Read La Bible en Malgache 2Tantara 29 Bible Online

2Tantara 29 - La Bible en Malgache bible

2Tantara 29

¹Dimy amby roapolo taona i Hezekia raha nanomboka nanjaka ary sivy amby roapolo taona no nanjakany tany Jerosalema. Ny anaran’ny reniny dia Abia, zanakavavin’i Zakaria.

²Nanao izay mahitsy teo imason’NY TOMPO izy, tahaka izay rehetra nataon’i Davida rainy.

³Tamin’ny volana voalohany tamin’ny taona voalohany nanjakany dia namoha ny varavaran’ny tranon’NY TOMPO izy ka nanamboatra izay simba tao.

⁴Ary nampidiriny tao ny mpisorona sy ny levita* ka nangoniny teo amin’ny kianja malalaka teo atsinanana.

⁵Ary hoy izy taminy: Mihainoa ahy, ianareo levita, koa hamasino ny tenanareo izao, hamasino koa ny tranon’NY TOMPO, Andriamanitry ny razanareo, ary esory amin’ny fitoerana masina ny zava-maloto rehetra.

⁶Fa nikomy sy nanao izay ratsy teo imason’NY TOMPO Andriamanitsika ny razantsika ary nahafoy Azy ka niamboho ny fonenan’NY TOMPO.

⁷Ary narindriny ny varavarana amin’ny lalantsara fidirana, dia novonoiny ny jiro sady tsy nodorany ny ditin-kazo manitra, ary tsy natolony tao amin’ny fitoerana masina ho an’Andriamanitry ny Israely ny fanatitra dorana manontolo.

⁸Dia nihatra tamin’ny Joda sy Jerosalema ny fahatezeran’NY TOMPO, koa izany no nanaovany izao zavatra mampihorohoro sy ho figagana ary ho zavatra mampihivingivina toy izao hitan’ny masonareo izao.

⁹Fa e! Lavon’ny sabatra ny razantsika, ary ny zanakalahintsika sy ny zanakavavintsika ary ny vadintsika dia efa babo noho izany.

¹⁰Koa efa ato am-poko ny hanao fanekena amin’NY TOMPO, Andriamanitry ny Israely, mba hiala amintsika ny fahatezerany mirehitra.

¹¹Ry zanako, aza malaina ianareo; fa ianareo no nofidin’NY TOMPO hijoro eo anatrehany hanompo Azy ka ho mpanao fanompoam-pivavahana sy ho mpandoro ditin-kazo manitra ho Azy.

¹²Dia nitsangana ny levita, dia i Mahata, zanak’i Amasay sy i Joela, zanak’i Azaria avy amin’ny taranaky ny Kehatita; avy amin’ny taranak’i Merary dia i Kisy, zanak’i Abdia, sy i Azaria, zanak’i Jehalalila; avy amin’ny Gersonita dia i Joa, zanak’i Zima sy i Edena, zanak’i Joa;

¹³avy amin’ny taranak’i Elizafana dia i Simry sy i Jeiela; avy amin’ny taranak’i Asafa dia i Zakaria sy i Matania;

¹⁴avy amin’ny taranak’i Hemana dia i Jehiela sy i Simey; avy amin’ny taranak’i Jedotona dia i Semaia sy i Oziela.

¹⁵Ary namory ny rahalahiny izy dia samy nanamasina ny tenany avy ireo ka tonga, araka ny didin’ny mpanjaka, noho ny tenin’NY TOMPO mba hanadio ny tranon’NY TOMPO.

¹⁶Ary niditra tao amin’ny efitra anatiny amin’ny tranon’NY TOMPO ny mpisorona mba hanadio azy, koa navoakany ho eo an-kianjan’ny tranon’NY TOMPO ny zava-maloto rehetra izay hitany tao an-tempolin’NY TOMPO. Nandray ireny kosa ny levita ka navoakany ho any amin’ny lohasahan-driaka Kidrona.

¹⁷Tamin’ny andro voalohany tamin’ny volana voalohany no nanomboka ny fanamasinana izy ary tamin’ny andro fahavalo tamin’io volana io dia niditra teo amin’ny lalantsara an’NY TOMPO izy ireo; dia nanamasina ny tranon’NY TOMPO tamin’ny havaloana izy ireo; ary tamin’ny andro fahenina amby folo tamin’ny volana voalohany no nahavitany azy.

¹⁸Dia niditra tao amin’i Hezekia mpanjaka izy ireo ka niteny hoe: Efa voadionay avokoa ny tranon’NY TOMPO sy ny alitara fandoroana ny fanatitra dorana manontolo mbamin’ny fanaka rehetra momba azy ary ny latabatry ny mofo atao fanatitra mbamin’ny fanaka rehetra momba azy koa.

