Read La Bible en Malgache Eksodosy 15 Bible Online

Eksodosy 15 - La Bible en Malgache bible

Eksodosy 15

¹Tamin’izay i Mosesy sy ny Zanak’Israely dia nihira izao hira izao ho an’NY TOMPO hoe: Hihira ho an’NY TOMPO aho fa avo indrindra Izy; ny soavaly sy ny mpitaingina azy dia nariany any amin’ny ranomasina.

²NY TOMPO no heriko sy anton’ny fiderako, fa famonjena ahy Izy; Izy no Andriamanitro ka hankalaza Azy aho. Izy no Andriamanitry ny razako ka hanandratra Azy aho.

³NY TOMPO dia mpiady mahery. NY TOMPO no anarany.

⁴Ny kalesin’i Farao fitondra miady sy ny miaramilany dia natsipiny ao amin’ny ranomasina; ary ny manamboninahitra voafantina dia nilentika ao amin’ny Ranomasina Mena.

⁵Nanarona azy ireo ny lalina: Nilentika tany ambany indrindra tahaka ny vato izy ireo.

⁶Ny tananao ankavanana, TOMPO ô, dia malaza amin’ny hery; ny tananao ankavanana, TOMPO ô, no manorotoro ny fahavalo.

⁷Amin’ny halehiben’ny voninahitrao no andringananao izay mitsangana hanohitra Anao; alefanao ny fahatezeranao mirehitra ka mandevona azy toy ny mololo.

⁸Ny fofonain’ny vavoronao no nampivangongo ny rano; nijoro toy ny antontan-javatra ny rano mikoriana; nivaingana teo afovoan’ny ranomasina ny rano lalina.

⁹Hoy ny fahavalo: Hanenjika aho, hahatratra aho, hizara babo aho ka hameno ny tendako amin’izany, hotsoahiko ny sabatro ka hamongotra azy ny tanako.

¹⁰Ny fofonainao no nitsofanao dia nanarona azy ny ranomasina; nilentika tahaka ny firaka ao anatin’ny rano mahery izy.

¹¹TOMPO ô, iza no tahaka Anao amin’izay andriamanitra? Iza no tahaka Anao, izay ankalazaina amin’ny fahamasinana, deraina amin’ny fahatahorana, ary mpanao fahagagana?

¹²Natsotranao ny tananao ankavanana dia nitelina azy ireo ny tany.

¹³Tarihinao amin’ny famindramponao ny firenena izay navotanao; entinao amin’ny herinao izy ho any amin’ny fonenanao masina.

¹⁴Mandre ireo firenena ka raiki-tahotra; hovitra no mahazo ny mponina any Filistia;

¹⁵toran-kovitra ireo loham-pirenen’i Edoma; azon-korohoro ireo lehilahy maherin’i Moaba; reraka ny fon’izay rehetra monina any Kanana.

¹⁶Tonga aminy ny tahotra sy ny hovitra; noho ny halehiben’ny sandrinao dia mangina tahaka ny vato izy, mandra-pandalon’ny olonao, TOMPO ô, mandra-pandalon’ny olona izay nalainao ho Anao.

¹⁷Dia hampiditra azy Ianao ka hamponina azy ao amin’ny tendrombohitra lovanao, ao amin’ny fonenana nataonao hitoeranao, TOMPO ô, dia ao amin’ny fitoerana masina naorin’ny tananao, Tompo ô.

¹⁸NY TOMPO hanjaka mandrakizay doria.

¹⁹Fa niditra tao anaty ranomasina ny soavalin’i Farao sy ny kalesy fitondrany miady ary ny mpitaingin-tsoavaliny, ary NY TOMPO nampikatona ny ranomasina tamin’izy ireo; fa ny Zanak’Israely kosa dia nandeha tamin’ny tany maina teo afovoan’ny ranomasina.

²⁰Ary i Miriama mpaminanivavy, anabavin’i Arona, dia nitondra ny ampongatapaka teny an-tanany; ary nanaraka azy ny vehivavy rehetra nitondra ampongatapaka sady nandihy.

²¹Ary namaly azy ireo i Miriama hoe: Mihirà ho an’NY TOMPO fa avo indrindra Izy; ny soavaly sy ny mpitaingina azy dia nariany ao amin’ny ranomasina.

²²Ary nitondra ny Israely nifindra avy teo amoron’ny Ranomasina Mena i Mosesy ka nitarika azy ho any amin’ny tany efitra Sora, ary nandeha hateloana tany an-tany efitra ireo nefa tsy nahita rano.

²³Dia tonga tao Mara izy ireo nefa tsy nahasotro ny rano tao Mara satria nangidy ny rano tao. Izany no nanaovany ny anarany hoe Mara[6].

²⁴Ary nimonomonona tamin’i Mosesy ny olona ka niteny hoe: Inona no hosotroinay?

²⁵Dia nitaraina tamin’NY TOMPO i Mosesy ka nanehoan’NY TOMPO hazo iray; rehefa natsipiny tao anatin’ny rano io hazo io dia tonga mamy ny rano. Tao no nanomezan’NY TOMPO lalàna sy fitsipika ho azy ary tao no nizahany toetra azy

²⁶ka hoy Izy: Raha mazoto mihaino ny feon’NY TOMPO Andriamanitrao ianao ka manao izay mahitsy eo imasony sy mihaino ny lalànany ary mitandrina ny didiny rehetra dia tsy hisy hataoko aminao ireny aretina rehetra izay nataoko tamin’ny Ejiptiana ireny; fa Izaho no TOMPO izay manasitrana anao.

²⁷Dia tonga tao Elima izy ireo; tao no nisy loharano roa amby folo sy hazo daty fitopolo, dia nitoby teo anilan’ny rano izy.