Read La Bible en Malgache Eksodosy 12 Bible Online

Eksodosy 12 - La Bible en Malgache bible

Eksodosy 12

¹Ary NY TOMPO niteny tamin’i Mosesy sy i Arona teo amin’ny tany Ejipta hoe:

²Ity volana ity no volana voalohany ho anareo; ho volana voalohany amin’ny taona ho anareo izany.

³Mitenena ianareo amin’ny fiangonan’ny Israely manontolo hoe: Amin’ny andro fahafolo amin’ity volana ity dia aoka haka zanak’ondry na zanak’osy iray avy ny isam-pianakaviana, zanak’ondry iray avy isan-trano.

⁴Raha vitsy loatra ny iray trano ka tsy mahalany zanak’ondry iray dia aoka izy sy izay namany mifanakaiky trano aminy no haka araka izay isan’ny olona; araka izay tokony ho lanin’ny olona no hifidiananareo ilay zanak’ondry.

⁵Zanak’ondry tsy misy kilema, na zanak’osy, ary lahy izay iray taona, no halainareo; halainareo amin’ny ondry na amin’ny osy izany.

⁶Hotahirizinareo hatramin’ny andro fahefatra amby folo amin’ity volana ity izany; dia hamono azy amin’ny hariva[4] ny fiangonan’ny Israely manontolo.

⁷Ary hakana ny ra ka hatentina amin’ny tolanam-baravarana roa sy amin’ny tataom-baravaran’ny trano izay hihinanana azy.

⁸Dia hohanina amin’izany alina izany ny hena; voatsatsika tamin’ny afo no hihinanana azy, miaraka amin’ny mofo tsy misy masirasira sady hampiarahina amin’ny anana mangidy.

⁹Aza hanina manta na voahandro amin’ny rano izany fa atsatsiho amin’ny afo mbamin’ny lohany sy ny tongony ary ny taovany.

¹⁰Aza asianareo sisa ho tra-maraina; fa raha toa ka misy sisa tsy lany ka tra-maraina dia hodoranareo amin’ny afo izany.

¹¹Toy izao no hataonareo rehefa mihinana azy: Ho voasikina ianareo, ary hisy kapa ny tongotrareo, ary ho eny an-tananareo ny tehinareo; dia hohaninareo haingana izany, fa Paska[5] an’NY TOMPO.

¹²Fa handeha hamakivaky ny tany Ejipta amin’izany alina izany Aho ka hamono ny lahimatoa rehetra ao amin’ny tany Ejipta, hatramin’ny olona ka hatramin’ny biby fiompy. Hanao fitsarana amin’ireo andriamanitry ny Ejiptiana rehetra Aho. Izaho no TOMPO.

¹³Ary ny ra dia ho famantarana ho anareo eo amin’ny trano izay itoeranareo. Koa raha mahita ny ra Aho dia handalo anareo fotsiny ka tsy hisy loza handringana anareo rehefa mamely ny tany Ejipta Aho.

¹⁴Izany andro izany dia ho andro fahatsiarovana ho anareo ka hotandremanareo ho andro firavoravoana ho an’NY TOMPO; hatramin’ny taranakareo fara aman-dimby no hitandremanareo izany ho andro firavoravoana, ho lalàna maharitra.

¹⁵Hafitoana no hihinananareo mofo tsy misy masirasira. Amin’ny andro voalohany no hanesoranareo ny masirasira amin’ny tranonareo; fa na iza na iza no hihinana mofo misy masirasira manomboka amin’ny andro voalohany ka hatramin’ny fahafito dia hofongorana tsy ho eo amin’ny Israely izy.

¹⁶Amin’ny andro voalohany dia hisy fivoriana masina ho anareo, ary amin’ny andro fahafito koa dia hisy fivoriana masina. Tsy hanao raharaha akory ianareo amin’ireo andro ireo, afa-tsy izay hohanin’ny olona tsirairay, dia izany ihany no hamboarinareo.

¹⁷Ary hitandrina ny andron’ny mofo tsy misy masirasira ianareo, fa tamin’izany andro izany indrindra no nitondrako ny antokonareo nivoaka avy tany amin’ny tany Ejipta; koa hotandremanareo izany hatramin’ny taranakareo fara aman-dimby, ho lalàna maharitra.

¹⁸Amin’ny andro fahefatra amby folo amin’ny volana voalohany, amin’ny hariva, no hihinananareo mofo tsy misy masirasira, hatramin’ny harivan’ny andro fahiraika amby roapolo amin’ny volana.

¹⁹Hafitoana no tsy hisiana masirasira ao an-tranonareo; fa na iza na iza homana izay misy masirasira dia hofongorana tsy ho eo amin’ny fiangonan’ny Israely, na vahiny na tompon-tany.

²⁰Tsy hihinana na inona na inona izay misy masirasira ianareo fa samy hihinana mofo tsy misy masirasira ao amin’izay itoeranareo rehetra avy.

²¹Dia niantso ny loholon’ny Israely rehetra i Mosesy ka hoy izy taminy: Mandehana ianareo dia makà ondry ho anareo araka ny fokom-pirenenareo avy ka vonoy ny Paska.

²²Dia makà hisopa* iray fihina ka atsobohy amin’ny ra izay ao anatin’ny bakoly, ary ny ra izay ao anatin’ny bakoly dia ahosory amin’ny tataom-baravarana sy ny tolàna roa. Aza misy mivoaka ny varavaran’ny tranonareo ianareo mandra-paharain’ny andro.

²³Fa handeha hamely ny Ejiptiana NY TOMPO; ary raha mahita ny ra eo amin’ny tataom-baravarana sy ny tolàna roa NY TOMPO dia handalo fotsiny ny varavarana ka tsy havelany hiditra ao an-tranonareo hamely anareo ny mpandringana.

