Read La Bible en Malgache Estera 7 Bible Online

Estera 7 - La Bible en Malgache bible

Estera 7

¹Ary nankao amin’i Estera, vadin’ny mpanjaka, ho ao amin’ny fanasana, ny mpanjaka sy i Hamana.

²Hoy indray ny mpanjaka tamin’i Estera teo am-pisotroan-divay tamin’ny andro faharoa: Inona no angatahinao, ry Estera, vadin’ny mpanjaka? Fa homena anao izany. Ary inona angaha no tadiavinao? Fa na dia hatramin’ny antsasaky ny fanjakana aza dia hotovina izany.

³Dia namaly i Estera, vadin’ny mpanjaka hoe: Raha mahita fitia eto imasonao ary aho, ry mpanjaka, ka sitraky ny mpanjaka, dia aoka homena ahy ny aiko araka ny fifonako ary koa ny fireneko araka ny fangatahako!

⁴Fa namidy izahay, dia izaho sy ny fireneko, mba haringana sy hovonoina ary haripaka. Fa raha toa ka namidy ho andevolahy sy ho andevovavy izahay dia ho nangina ihany aho; kanefa ange tsy mahonitra ny fatiantoky ny mpanjaka akory ilay fahavalo e.

⁵Dia nanontany an’i Estera, vadin’ny mpanjaka, i Ahasoerosy mpanjaka hoe: Iza moa izany, ary aiza izany olona asesiky ny fony hahevitra an’izany?

⁶Fa hoy i Estera: Io Hamana ratsy fanahy io no rafilahy sy fahavalo! Dia raiki-tahotra teo anatrehan’ny mpanjaka sy ny vadin’ny mpanjaka i Hamana.

⁷Ary tezitra mafy ny mpanjaka ka nitsangana niala teo am-pisotroan-divay ho any amin’ny zaridainan’ny mpanjaka. Fa nitsangana kosa i Hamana hangataka ny ainy tamin’i Estera, vadin’ny mpanjaka, satria hitany fa misy loza hataon’ny mpanjaka aminy.

⁸Ary niverina avy tao amin’ny zaridainan’ny mpanjaka ho ao amin’ilay efitrano izay nisotroany divay teo ny mpanjaka ary tamin’izay i Hamana dia niampatra tamin’ny farafara nandriandrian’i Estera. Dia hoy ny mpanjaka: Moa hisavika ny vadin’ny mpanjaka eto anatrehako ato an-trano koa va ilay io? Raha vantany vao naloaky ny vavan’ny mpanjaka izany teny izany dia nisy nanarona ny tavan’i Hamana.

⁹Ary i Harbona, iray tamin’ireo ionòka* izay teo anatrehan’ny mpanjaka dia nilaza hoe: Indro, mijoro eo akaikin’ny tranon’i Hamana rahateo ny hazo; io ilay hazo natsangany mba hanantonany an’i Mordekay, ilay niteny soa ho an’ny mpanjaka; dimampolo hakiho* ny haavony. Dia hoy ny mpanjaka: Ahantòny amin’io izy.

¹⁰Ary nahantony tamin’ilay hazo efa natsangany mba hanantonana an’i Mordekay i Hamana. Dia izay vao nionona ny fahatezeran’ny mpanjaka.