Read La Bible en Malgache Eksodosy 1 Bible Online

Eksodosy 1 - La Bible en Malgache bible

Eksodosy 1

¹Ireto ny anaran’ny Zanak’Israely izay niaraka tamin’i Jakoba nankany Ejipta; samy nandeha mbamin’ny ankohonany avy izy rehetra:

²I Robena, i Simeona, i Levy ary i Joda;

³Isakara, i Zebolona, i Benjamina;

⁴i Dana, i Naftaly, i Gada ary i Asera.

⁵Fitopolo ny isan’ny olona rehetra naterak’i Jakoba. I Josefa dia efa tany Ejipta rahateo.

⁶Ary maty i Josefa sy ny rahalahiny rehetra mbamin’izany taranaka rehetra izany.

⁷Ary niteraka maro ny Zanak’Israely ka nitombo betsaka sy nihamaro ary nitombo hery hatrany ka henika azy ny tany.

⁸Ary nisy mpanjaka vaovao nanjaka tany Ejipta, izay tsy nahafantatra an’i Josefa.

⁹Izy io no niteny tamin’ny vahoakany hoe: Indro, efa maro sy mahery noho isika ny firenen’ny Zanak’Israely.

¹⁰Andeha hitadiavantsika hevitra ireo, fandrao hihamaro izy, koa raha toa ka misy ady dia homba ny fahavalontsika koa izy ka hiady amintsika ary hiakatra hiala amin’ny tany izy ireo.

¹¹Dia nanendreny mpifehy izy mba hampahory azy ireo amin’ny fanompoana mafy. Ary nanao tanàna fitahirizana ho an’i Farao izy, dia Pitoma sy Ramesesa.

¹²Nefa arakaraka ny nampahoriany azy no vao mainka nihamaroany sy nitomboany kosa ka natahotra ny Zanak’Israely fatratra ny Ejiptiana.

¹³Dia nampanompoin’ny Ejiptiana mafy ny Zanak’Israely

¹⁴ka nataony nitondra faisana tamin’ny fanompoana mafy, ny fanaovana feta sy biriky mbamin’ny fanompoana rehetra any an-tsaha, dia ny fanompoana rehetra izay nampanompoany azy mafy.

¹⁵Ary hoy ny mpanjakan’i Ejipta tamin’ny mpampivelona hebreo, Sifra no anaran’ny iray, ary Poa no anaran’ny iray:

¹⁶Rehefa mampiteraka ny vehivavy hebreo ianareo ka hitanareo fa zazalahy dia vonoy, fa raha zazavavy kosa dia velomy.

¹⁷Nefa natahotra an’Andriamanitra ireo mpampivelona dia tsy nanatanteraka izay nolazain’ny mpanjakan’i Ejipta taminy fa novelominy ihany ny zazalahy.

¹⁸Dia niantso ireo mpampivelona ny mpanjakan’i Ejipta ka niteny taminy hoe: Nahoana ianareo no nanao izao ka novelominareo ihany ny zazalahy?

¹⁹Fa hoy ireo mpampivelona tamin’i Farao: Tsy mba tahaka ny vehivavy ejiptiana ny vehivavy hebreo fa matanjaka be izy, koa raha tsy mbola tonga any aminy akory ny mpampivelona dia efa teraka sahady izy.

²⁰Dia nasian’Andriamanitra soa ireo mpampivelona; ary nihamaro sy nihanahery indrindra ny olona.

²¹Ary tamin’izany, satria natahotra an’Andriamanitra ireo mpampivelona, dia nomen’Andriamanitra taranaka izy.

²²Dia nandidy ny vahoakany rehetra i Farao hoe: Ny zazalahy rehetra izay teraka dia atsipazo any amin’ny ranon’i Neily, fa ny zazavavy rehetra kosa no velomy.