Read La Bible en Malgache Estera 6 Bible Online

Estera 6 - La Bible en Malgache bible

Estera 6

¹Tamin’iny alina iny dia tsy nahita tory ny mpanjaka ka nampaka ny boky fitadidiana ny tantara; ary novakina teo anatrehan’ny mpanjaka izany.

²Koa indro, voasoratra tao fa i Mordekay no niampanga an’i Bigtana sy i Taresy; izy roa lahy ireo dia isan’ny ionòkan’ny mpanjaka sady mpiambina teo am-baravarana izay nitady hamono an’i Ahasoerosy mpanjaka.

³Ary hoy ny mpanjaka: Inona moa no fisandratam-boninahitra mba efa nomena an’i Mordekay noho izany? Fa hoy ny mpanompon’ny mpanjaka izay nanompo azy: Tsy mbola nisy nomena azy!

⁴Ary hoy ny mpanjaka: Iza izao ao an-kianja ao izao? I Hamana no tonga tao an-kianja ivelan’ny tranon’ny mpanjaka tamin’io fotoana io indrindra mba hiteny amin’ny mpanjaka ny amin’ny hanantonana an’i Mordekay amin’ilay hazo efa natsangany hanantonana azy.

⁵Hoy ny mpanompon’ny mpanjaka taminy: Indro i Hamana no mijoro ao an-kianja. Ary hoy ny mpanjaka: Asaivo miditra izy!

⁶Dia niditra i Hamana ka hoy ny mpanjaka taminy: Inona no mendrika hatao amin’izay lehilahy tian’ny mpanjaka homem-boninahitra? Ary hoy i Hamana anakampo hoe: Koa iza indray moa no ho tian’ny mpanjaka homem-boninahitra raha tsy izaho?

⁷Koa hoy i Hamana tamin’ny mpanjaka: Ny amin’izay lehilahy tian’ny mpanjaka homem-boninahitra,

⁸dia aoka halaina izay akanjo fiandrianana efa niakanjoan’ny mpanjaka sy soavaly izay efa nitaingenan’ny mpanjaka sady voaisy satroboninahitra ny lohany;

⁹dia aoka izany fitafiana sy soavaly izany no hatolotra eo an-tanan’izay ambony indrindra amin’ny mpitondra voatendrin’ny mpanjaka, ary aoka izay lehilahy tian’ny mpanjaka homem-boninahitra no hampiakanjoina izany ka hampitaingenina amin’ny soavaly. Dia hoentina eo amin’ny kianjan’ny tanàna izy ary aoka hisy hiantso eo alohany hoe: Izao no atao amin’ny lehilahy izay tian’ny mpanjaka homem-boninahitra!

¹⁰Dia hoy ny mpanjaka tamin’i Hamana: Haingàna ary, alaivo ny akanjo sy ny soavaly araka ny voalazanao ka ataovy araka izany amin’i Mordekay jiosy izay mipetraka eo am-bavahadin’ny mpanjaka; aza asiana latsaka izay rehetra nolazainao.

¹¹Dia nalain’i Hamana ny akanjo sy ny soavaly ka nampiakanjo an’i Mordekay izy ary nampitaingina azy tamin’ny soavaly; dia nitondra azy ho eny amin’ny kianjan’ny tanàna izy ka niantso teo alohany hoe: Izao no atao amin’ny lehilahy izay tian’ny mpanjaka homem-boninahitra!

¹²Ary niverina nankeo amin’ny vavahadin’ny mpanjaka i Mordekay; fa i Hamana kosa dia nody haingana ho any an-tranony sady nalahelo no nisaron-doha.

¹³Dia nolazain’i Hamana tamin’i Zaresy vadiny sy ny sakaizany rehetra izay zavatra nanjo azy. Ary hoy ny olon-kendry rehetra sy i Zaresy vadiny taminy: Raha avy amin’ny taranaky ny Jiosy* i Mordekay izay efa nanomboka nandavo anao teo anatrehany dia tsy haharesy azy mihitsy ianao fa tsy maintsy ho lavo eo anatrehany.

¹⁴Raha mbola niresaka taminy ihany ireo dia tonga ny ionòkan’ny mpanjaka ka naka haingana an’i Hamana ho any amin’ny fanasana izay efa namboarin’i Estera.