Read La Bible en Malgache 2Tantara 26 Bible Online

2Tantara 26 - La Bible en Malgache bible

2Tantara 26

¹Ary ny vahoakan’ny Joda rehetra dia naka an’i Ozia, izay enina amby folo taona, ka nampanjaka azy handimby an’i Amazia rainy.

²Izy no nanamboatra indray an’i Elota ka nampody azy ho an’ny Joda, rehefa nodimandry any amin’ny razany ny mpanjaka.

³Enina amby folo taona i Ozia raha nanomboka nanjaka, ary roa amby dimampolo taona no nanjakany tany Jerosalema. Ny anaran’ny reniny dia Jekolia, avy any Jerosalema.

⁴Nanao izay mahitsy teo imason’NY TOMPO izy, tahaka izay rehetra nataon’i Amazia rainy.

⁵Nitady an’Andriamanitra izy tamin’ny andron’i Zakaria, izay nahafantatra ny fahatahorana an’Andriamanitra; ary tamin’ny andro nitadiavany NY TOMPO dia nambinin’Andriamanitra izy.

⁶Nandeha niady tamin’ny Filistina izy dia nandrava ny mandan’i Gata sy ny mandan’i Jabne ary ny mandan’i Asdoda ary avy eo dia nanangana tanàna tany Asdoda sy tany amin’ny Filistina.

⁷Ary Andriamanitra nanampy azy tamin’ny namelezany ny Filistina sy ny Arabo izay nonina tao Gora-Baala ary ny Meonita.

⁸Nandoa hetra ho an’i Ozia ny Amonita; dia niely hatrany akaiky an’i Ejipta ny lazany satria tonga mahery indrindra izy.

⁹Nanorina tilikambo tany Jerosalema, teo amin’ny vavahady eo an-jorony sy teo amin’ny vavahady mankao amin’ny lohasaha sy teo an-jorony i Ozia ka nanamafy azy.

¹⁰Nanorina tilikambo tany an-tany efitra koa izy sady nihady lavaka maro ho famorian-drano, fa nanana omby aman’ondry betsaka tany Sefela sy teny an-tanety izy sady nanana mpiasa sy mpamboatra tanim-boaloboka teny an-tendrombohitra ary tany Karmela, fa tia asa tany izy.

¹¹Nanana miaramila maro, izay nanao antokony vonona hanafika i Ozia, dia araka ny isany izay nandaminan’i Jeiela mpitantsoratra sy i Mahaseia mpifehy azy ka nofehezin’i Hanania, iray tamin’ny mpitarika voatendrin’ny mpanjaka.

¹²Eninjato sy roa arivo ny isan’ny lohan’ny fianakaviana rehetra, dia lehilahy mahery avokoa.

¹³Ary ny miaramila fehezin’ireo dia dimanjato sy fito arivo sy telo hetsy, izay nahery niady indrindra, ary nanampy ny mpanjaka niady tamin’ny fahavalony ireo.

¹⁴Ary i Ozia dia nanamboatra ampinga, lefona, fiarovan-doha, akanjo fiarovan-tratra, tsipìka ary vaton’antsamotady ho an’ireo miaramila rehetra ireo.

¹⁵Namorona milina fiadiana lehibe tany Jerosalema koa izy, natao araka ny marika vitan’ny manam-pahaizana manokana izany, ary natao hapetraka eo amin’ny tilikambo sy eo an-tampon’ny manda mba handefasana zana-tsipìka sy vato lehibe. Ary niely lavitra ny lazan’i Ozia; fa nahagaga tokoa ny nanampian’Andriamanitra azy ka tonga mahery izy.

¹⁶Nony nahery anefa izy dia niavonavona ny fony ka nanao izay ratsy izy, ary nivadika tamin’NY TOMPO Andriamaniny ka niditra tao amin’ny tempolin’NY TOMPO handoro ditin-kazo manitra teo amin’ny alitara fandoroana ditin-kazo manitra.

¹⁷Fa niditra nanaraka azy kosa i Azaria mpisorona mbamin’ny valopolo lahy amin’ny mpisoron’NY TOMPO, dia lehilahy samy mahery avokoa.

¹⁸Ary nanohitra an’i Ozia mpanjaka ireo ka niteny taminy hoe: Tsy raharahanao, ry Ozia, ny handoro ditin-kazo manitra ho an’NY TOMPO, fa an’ny mpisorona ihany, dia ny taranak’i Arona, izay nohamasinina handoro ditin-kazo manitra. Mialà amin’ny fitoerana masina fa nanao izay mahadiso ianao; ary tsy ho voninahitra ho anao eo anatrehan’NY TOMPO Andriamanitra izany.

¹⁹Dia nisafoaka i Ozia, ary nisy lovia handoroany ditin-kazo manitra teny an-tanany; koa raha mbola nisafoaka tamin’ny mpisorona izy dia nisy habokana nipoitra tamin’ny handriny teo anatrehan’ny mpisorona tao amin’ny tranon’NY TOMPO, teo anilan’ny alitara fandoroana ditin-kazo manitra.

²⁰Nitodika nijery azy i Azaria mpisoronabe sy ny mpisorona rehetra, koa indro, boka ny handriny; dia noroahiny hiala teo haingana izy; nefa ny tenany koa dia mba niala teo haingana ihany, satria NY TOMPO no namely azy.

²¹Ary i Ozia mpanjaka dia boka mandra-pahafatiny ka nitoetra teo amin’ny trano mitokana, satria tsy nahazo niditra tao amin’ny tranon’NY TOMPO intsony izy. Dia i Jotama zanany no nanapaka ny tao an-dapa sady nitondra ny vahoaka.

²²Ny tantaran’i Ozia sisa, hatramin’ny voalohany ka hatramin’ny farany, dia efa nosoratan’Isaia mpaminany, zanak’i Amoza.

²³Ary nodimandry any amin’ny razany i Ozia, dia nalevina tao amin’ny razany tao amin’ny saha misy ny toeram-pandevenana ny mpanjaka, satria hoy ny olona: Boka izy. Ary i Jotama zanany no nanjaka nandimby azy.