Read La Bible en Malgache Ezra 9 Bible Online

Ezra 9 - La Bible en Malgache bible

Ezra 9

¹Rehefa vita izany rehetra izany dia nanatona ahy ireo mpanapaka ka niteny hoe: Ny Israely sy ny mpisorona ary ny levita* dia tsy miavaka amin’ny olona tompon-tany fa mbola manao ny fahavetavetan’ny Kananita, ny Hetita, ny Perizita, ny Jebosita, ny Amonita, ny Moabita, ny Ejiptiana ary ny Amorita ihany.

²Satria efa naka vady ho azy sy ho an’ny zanany lahy tamin’ny zanakavavin’ireo izy ka zary miharoharo amin’ny olona tompon-tany ny taranaka masina; eny, ny lehibe sy ny mpanapaka azy no nitari-dalana tamin’izany fahadisoana izany.

³Nony nandre izany zavatra izany aho dia nandriatra ny lambako sy ny akanjoko sady nanongotra ny voloko sy ny volombavako, dia nipetraka tahaka ny torana aho.

⁴Nivory teo amiko izay rehetra nangovitra noho ny tenin’Andriamanitry ny Israely ny amin’ny hadisoan’ny olona izay efa niverina avy tamin’ny fahababoana; ary mbola nipetraka tahaka ilay torana iny ihany aho hatramin’ny fotoanan’ny fanatitra hariva.

⁵Nony tamin’ny fotoanan’ny fanatitra hariva dia nody ny aiko ka nitsangana aho sady nandriatra ny lambako sy ny akanjoko indray, avy eo dia nandohalika nanandratra ny tanako ho amin’NY TOMPO Andriamanitro aho

⁶ka niteny hoe: Andriamanitro ô, menatra sy mangaihay aho raha miandrandra aminao, ry Andriamanitro ô; fa efa nihamaro mihoatra ny lohanay ny helokay ary ny fahotanay dia lehibe manakatra ny lanitra;

⁷fa hatramin’ny andron’ny razanay ka mandraka androany dia lehibe ny helokay; ny helokay no nanolorana anay sy ny mpanjakanay ary ny mpisorona ho eo an-tanan’ny mpanjakan’ny tany hafa, ho fatin-tsabatra sy ho babo ary ho voaroba sy hangaihay tahaka ny amin’izao anio izao.

⁸Koa ankehitriny vao mba niseho vetivety ny fahasoavana avy tamin’NY TOMPO Andriamanitray tamin’ny namelany anay ho nisy sisa niangana tamin’ny nanomezany anay toerana eo amin’ny fitoerany masina, mba hohazavain’Andriamanitray ny masonay ka homena famelombelomana kely amin’ny fahandevozanay izahay.

⁹Fa andevo izahay, nefa tsy nafoin’Andriamanitray, na dia tamin’ny fahandevozanay aza, fa nataony nahazo famindrampo eto imason’ireo mpanjakan’i Persia ihany mba hanomezany anay famelombelomana, hanangananay ny tranon’Andriamanitray sy hanamboaranay ny rava eo ary hanomezany anay manda any Joda sy Jerosalema.

¹⁰Koa ankehitriny, ry Andriamanitray ô, inona no holazainay amin’izany? Fa efa nahafoy ny didinao izahay,

¹¹dia ilay nampilazainao ny mpaminany mpanomponao hoe: Ny tany izay hidiranareo holovana dia tany maloto noho ny fahalotoan’ny tompon-tany sy ny fahavetavetany izay efa nataony manenika azy noho ny fahalotoany;

¹²koa aza manome ny zanakareo vavy ho vadin’ny zanany lahy, na maka ny zanany vavy ho vadin’ny zanakareo lahy; aza mitady izay hiadanany na izay hahasoa azy mandrakizay; izay no hampahery anareo ka hihinanareo ny soa avy amin’ny tany ka hamelanareo izany ho lovan’ny taranakareo mandrakizay.

¹³Na dia efa nanjo anay aza izany rehetra izany noho ny asa ratsinay sy ny fahadisoanay betsaka dia tsy nampijaly anay araka ny helokay Ianao Andriamanitray fa namela anay ho nisy sisa afaka toy izao ihany,

¹⁴fa raha handika ny didinao indray izahay ka hifanambady amin’ireny olom-betaveta ireny, moa tsy ho tezitra aminay mandra-pahalany ritra anay va Ianao ka tsy hisy sisa ho afaka akory?

¹⁵RY TOMPO Andriamanitry ny Israely ô, marina Ianao, matoa izahay no hany sisa niangana tahaka ny amin’izao anio izao. Indreto izahay eto anatrehanao miaraka amin’ny fahadisoanay, kanefa noho izany ihany dia tsy mahajanona eto anatrehanao izahay.