Read La Bible en Malgache Eksodosy 13 Bible Online

Eksodosy 13 - La Bible en Malgache bible

Eksodosy 13

¹Ary NY TOMPO niteny tamin’i Mosesy indray hoe:

²Hamasino ho Ahy ny lahimatoa rehetra, dia izay voalohan-teraka rehetra eo amin’ny Zanak’Israely, na olona na biby fiompy. Ahy ireny.

³Dia hoy i Mosesy tamin’ny olona: Tsarovy izao andro izao, izay nivoahanareo avy tany Ejipta, tamin’ny trano nanandevozana, fa tamin’ny tanana mahery no nitondran’NY TOMPO anareo nivoaka avy tany. Koa aza misy mihinana izay misy masirasira.

⁴Izao andro amin’ny volana Abiba* izao no ivoahanareo.

⁵Rehefa mitondra anao NY TOMPO ho any amin’ny tanin’ny Kananita, ny Hetita, ny Amorita, ny Hivita ary ny Jebosita, izay nianianany tamin’ny razanao homena anao, dia tany tondra-dronono sy tantely, dia hanao izany fanompoana izany ianao amin’izao volana izao.

⁶Hafitoana no hihinananao mofo tsy misy masirasira, ary amin’ny andro fahafito dia hisy andro firavoravoana ho an’NY TOMPO.

⁷Mofo tsy misy masirasira no hohanina mandritra ny hafitoana; tsy hisy mofo misy masirasira ao aminao ary tsy hisy izay masirasira akory ao aminao, any amin’ny taninao rehetra.

⁸Hambaranao amin’ny zanakao amin’izany andro izany hoe: Noho ny nataon’NY TOMPO tamiko tamin’ny nivoahako avy tany Ejipta no anaovako izao.

⁹Ho famantarana ho anao eo amin’ny tananao izany ary ho fampahatsiarovana eo ambonin’ny handrinao mba ho ao am-bavanao ny lalànan’NY TOMPO: Fa tanana mahery no nitondran’NY TOMPO anao nivoaka avy tany Ejipta.

¹⁰Dia tandremo izao lalàna izao amin’ny fotoanany isan-taona.

¹¹Rehefa mitondra anao NY TOMPO hiditra any amin’ny tanin’ny Kananita araka izay nianianany taminao sy tamin’ny razanao ka homeny anao izany

¹²dia hatokanao ho an’NY TOMPO izay voalohan-teraka rehetra: Ny voalohan-teraky ny biby fiompy rehetra anananao dia ho an’NY TOMPO ny lahy rehetra.

¹³Ny voalohan-teraky ny boriky dia hosoloanao zanak’ondry; fa raha tsy hanolo azy ianao dia hofolahinao ny vozony. Ary ny lahimatoa rehetra amin’ny olona eo amin’ny zanakao dia havotanao.

¹⁴Ary raha manontany anao ny zanakao amin’ny andro ho avy ka hiteny hoe: Inona no anton’izao? Dia holazainao aminy hoe: Tanana mahery no nitondran’NY TOMPO antsika nivoaka avy tany Ejipta, tamin’ny trano nanandevozana;

¹⁵ary satria nanamafy ny fony i Farao ka tsy namela antsika handeha dia novonoin’NY TOMPO ny lahimatoa rehetra tany amin’ny tany Ejipta, hatramin’ny lahimatoan’ny olona ka hatramin’ny voalohan-teraky ny biby. Koa izany no anaterako ho an’NY TOMPO ny lahy voalohan-teraka rehetra, fa ny lahimatoa rehetra amin’ny zanako kosa dia soloiko.

¹⁶Ho famantarana eo amin’ny tananao sy ho fehy eo ambonin’ny handrinao izany; fa tanana mahery no nitondran’NY TOMPO antsika nivoaka avy tany Ejipta.

¹⁷Rehefa nalefan’i Farao ny olona dia tsy mba noentin’Andriamanitra tamin’ny lalana nankany amin’ny tanin’ny Filistina izy na dia akaiky aza any; fa hoy Andriamanitra: Sao hanenina ny olona raha mahita ady ka hiverina any Ejipta.

¹⁸Koa noentin’Andriamanitra nivily ho amin’ny lalana mahazo ny tany efitra amoron’ny Ranomasina Mena ny olona; ary voaomana hiady no fiakatry ny Zanak’Israely avy tany amin’ny tany Ejipta.

¹⁹Ary noentin’i Mosesy niaraka taminy ny taolan’i Josefa, satria i Josefa dia efa nampianiana mafy ny Zanak’Israely hoe: Hamangy anareo tokoa Andriamanitra ka hitondra ny taolako hiala atỳ miaraka aminareo ianareo.

²⁰Dia nifindra niala tao Sokota izy ka nitoby tao Etama teo an-tsisin’ny tany efitra.

²¹Ary NY TOMPO nandeha teo alohany tamin’ny andry rahona ny antoandro mba hitari-dalana azy ary tamin’ny andry afo, nony alina, ho fahazavana ho azy mba hahazoany mandeha na andro na alina.

²²Ny andry rahona dia tsy niala teo alohan’ny olona ny antoandro, ary ny andry afo nony alina.