Read La Bible en Malgache Estera 5 Bible Online

Estera 5 - La Bible en Malgache bible

Estera 5

¹Nony tamin’ny andro fahatelo dia nanao akanjo fiandrianana i Estera ka nitsangana teo amin’ny kianja anatiny amin’ny tranon’ny mpanjaka, teo anoloan’ny tranon’ny mpanjaka, ary ny mpanjaka dia nipetraka teo ambonin’ny sezafiandrianan’ny fanjakana tao an-dapa, tandrifin’ny vavahadin’ny trano.

²Nony hitan’ny mpanjaka fa indro i Estera vadin’ny mpanjaka, nitsangana teo an-kianja, dia nahita fitia teo imasony izy. Ary nanondro an’i Estera tamin’ny tehina volamena izay teny an-tanany ny mpanjaka. Dia nanatona kosa i Estera ka nikasika ny tendron’ny tehina.

³Dia hoy ny mpanjaka taminy: Inona no angatahinao, ry Estera, vadin’ny mpanjaka, ary inona no tadiavinao? Fa na dia hatramin’ny antsasaky ny fanjakana aza dia homena anao izany.

⁴Dia namaly i Estera hoe: Raha sitraky ny mpanjaka dia aoka ny mpanjaka sy i Hamana ho tonga anio amin’ny fanasana izay efa namboariko ho azy.

⁵Dia hoy ny mpanjaka: Asaivo manatanteraka haingana ny tenin’i Estera i Hamana. Ary ny mpanjaka sy i Hamana dia tonga tao amin’ny fanasana izay efa namboarin’i Estera.

⁶Ary hoy ny mpanjaka tamin’i Estera teo am-pisotroan-divay: Inona no angatahinao? Fa homena anao izany. Ary inona no tadiavinao? Fa na dia hatramin’ny antsasaky ny fanjakana aza dia homena izany.

⁷Dia namaly i Estera hoe: Izao no angatahiko sy tadiaviko:

⁸Raha mahita fitia eto imason’ny mpanjaka aho ka sitraky ny mpanjaka ny hanome izay angatahiko sy hanatanteraka izay tadiaviko dia aoka ny mpanjaka sy i Hamana ho tonga amin’ny fanasana izay hamboariko ho azy indray rahampitso, dia hanatanteraka ny tenin’ny mpanjaka ihany aho.

⁹Dia nivoaka ny trano tamin’izany andro izany i Hamana sady faly sy ravoravo ny fony. Nefa rehefa nahita an’i Mordekay teo am-bavahadin’ny mpanjaka izy dia feno hatezerana taminy satria tsy mba nitsangana na nihetsika hitsaoka azy akory i Mordekay.

¹⁰Nanindry fo ihany anefa i Hamana ka lasa nody tany an-tranony aloha. Dia naniraka olona haka ny sakaizany sy i Zaresy vadiny izy.

¹¹Notanisain’i Hamana tamin’ireo ny haben’ny harenany sy ny hamaroan’ny zanany mbamin’izay voninahitra rehetra nomen’ny mpanjaka azy sy ny nanandratany azy ho ambony noho ny mpitondra sy ny mpanompon’ny mpanjaka.

¹²Hoy koa i Hamana: E! I Estera, vadin’ny mpanjaka, aza dia tsy naka olona afa-tsy izaho ihany hiaraka amin’ny mpanjaka ho amin’ny fanasana izay namboariny sady nasainy hiaraka amin’ny mpanjaka koa aho rahampitso.

¹³Nefa na izany rehetra izany aza dia tsy mbola afa-po aho raha mahita an’i Mordekay jiosy mipetraka eo am-bavahadin’ny mpanjaka.

¹⁴Dia hoy i Zaresy vadiny sy ny sakaizany rehetra taminy: Asaivo misy manangana hazo, koa dimampolo hakiho* ny haavony; ary rahampitso maraina dia lazao amin’ny mpanjaka mba hahantona eo i Mordekay. Koa mandehana miaraka amin’ny mpanjaka amin’ny hafaliana ho any amin’ny fanasana ianao. Ary sitrak’i Hamana izany zavatra izany ka nampanangana ilay hazo izy.