Read La Bible en Malgache Nehemia 10 Bible Online

Nehemia 10 - La Bible en Malgache bible

Nehemia 10

¹Noho ireo rehetra ireo dia manao fanekena mafy izahay ka soratanay izany ary asian’ny mpanapaka anay sy ny levitanay* ary ny mpisoronay tombo-kase eo aminy.

²Ny nanisy tombo-kase dia i Nehemia governora zanak’i Hakalia, i Zedekia,

³i Seraia, i Azaria, i Jeremia,

⁴i Pasora, i Amaria, i Malkia,

⁵i Hatosy, i Sebanaia, i Maloka,

⁶i Harima, i Meremota, i Obadia,

⁷i Daniela, i Ginetona, i Baroka,

⁸i Mesolama, i Abia, i Miamina,

⁹i Mazia, i Bilgay ary i Semaia; samy mpisorona ireo.

¹⁰Ary ny levita dia i Josoa, zanak’i Azania, i Binoy isan’ny zanak’i Henadada ary i Kadmiela,

¹¹ary ny rahalahin’ireo dia i Sebania, i Hodia, i Kelita, i Pelaia, i Hanana,

¹²i Mika, i Rehoba, i Hasabia,

¹³i Zakora, i Serebia, i Sebania,

¹⁴i Hodia, i Bany ary i Benino.

¹⁵Ny loholona kosa dia i Parosy, i Pahata-Moaba, i Elama, i Zato, i Bany,

¹⁶i Bony, i Azgada, i Bebay,

¹⁷i Adonia, i Bigvay, i Adina,

¹⁸i Atera, i Hezekia, i Azora,

¹⁹i Hodia, i Hasoma, i Bezay,

²⁰i Harifa, i Anatota, i Nebay,

²¹i Magpiasy, i Mesolama, i Hezira,

²²i Mesezabela, i Zadoka, i Jadoa,

²³i Pelatia, i Hanana, i Anaia,

²⁴i Hosea, i Hanania, i Hasoba,

²⁵i Halohesy, i Pila, i Sobeka,

²⁶i Rehoma, i Hasabna, i Mahaseia,

²⁷i Ahia, i Hanana, i Anana,

²⁸i Maloka, i Harima ary i Bana.

²⁹Ny olona sisa mbamin’ny mpisorona sy ny levita, ny mpiandry varavarana, ny mpihira, ny Netinima* ary izay rehetra efa niavaka tamin’ny olona teo an-toerana mba hanaraka ny lalànan’Andriamanitra mbamin’ny vadin’ireo sy ny zanany lahy ary ny zanany vavy, izay rehetra afaka mihaino,

³⁰dia samy nikambana tsara tamin’ny olo-manankaja rahalahiny ka niozona sy nianiana hanaraka ny lalànan’Andriamanitra izay nampilazaina an’i Mosesy, mpanompon’Andriamanitra. Nianiana koa izy fa hitandrina sy hankatò ny didy rehetra izay nataon’NY TOMPO Andriamanitsika mbamin’ny fitsipika sy ny lalànany;

³¹tsy hanome ny zanakay vavy ho vadin’ny tompon-tany, na haka ny zanany vavy ho vadin’ny zanakay lahy;

³²tsy hividy zavatra amin’ny andro Sabata*, na amin’izay andro masina hafa, raha misy entana na vary entin’ny tompon-tany hamidy amin’ny andro Sabata, ary tsy hamboly zavatra amin’ny taona fahafito sady hamoy izay trosa rehetra.

³³Ary nanao lalàna ho anay koa izahay handoa ny ampahatelon’ny sekela isan-taona hanaovana ny fanompoana momba ny tranon’Andriamanitsika:

³⁴dia ho amin’ny mofo atao fanatitra mandrakariva avy amin’ny zavamaniry sy ny fanatitra mandrakariva, dorana manontolo, ary ho amin’ny Sabata sy ny voaloham-bolana sy ny fotoam-pivavahana, ary ho amin’ny zava-masina sy ny fanatitra fanadiovana hanaovana fanavotana ho an’ny Israely; eny, hanaovana ny raharaha rehetra momba ny tranon’Andriamanitsika.

³⁵Ary nanao antsapaka izahay ny amin’ny hanateran’ny mpisorona sy ny levita mbamin’ny vahoaka ny kitay hazo, hitondranay azy ho ao amin’ny tranon’Andriamanitsika araka ny fianakavianay avy amin’ny fotoanandro isan-taona, handoroana eo ambonin’ny alitaran’NY TOMPO Andriamanitsika araka izay voasoratra ao amin’ny lalàna,

³⁶ary mba hitondranay ny voaloham-bokatry ny taninay sy ny voaloham-bokatry ny hazo mamoa rehetra ho ao amin’ny tranon’NY TOMPO isan-taona isan-taona;

³⁷ary ny lahimatoanay sy ny voalohan-teraky ny biby fiompinay, araka izay voasoratra ao amin’ny lalàna, ary ny voalohan-teraky ny ombinay sy ny ondry aman’osinay, dia nekenay hoentina ho ao amin’ny tranon’Andriamanitsika, ho an’ny mpisorona izay manao fanompoam-pivavahana ao amin’ny tranon’Andriamanitsika;

³⁸ary mba hitondranay ho an’ny mpisorona koa ny voalohan’ny kobanay voafetafeta sy ny fanomezanay, ny voaloham-bokatry ny hazo rehetra, ny ranom-boaloboka ary ny diloilo ho amin’ny efitrano ao amin’ny tranon’Andriamanitsika, ary ny ampahafolon’ny vokatry ny taninay dia ho an’ny levita; fa ny levita no mpandray ny fahafolonkarena eny an-tanàna rehetra akaikin’ny fambolenay.

³⁹Ary hisy mpisorona iray, taranak’i Arona, hiaraka amin’ny levita, raha mandray ny fahafolonkarena izy; ary ny ampahafolon’ny fahafolonkarena dia hoentin’ny levita miakatra ho ao amin’ny tranon’Andriamanitsika, ho ao amin’ny efitrano ao an-trano fitahirizana.

⁴⁰Fa ho ao amin’ireo efitrano ireo no hitondran’ny Zanak’Israely sy ny levita ny fanomezana, dia vary sy ranom-boaloboka ary diloilo, dia ho ao amin’ilay itoeran’ny fanaky ny fitoerana masina sy ny mpisorona izay manao fanompoam-pivavahana sy ny mpiandry varavarana ary ny mpihira. Tsy hahafoy ny tranon’Andriamanitsika izahay.