¹⁹Ary ny fanaka rehetra izay nozimbazimbain’i Ahaza mpanjaka tamin’ny fahotana vitany, fony izy mbola nanjaka, dia efa namboarinay sy nohamasininay, koa indreo, eo anoloan’ny alitaran’NY TOMPO izy.

²⁰Dia nifoha vao maraina i Hezekia mpanjaka ka namory ny mpanapaka ny tanàna ary niakatra ho ao amin’ny tranon’NY TOMPO.

²¹Nitondra vantotra ombilahy fito, ondrilahy fito, zanak’ondry fito ary osilahy fito izy ho fanatitra noho ny ota ho an’ny fanjakana sy ho an’ny fitoerana masina ary ho an’i Joda. Ary ny mpisorona, taranak’i Arona, dia nasainy nanolotra ireo teo ambonin’ny alitaran’NY TOMPO.

²²Dia novonoiny ny vantotra ombilahy, ary noraisin’ny mpisorona ny ra ka nafafiny tamin’ny alitara; novonoiny koa ny ondrilahy dia nafafiny tamin’ny alitara ny rany; novonoiny koa ny zanak’ondry dia nafafiny tamin’ny alitara ny rany.

²³Ary ny osilahy ho fanatitra noho ny ota dia noentiny teo anatrehan’ny mpanjaka sy ny fiangonana ka nametrahany tanana;

²⁴dia novonoin’ny mpisorona ireo ka ny rany dia nataony teo amin’ny alitara araka ny fanao ho fanatitra noho ny ota hanaovana fanavotana ho an’ny Israely; fa ho an’ny Israely rehetra no nasain’ny mpanjaka nanaovana ny fanatitra dorana manontolo sy ny fanatitra noho ny ota.

²⁵Ary ny mpanjaka dia nametraka ny levita* tao amin’ny tranon’NY TOMPO mba hitondra kipantsona sy valiha ary lokanga, araka ny didin’i Davida mpanjaka sy i Gada, mpahitan’ny mpanjaka, sy i Natana mpaminany; fa izany no didin’NY TOMPO nampitondrainy ny mpaminaniny.

²⁶Nitsangana teo ny levita nitondra ny zavamanenon’i Davida, ary teo koa ny mpisorona izay nitondra ny trompetra.

²⁷Ary nasain’i Hezekia natolotra teo ambonin’ny alitara ny fanatitra dorana manontolo; koa raha vao natomboka ny fanolorana ny fanatitra dorana manontolo dia natomboka koa ny fihirana ho an’NY TOMPO sy ny fitsofana ny trompetra niaraka tamin’ny zavamanenon’i Davida, mpanjakan’ny Israely.

²⁸Niankohoka ny fiangonana manontolo, nihira ny mpihira, ary ny mpitsoka trompetra dia nitsoka, mandra-pahavitan’ny fanatitra dorana manontolo.

²⁹Nony efa nitsahatra ny fanolorana izany dia nandohalika sy niankohoka ny mpanjaka mbamin’izay rehetra niaraka taminy.

³⁰Nasain’i Hezekia mpanjaka sy ny mpanapaka hihira sy hidera NY TOMPO tamin’ny teny namboarin’i Davida sy i Asafa mpahita ny levita. Ary nihira fiderana tamin-kafaliana izy, dia niankohoka tamin’ny tany ka nivavaka.

³¹Ary hoy i Hezekia: Efa nanokana ny tenanareo ho an’NY TOMPO ianareo izao, koa manatòna ka mitondrà fanati-pisaorana sy fanatitra hafa koa ho ao amin’ny tranon’NY TOMPO. Dia nitondra fanati-pisaorana sy fanatitra hafa ny fiangonana, ary izay rehetra nazoto dia nitondra fanatitra dorana manontolo.

³²Ny isan’ny fanatitra dorana manontolo izay noentin’ny fiangonana dia omby fitopolo sy ondrilahy zato ary zanak’ondry roanjato; natao fanatitra dorana manontolo ho an’NY TOMPO ireo rehetra ireo.

³³Ary ny zavatra nohamasinina dia omby eninjato sy ondry aman’osy telo arivo.

³⁴Fa vitsy loatra ny mpisorona ka tsy nahendaka ny fanatitra dorana manontolo rehetra, dia nanampy azy ny levita rahalahiny mandra-pahavitan’ny raharaha sy ny nanamasinan’ny mpisorona sasany ny tenany koa; fa ny levita dia nazoto kokoa tamin’ny fanamasinana ny tenany noho ny mpisorona.

³⁵Ary be koa ny fanatitra dorana manontolo sy ny saboran’ny fanati-pihavanana sy ny fanatitra aidina ampiarahina amin’ny fanatitra dorana manontolo. Izany no nanavaozany ny fanompoana tao amin’ny tranon’NY TOMPO.

³⁶Ary faly i Hezekia sy ny vahoaka rehetra noho izay namboarin’Andriamanitra ho an’ny olona, satria tampoka no nanaovana izany raharaha izany.