Read La Bible en Malgache Eksodosy 14 Bible Online

Eksodosy 14 - La Bible en Malgache bible

Eksodosy 14

¹Ary NY TOMPO niteny tamin’i Mosesy hoe:

²Lazao amin’ny Zanak’Israely mba hivily izy ka hitoby eo akaikin’i Py-Hahirota, eo anelanelan’i Migdola sy ny ranomasina. Eo akaikin’i Baala-Zefona, tandrify azy, no hitobianareo, eo amoron’ny ranomasina.

³Fa hilaza amin’ny olony i Farao hoe: Azon’ny tamberin-tany izy ka voahidin’ny tany efitra.

⁴Dia hanamafy ny fon’i Farao Aho ka hanenjika anareo izy, kanefa dia hasehoko ny voninahitro amin’izay hataoko amin’i Farao sy amin’ny miaramilany rehetra ka ho fantatry ny Ejiptiana fa Izaho no TOMPO. Dia nataon’ny Zanak’Israely izany.

⁵Ary nisy nanambara tamin’ny mpanjakan’i Ejipta tokoa fa lasa nandositra ny olona. Dia niova ny eritreritr’i Farao sy ny mpanompony ny amin’ny olona ka hoy izy ireo: Inona izao nataontsika izao no dia nandefa ny Israelita hiala tamin’ny fanompoany antsika isika?

⁶Dia nasainy nomanina ny kalesy fitondrany miady sady nitondra ny vahoakany hanaraka azy izy.

⁷Nitondra kalesy fitondra miady voafantina eninjato sy ny kalesy fitondra miadin’ny Ejiptiana rehetra izy ka samy nisy manamboninahitra avy ireo.

⁸Ary NY TOMPO nanamafy ny fon’i Farao, mpanjakan’i Ejipta, dia nanenjika ny Zanak’Israely izy, na dia tamin’ny fahafahana tanteraka aza no nivoahan’ireo.

⁹Koa nanenjika azy ireo ny Ejiptiana, dia ny soavaly rehetra mitarika ny kalesin’i Farao sy ny mpitaingin-tsoavaliny ary ny miaramilany ka nahatratra azy nitoby teo amoron’ny ranomasina, teo anilan’i Py-Hahirota, tandrifin’i Baala-Zefona.

¹⁰Rehefa nanakaiky i Farao dia natopin’ny Zanak’Israely ny masony ka indreo ny Ejiptiana tamy manenjika azy. Dia raiki-tahotra indrindra ny Zanak’Israely ka nitaraina tamin’NY TOMPO.

¹¹Sady hoy koa ireo tamin’i Mosesy: Moa tsy nisy fasana va tany Ejipta no noentinao ho faty atỳ an-tany efitra izahay? Inona izao nataonao taminay izao ka nitondra anay nivoaka avy tany Ejipta ianao?

¹²Tsy izao va no teny nolazainay taminao fony tany Ejipta hoe: Aoka izao fa avelao ihany izahay hanompo ny Ejiptiana? Fa aleonay manompo ny Ejiptiana toy izay ho faty any an-tany efitra.

¹³Dia hoy i Mosesy tamin’ny olona: Aza matahotra ianareo! Miorena tsara fa ho hitanareo ny famonjen’NY TOMPO izay hataony ho anareo anio; fa ny Ejiptiana izay hitanareo anio dia tsy hohitanareo intsony mandrakizay.

¹⁴NY TOMPO no hiady ho anareo fa ianareo kosa dia hangina.

¹⁵Hoy NY TOMPO tamin’i Mosesy: Nahoana no mitaraina Amiko ianao? Lazao ny Zanak’Israely mba handroso.

¹⁶Ary ianao, aingao ny tehinao ka atsory ambonin’ny ranomasina ny tananao dia saraho ny rano ka handeha hamakivaky eo afovoan’ny ranomasina, mandia tany maina, ny Zanak’Israely.

