Read La Bible en Malgache Eksodosy 17 Bible Online

Eksodosy 17 - La Bible en Malgache bible

Eksodosy 17

¹Ary nifindra ny fiangonan’ny Zanak’Israely manontolo ka niala tao amin’ny tany efitra Sina, ho any amin’izay toerana natoron’NY TOMPO hitobiany, ary nitoby tao Refidima nefa tsy nisy rano hosotroiny ny olona.

²Dia nila ady tamin’i Mosesy izy ireo ka niteny hoe: Omeo rano izahay hosotroinay. Fa hoy i Mosesy taminy: Nahoana no mila ady amiko ianareo? Nahoana no maka fanahy NY TOMPO ianareo?

³Teo no nangetaheta ny olona ka nimonomonona tamin’i Mosesy ary niteny hoe: Nahoana no noentinao niakatra niala tany Ejipta ho fatin’ny hetaheta izahay sy ny zanakay ary ny bibinay?

⁴Ary nitaraina tamin’NY TOMPO i Mosesy hoe: Inona no hataoko amin’ireto olona ireto? Mila hitora-bato ahy izy!

⁵Dia hoy NY TOMPO tamin’i Mosesy: Mandrosoa eo alohan’ny olona, ary mitondrà loholon’ny Israely hiaraka aminao; ary ny tehinao, ilay nikapohanao an’i Neily, dia ento eny an-tananao ka mandehana.

⁶Ary indro, hijoro eo anatrehanao eo ambonin’ny harambato any Horeba Aho dia hikapoka ny harambato ianao ka hisy rano hivoaka avy aminy hosotroin’ny olona. Dia nanatanteraka izany teo imason’ireo loholon’ny Israely i Mosesy.

⁷Ary ny anaran’izany tany izany dia nataony hoe: Masa sy Meriba[8], noho ny ady nataon’ny Zanak’Israely sy noho ny nakany fanahy NY TOMPO hoe: Eto aminay va NY TOMPO, sa tsia?

⁸Tonga kosa ny Amalekita ka niady tamin’ny Israelita tao Refidima.

⁹Dia hoy i Mosesy tamin’i Josoa: Mifidiana lehilahy ho antsika, dia mandehana ka miadia amin’ny Amalekita; fa hijoro eo an-tampon’ny havoana aho rahampitso ka hitana ny tehin’Andriamanitra etỳ an-tanako.

¹⁰Ary nanatanteraka izay nolazain’i Mosesy taminy i Josoa ka niady tamin’ny Amalekita. Fa i Mosesy sy i Arona ary i Hora kosa dia niakatra ho ao an-tampon’ny havoana.

¹¹Rehefa nasandratr’i Mosesy ny tanany dia nahery ny Israelita; fa rehefa nampidininy ny tanany dia nahery kosa ny Amalekita.

¹²Nefa vizana ny tanan’i Mosesy ka naka vato izy roa lahy, nataony teo ambanin’i Mosesy hipetrahany. I Arona sy i Hora dia nanohana ny tanany, koa ny iray dia teo an-daniny ary ny iray dia teo an-kilany; dia naharitra tsy ketraka intsony ny tanany mandra-pahafatin’ny masoandro.

¹³Dia nandresy ny Amalekita sy ny olony tamin’ny lelan-tsabatra i Josoa.

¹⁴Ary hoy NY TOMPO tamin’i Mosesy: Soraty ao amin’ny boky izany ho fahatsiarovana ka ambarao amin’i Josoa; fa hofoanako tsy ho eny ambanin’ny lanitra tokoa ny fahatsiarovana ny Amalekita.

¹⁵Dia nanorina alitara i Mosesy ka ny anarany nataony hoe: NY TOMPO Nisỳ[9].

¹⁶Hoy mantsy izy: NY TOMPO nianiana hoe: Satria nisy tanana niainga hamely ny sezafiandrianan’NY TOMPO dia tsy hitsahatra hatramin’izay taranany fara aman-dimby ny adin’NY TOMPO amin’ny Amalekita.