Read La Bible en Malgache Nehemia 7 Bible Online

Nehemia 7 - La Bible en Malgache bible

Nehemia 7

¹Nony vita ny manda ka voalatsako ny lelam-bavahady, sady voatendry ny mpiandry varavarana sy ny mpihira ary ny levita*,

²dia notendreko i Hanany rahalahiko sy i Hanania, lehiben’ny tao an-dapa mba hitandrina an’i Jerosalema, fa lehilahy mahatoky izy sady matahotra an’Andriamanitra mihoatra noho ny maro.

³Koa hoy aho tamin’ireo: Aza avela hovohana ny vavahadin’i Jerosalema mandra-pahafanan’ny andro; ary raha mbola mijanona eo ny mpiambina dia aoka harindriny ny varavarana ka hidionareo; ary manendre mpiambina avy amin’izay monina ato Jerosalema ihany samy ho eo amin’ny fiambenany avy, dia samy ho eo amin’ny tandrifin’ny tranony avy.

⁴Malalaka sy lehibe moa ny tanàna, nefa vitsy olona sady tsy mbola vita ny trano.

⁵Dia nomen’Andriamanitro hevitra aho hamory ny olo-manankaja sy ny mpanapaka mbamin’ny vahoaka mba halaina isa araka ny firazanany avy ireo. Ary hitako ny taratasy filazana ny firazanan’izay niakatra voalohany ka izao no hitako voasoratra tao:

⁶Ireto no lehilahy tamin’izany fari-piadidiana izany, izay niakatra avy tamin’ny fahababoana, dia ireo nobaboin’i Nebokadnezara, mpanjakan’i Babilona, nefa niverina tany Jerosalema sy Joda izy, samy ho any an-tanànany avy,

⁷dia ny olona izay niaraka tamin’i Zerobabela, i Josoa, i Nehemia, i Azaria, i Ramia, i Nahamanỳ, i Mordekay, i Bilsana, i Mispereta, i Bigvay, i Nehoma ary i Bana: Ny isan’ny lehilahy tamin’ny Israely dia izao:

⁸Ny taranak’i Parosy: Roa amby fitopolo amby zato sy roa arivo;

⁹ny taranak’i Sefatia: Roa amby fitopolo sy telonjato;

¹⁰ny taranak’i Ara: Roa amby dimampolo sy eninjato;

¹¹ny taranak’i Pahata-Moaba, avy tamin’ny zanak’i Josoa sy i Joaba: Valo amby folo sy valonjato sy roa arivo;

¹²ny taranak’i Elama: Efatra amby dimampolo sy roanjato sy arivo;

¹³ny taranak’i Zato: Dimy amby efapolo sy valonjato;

¹⁴ny taranak’i Zakay: Enimpolo sy fitonjato;

¹⁵ny taranak’i Binoy: Valo amby efapolo sy eninjato;

¹⁶ny taranak’i Bebay: Valo amby roapolo sy eninjato;

¹⁷ny taranak’i Azgada: Roa amby roapolo sy telonjato sy roa arivo;

¹⁸ny zanak’i Adonikama: Fito amby enimpolo sy eninjato;

¹⁹ny taranak’i Bigvay: Fito amby enimpolo sy roa arivo;

²⁰ny taranak’i Adina: Dimy amby dimampolo sy eninjato;

²¹ny taranak’i Atera, avy tamin’i Hezekia: Valo amby sivifolo;

²²ny taranak’i Hasoma: Valo amby roapolo sy telonjato;

²³ny taranak’i Bezay: Efatra amby roapolo sy telonjato;

²⁴ny taranak’i Harifa: Roa amby folo amby zato;

²⁵ny taranak’i Gibeona: Dimy amby sivifolo.

²⁶Ny mponina tany Betlehema sy Netofa: Valo amby valopolo amby zato;

²⁷ny mponina tany Anatota: Valo amby roapolo amby zato;

²⁸ny mponina tany Bety-Azmaveta: Roa amby efapolo;

²⁹ny mponina tany Kiriata-Jearima sy Kefira ary Berota: Telo amby efapolo sy fitonjato;

³⁰ny mponina tany Rama sy Geva: Iraika amby roapolo sy eninjato;

³¹ny mponina tany Mikmasy: Roa amby roapolo amby zato;

³²ny mponina tany Betela sy Ay: Telo amby roapolo amby zato;

³³ny mponina tany amin’ilay Nebo iray: Roa amby dimampolo;

³⁴ny zanak’ilay Elama iray: Efatra amby dimampolo sy roanjato sy arivo;

³⁵ny zanak’i Harima: Roapolo sy telonjato;

³⁶ny zanak’i Jeriko: Dimy amby efapolo sy telonjato;

³⁷ny zanak’i Loda sy i Hadida ary i Ono: Iraika amby roapolo sy fitonjato;

³⁸ny zanak’i Sena: Telopolo sy sivinjato sy telo arivo.

³⁹Ary ny mpisorona dia izao: Ny taranak’i Jedaia, avy tamin’ny fianakavian’i Josoa: Telo amby fitopolo sy sivinjato;

⁴⁰ny taranak’Imera: Roa amby dimampolo sy arivo;

⁴¹ny taranak’i Pasora: Fito amby efapolo sy roanjato sy arivo;

⁴²ny taranak’i Harima: Fito amby folo sy arivo.