¹⁷Fa indro Aho hanamafy ny fon’ny Ejiptiana ka hiditra hanaraka azy ao; dia hasehoko ny voninahitro amin’izay hataoko amin’i Farao sy amin’ny miaramilany rehetra miaraka amin’ny kalesy fitondrany miady sy ny mpitaingin-tsoavaliny

¹⁸ka ho fantatry ny Ejiptiana fa Izaho no TOMPO, rehefa asehoko ny voninahitro amin’izay ataoko amin’i Farao sy ny kalesiny sy ny mpitaingin-tsoavaliny.

¹⁹Ary ilay Anjelin’Andriamanitra*, izay nandeha teo alohan’ny tobin’ny Israelita, dia nifindra ka nankeo aorianany; ary nifindra niala teo alohany koa ny andry rahona dia nijanona teo aorianany

²⁰ka tonga teo anelanelan’ny tobin’ny Ejiptiana sy ny tobin’ny Israely. Teo ihany ny rahona sy ny hamaizinana nefa nampahazava ny alina kosa izany ka tsy nifanatona izy roa tonta nandritra ny alina.

²¹Dia natsotran’i Mosesy teo ambonin’ny ranomasina ny tanany ka rivotra mahery avy any atsinanana no nampisavan’NY TOMPO ny ranomasina nandritra iny alina iny, ary nataony tany maina ny ranomasina sady voasaraka ny rano.

²²Dia nandeha teo afovoan’ny ranomasina nandia tany maina ny Zanak’Israely; fa ny rano dia tonga fefy teo ankavanany sy teo ankaviany.

²³Dia nanenjika azy ireo ny Ejiptiana ka niditra nanaraka azy teo afovoan’ny ranomasina, dia ny soavalin’i Farao rehetra sy ny kalesy fitondra miady ary ny mpitaingin-tsoavaliny.

²⁴Tamin’ny fotoam-piambenana maraina dia nitazana ny tobin’ny Ejiptiana avy eo amin’ny andry afo sy ny rahona NY TOMPO ka nampifanaritaka ny tobin’ny Ejiptiana.

²⁵Nataony nikatso ny kodiaran’ny kalesy fitondra miady ka nanasarotra ny fandehany izany. Dia hoy ny Ejiptiana: Andeha handositra ny Israelita isika fa NY TOMPO no miady amin’ny Ejiptiana ho an’ireo.

²⁶Ary hoy NY TOMPO tamin’i Mosesy: Atsory eo ambonin’ny ranomasina ny tananao mba hikatonan’ny rano amin’ny Ejiptiana mbamin’ny kalesy fitondrany miady sy ny mpitaingin-tsoavaliny.

²⁷Dia natsotran’i Mosesy teo ambonin’ny ranomasina ny tanany ka niverina ho amin’ny toerany teo aloha ny ranomasina rehefa nadiva ho maraina ny andro; nitsoaka nandositra ny rano ny Ejiptiana, kanjo notsenainy ihany, ary narian’NY TOMPO teo afovoan’ny ranomasina ny Ejiptiana.

²⁸Nikatona ny rano ka nanarona ny kalesy fitondra miady sy ny mpitaingin-tsoavaly, dia ny miaramilan’i Farao rehetra izay niditra tao amin’ny ranomasina nanenjika ny Zanak’Israely; tsy nisy niangana na dia iray akory aza ireo.

²⁹Fa ny Zanak’Israely kosa dia nandeha tamin’ny tany maina teo afovoan’ny ranomasina; ary ny rano dia tonga fefy teo ankavanany sy teo ankaviany.

³⁰Toy izany no namonjen’NY TOMPO ny Israely mba tsy ho azon’ny Ejiptiana tamin’izany andro izany; ary hitan’ny Israelita teny amoron’ny ranomasina ny fatin’ny Ejiptiana.

³¹Rehefa hitan’ny Israelita ny asa lehibe izay nataon’ny tanan’NY TOMPO tamin’ny Ejiptiana dia natahotra NY TOMPO ny olona ka nino NY TOMPO sy i Mosesy mpanompony.