²⁴Ary hitandrina izany zavatra izany ianareo ho lalàna maharitra ho anareo sy ho an’ny taranakareo.

²⁵Ary rehefa tonga any amin’ny tany izay homen’NY TOMPO anareo araka izay nolazainy ianareo dia tandremo izany fanompoana izany.

²⁶Raha manontany anareo ny zanakareo hoe: Inona no anton’izao fanompoana ataonareo izao?

²⁷Dia holazainareo hoe: Izao dia famonoana ny Paska an’NY TOMPO, izay nandalo fotsiny ny tranon’ny Zanak’Israely tany Ejipta; raha namely ny Ejiptiana Izy dia namonjy ny tao an-tranontsika kosa. Dia niankohoka tamin’ny tany ny olona ka nivavaka.

²⁸Ary nandeha ny Zanak’Israely ka nanatanteraka izany. Araka izay nandidian’NY TOMPO an’i Mosesy sy i Arona no nataony.

²⁹Nony misasakalina dia namono ny lahimatoa rehetra tany amin’ny tany Ejipta NY TOMPO, hatramin’ny lahimatoan’i Farao izay nipetraka teo ambonin’ny sezafiandrianany ka hatramin’ny lahimatoan’ny babo izay tao amin’ny tranomaizina, mbamin’izay voalohan-teraky ny biby fiompy rehetra.

³⁰Ary raha mbola alina dia nifoha i Farao sy ny mpanompony rehetra ary ny Ejiptiana rehetra, fa nisy fidradradradrana mafy tany Ejipta satria tsy nisy trano izay tsy nahafatesana.

³¹Dia nampiantso an’i Mosesy sy i Arona izy tamin’iny mbola alina iny ka niteny hoe: Mitsangàna, mialà eto amin’ny vahoakako ianareo sy ny Zanak’Israely ary mandehana ka manompoa NY TOMPO araka ny nolazainareo.

³²Ary ny ondry aman’osinareo sy ny ombinareo dia ento koa araka izay efa nolazainareo ka mandehana; ary mba tsofy rano aho!

³³Dia nandodona ny olona ny Ejiptiana ka nampandeha azy haingana hiala tamin’ny tany satria hoy izy: Ho faty avokoa izahay rehetra!

³⁴Dia noentin’ny olona ny kobany efa voalena, raha tsy mbola tonga masirasira, sy ny vilany famolavolana koba, voafehy tamin’ny lambany teny an-tsorony.

³⁵Ary nanaraka ny tenin’i Mosesy ny Zanak’Israely ka nangataka firavaka volafotsy sy firavaka volamena ary fitafiana tamin’ny Ejiptiana.

³⁶Fa nataon’NY TOMPO nahita fitia teo imason’ny Ejiptiana ny olona ka nomen’ireo azy izay nangatahiny. Nofoanany tamin’izany ny Ejiptiana.

³⁷Dia niainga tao Ramesesa ny Zanak’Israely ka nankany Sokota, dia lehilahy mahalia lalana tokony ho enina hetsy, afa-tsy ny zaza amam-behivavy.

³⁸Ary nisy olona maro samihafa firenena koa niara-niakatra taminy, ary ondry aman’osy sy omby, dia fananana be tokoa.

³⁹Dia nanendy mofo tsy nisy masirasira tamin’ny koba nohamandoina izay noentiny avy tany Ejipta izy ireo; tsy mbola tonga masirasira ilay izy satria noroahina tany Ejipta izy ireo ka tsy nahazo nitaredretra, tsy nisy fotoana hanomanana vatsy akory.

⁴⁰Ny andro nitoeran’ny Zanak’Israely tany Ejipta dia telopolo sy efajato taona.

⁴¹Rehefa tapitra ny telopolo sy efajato taona dia tamin’izany andro izany indrindra no nivoahan’ireo antoko rehetra izay an’NY TOMPO avy tany amin’ny tany Ejipta.

⁴²Alina natao hotandremana ho an’NY TOMPO izany satria nitondrany azy ireo hivoaka avy tamin’ny tany Ejipta; eny, izany alina izany dia an’NY TOMPO ka hotandreman’ny Zanak’Israely rehetra hatramin’ny taranany fara aman-dimby.

⁴³Hoy NY TOMPO tamin’i Mosesy sy i Arona: Izao no fitsipiky ny Paska: Tsy hisy olona hafa firenena hahazo hihinana azy.

⁴⁴Ny mpanompolahy rehetra izay novidim-bola dia hoforana aloha vao hahazo hihinana.

⁴⁵Ny vahiny sy ny mpikarama kosa dia tsy mba hihinana azy.

⁴⁶Ao amin’ny trano iray ihany no hihinanana azy; tsy hamoahanao eny alatrano akory ny hena, ary tsy hisy hotapahinareo ny taolany na dia iray aza.

⁴⁷Ny fiangonan’ny Israely manontolo no hitandrina izany.

⁴⁸Raha misy mivahiny eo aminao ka mba te hitandrina ny Paska an’NY TOMPO dia aoka hoforana ny lehilahy rehetra eo aminy vao manatona hitandrina izany ka ho tahaka ny tompon-tany ihany izy; fa ny tsy voafora rehetra kosa dia tsy mahazo mihinana azy.

⁴⁹Lalàna iray no ho amin’ny tompon-tany sy ny vahiny izay mitoetra eo aminareo.

⁵⁰Dia notanterahin’ny Zanak’Israely rehetra izany. Araka izay nandidian’NY TOMPO an’i Mosesy sy i Arona no nataony.

⁵¹Tamin’izany andro izany indrindra no nitondran’NY TOMPO ny Zanak’Israely nivoaka ny tany Ejipta araka ny antokony.