’ny bokin’i Mosesy, izay nandidian’NY TOMPO hoe: Ny ray dia tsy hovonoina amin’ny ataon’ny zanany, ary ny zanaka dia tsy hovonoina amin’ny ataon’ny rainy, fa samy ho faty amin’ny fahotany avy ny olona.

⁵Dia novorin’i Amazia ny Joda ka nalahany araka ny fianakaviany avy, dia araka ny mpifehy arivo sy ny mpifehy zato avy amin’i Joda sy i Benjamina rehetra: Dia nisainy ny hatramin’ny roapolo taona no ho miakatra ka olona telo hetsy voafantina no hitany, izay azo nalefa hanafika sady nahatan-defona sy ampinga lehibe.

⁶Ary nisy lehilahy mahery iray hetsy tamin’ny Israely nokaramainy talenta* volafotsy zato.

⁷Nefa nisy lehilahin’Andriamanitra tonga tao aminy ka nilaza hoe: Ry mpanjaka, aza avela hanaraka anao ny miaramilan’ny Israely; fa tsy omban’NY TOMPO ny Israely, dia ny taranak’i Efraima rehetra.

⁸Fa mandehana ihany ianao ka miadia ary mahereza amin’ny ady; fa hataon’Andriamanitra lavo eo anoloan’ny fahavalo ianao; fa Andriamanitra no mahay mamonjy sy mampahalavo.

⁹Fa hoy i Amazia tamin’ilay lehilahin’Andriamanitra: Koa hataontsika ahoana ny amin’ny talenta zato nomeko ny miaramilan’ny Israely? Ary hoy ilay lehilahin’Andriamanitra taminy: Mahay manome anao mihoatra lavitra noho izany NY TOMPO.

¹⁰Dia navahan’i Amazia ireo miaramila tonga tao aminy avy tamin’ny Efraima mba hody indray any amin’ny taniny; ary nirehitra mafy ny fahatezeran’ireo tamin’ny Joda, dia lasa nody izy ireo sady tezitra mafy.

¹¹Ary nitombo hery i Amazia, dia nitarika ny vahoakany ka nankany amin’ny Lohasahantsira ary nahafaty iray alina tamin’ny taranak’i Seìra izy.

¹²Nahazo sambo-belona iray alina koa ny taranak’i Joda, dia noentiny teo an-tampon’ny harambato ary navariny teo ka montsamontsana izy rehetra.

¹³Fa ireo miaramila izay nampodìn’i Amazia tsy hiara-manafika aminy dia nihahakahaka teny an-tanànan’i Joda hatrany Samaria ka hatrany Bety-Horona ka nahafaty olona telo arivo tany sady nahazo babo betsaka.

¹⁴Nony niverina avy nanafika ny Edomita i Amazia dia nitondra ny andriamanitry ny taranak’i Seìra ka nanangana azy ho andriamaniny; ary niankohoka teo anatrehany izy sady nandoro ditin-kazo manitra ho azy.

¹⁵Dia nirehitra tamin’i Amazia ny fahatezeran’NY TOMPO ka naniraka mpaminany iray ho any aminy Izy hanontany azy hoe: Nahoana ianao no mitady ny andriamanitry ny Jentilisa*, izay tsy naharo akory ny olony tamin’ny tananao aza?

¹⁶Rehefa niteny taminy izy dia novalìny hoe: Moa voatendrinay ho mpanolotsaina ny mpanjaka va ianao? Aoka itsỳ ange, fandrao asian’ny olona ianao. Dia nitsahatra ilay mpaminany ka niteny hoe: Fantatro fa Andriamanitra mikasa hahafaty anao satria nanao izany ianao ka tsy nihaino ny anatro.

¹⁷Naka hevitra i Amazia, mpanjakan’ny Joda, koa nandefa iraka tany amin’i Joasy, zanak’i Joahaza, zanak’i Jeho, mpanjakan’ny Israely, hilaza hoe: Avia, aoka isika hifanandrina.

¹⁸Fa nandefa iraka tany amin’i Amazia, mpanjakan’ny Joda, i Joasy, mpanjakan’ny Israely, hilaza hoe: Ny tsilo izay tany Libanona dia nandefa iraka tamin’ny hazo sedera izay tany Libanona nilaza hoe: Omeo ny zanako lahy ny zanakao vavy ho vadiny. Nefa dia nisy bibidia tany Libanona nandalo teo ka nanosihosy ny tsilo.

¹⁹Lazainao fa namely an’i Edoma ianao ka nirehareha ny fonao; mitoera ihany ao an-tranonao, fa nahoana no hihantsy ny loza hahalavo ny tenanao mbamin’i Joda koa ianao?

²⁰Tsy nanaiky anefa i Amazia, satria avy tamin’Andriamanitra izany, mba hanolorany azy ho eo an-tanan’ny fahavalony noho ny nitadiavany ny andriamanitry ny Edomita.

²¹Dia niakatra i Joasy, mpanjakan’ny Israely; ary nihaona tao Bety-Semesy izay an’i Joda izy sy i Amazia, mpanjakan’ny Joda.

²²Dia resy teo anoloan’ny Israely ny Joda ka samy nandositra ho any amin’ny tranolainy avy izy ireo.

²³Ary i Amazia, mpanjakan’ny Joda, zanak’i Joasy, zanak’i Joahaza, dia nosamborin’i Joasy, mpanjakan’ny Israely, tany Bety-Semesy ka noentiny nankany Jerosalema; nandravan’i Joasy efajato hakiho* ny mandan’i Jerosalema hatreo amin’ny vavahadin’i Efraima ka hatrany amin’ny vavahady eo an-jorony.

²⁴Ary nalainy avokoa ny volamena sy ny volafotsy rehetra ary ny fanaka rehetra izay hita tao amin’ny tranon’Andriamanitra tao amin’i Obeda-Edoma sy tao amin’ny efitrano fitahirizana ao amin’ny ny tranon’ny mpanjaka mbamin’ny olona natao antoka koa, izay izy vao niverina ho any Samaria.

²⁵Ny andro niainan’i Amazia zanak’i Joasy, mpanjakan’ny Joda, taorianan’ny nahafatesan’i Joasy, zanak’i Joahaza, mpanjakan’ny Israely, dia dimy amby folo taona.

²⁶Ary ny tantaran’i Amazia sisa, hatramin’ny voalohany ka hatramin’ny farany, indro, tsy voasoratra ao amin’ny bokin’ny mpanjakan’ny Joda sy ny Israely va izany?

²⁷Hatramin’ny andro nihemoran’i Amazia tsy nanaraka NY TOMPO dia nikomy taminy ny olona tany Jerosalema ka nandositra nankany Lakisy izy; nefa nandefa iraka hanaraka azy tany ny olona ka namono azy.

²⁸Ary nasampiny tamin’ny soavaly ny fatiny dia naleviny tao amin’ny razany tao an-tanànan’i Joda.