⁴³Ny levita* dia ireto: Ny zanak’i Josoa sy i Kadmiela avy tamin’ny zanak’i Hodva dia efatra amby fitopolo.

⁴⁴Ny mpihira dia izao: Ny taranak’i Asafa, valo amby efapolo amby zato.

⁴⁵Ny mpiandry varavarana dia izao: Ny taranak’i Saloma, ny taranak’i Atera, ny taranak’i Talmona, ny taranak’i Akoba, ny taranak’i Hatita, ny taranak’i Sobay: Valo amby telopolo amby zato.

⁴⁶Ny Netinima* dia izao: Ny taranak’i Ziha, ny taranak’i Hasofa, ny taranak’i Tabaota,

⁴⁷ny taranak’i Kerosa, ny taranak’i Sia, ny taranak’i Padona,

⁴⁸ny taranak’i Lebana, ny taranak’i Hagaba, ny taranak’i Salmay,

⁴⁹ny taranak’i Hanana, ny taranak’i Gidela, ny taranak’i Gahara,

⁵⁰ny taranak’i Reaia, ny taranak’i Rezina, ny taranak’i Nekoda,

⁵¹ny taranak’i Gazama, ny taranak’i Oza, ny taranak’i Pasea,

⁵²ny taranak’i Besay, ny taranaky ny Meonita, ny taranaky ny Nefisita,

⁵³ny taranak’i Bakiboka, ny taranak’i Hakafa, ny taranak’i Harora,

⁵⁴ny taranak’i Bazilita, ny taranak’i Mehida, ny taranak’i Harsa,

⁵⁵ny taranak’i Barikosa, ny taranak’i Sisera, ny taranak’i Tema,

⁵⁶ny taranak’i Nezia, ny taranak’i Hatifa.

⁵⁷Ny taranaky ny mpanompon’i Solomona dia ireto: Ny taranak’i Sotahy, ny taranak’i Sofereta, ny zanak’i Perida,

⁵⁸ny taranak’i Jala, ny taranak’i Darikona, ny taranak’i Gidela,

⁵⁹ny taranak’i Sefatia, ny taranak’i Hatila, ny taranak’i Pokereta-Hazebaima, ny taranak’i Amona.

⁶⁰Ny Netinima rehetra sy ny taranaky ny mpanompon’i Solomona dia roa amby sivifolo sy telonjato.

⁶¹Ary izao ireo niakatra avy tany Tela-Mela, Tela-Harsa, Keroba, Adona ary Imera, fa tsy nahalaza ny fianakaviany sy ny firazanany, na avy tamin’ny Israely izy na tsia:

⁶²Ny taranak’i Delaia, ny taranak’i Tobia, ny taranak’i Nekoda: Roa amby efapolo sy eninjato.

⁶³Ny avy tamin’ny mpisorona dia izao: Ny taranak’i Hobaia, ny taranak’i Hakoza, ny taranak’i Barizilay; nampaka-bady avy tamin’ny zanakavavin’i Barizilay gileadita io ka notononina araka ny anarany.

⁶⁴Ireo dia nitady ny soratra filazana ny razany, saingy tsy hita izany; dia natao ho tsy madio izy ka nesorina tamin’ny fisoronana.

⁶⁵Ary nilaza ny governora fa tsy mahazo mihinana ny zava-masina indrindra izy mandra-pitsangan’izay mpisorona iray mitondra ny Orima sy Tomima*.

⁶⁶Ny tontalin’ny olona rehetra dia enimpolo sy telonjato sy roa arivo sy efatra alina,

⁶⁷afa-tsy ny mpanompolahiny sy ny mpanompovaviny fito amby telopolo sy telonjato sy fito arivo; ary nanana mpihira lahy sy mpihira vavy dimy amby efapolo sy roanjato izy;

⁶⁸ny ramevany dia dimy amby telopolo sy efajato; ny borikiny dia roapolo sy fitonjato sy enina arivo.

⁶⁹Ny sasany tamin’ny lohan’ny fianakaviana dia nahafoy hanaovana ny asa. Ny governora dia nanome drakma* volamena arivo sy lovia famafazana dimampolo sy fanamian’ny mpisorona telopolo sy dimanjato ho kojakoja ho amin’ny hanaovana ny asa.

⁷⁰Ny sasany tamin’ny lohan’ny fianakaviana indray dia nanome drakma volamena roa alina sy volafotsy roanjato sy roa arivo mane* ho kojakoja ho amin’ny hanaovana ny asa.

⁷¹Drakma volamena roa alina sy volafotsy roa arivo mane ary fanamian’ny mpisorona fito amby enimpolo no nomen’ny olona sisa.

⁷²Samy tafapetraka teny an-tanànany avy ny mpisorona sy ny levita, ny mpiandry varavarana, ny mpihira sy ny sasany amin’ny vahoaka ary ny Netinima, mbamin’ny Israely rehetra. Ary rehefa tonga ny volana fahafito dia samy tany an-tanànany avy ny Zanak’Israely.