Read La Bible en Malgache Eksodosy 19 Bible Online

Eksodosy 19 - La Bible en Malgache bible

Eksodosy 19

¹Tamin’ny volana fahatelo taorianan’ny nialan’ny Zanak’Israely tany amin’ny tany Ejipta, tamin’izany fotoana izany indrindra, no nahatongavany tany amin’ny tany efitr’i Sinay.

²Rehefa nifindra niala tao Refidima izy ka tonga tany amin’ny tany efitr’i Sinay dia nitoby teo amin’ny tany efitra; nitoby teo, tandrifin’ny tendrombohitra ny Israely.

³Ary niakatra ho ao amin’Andriamanitra i Mosesy, dia niantso azy avy tao an-tendrombohitra NY TOMPO ka niteny hoe: Izao no holazainao amin’ny taranak’i Jakoba sy hambaranao amin’ny Zanak’Israely:

⁴Ianareo dia efa nahita izay nataoko tamin’ny Ejiptiana sy izay nitondrako anareo tamin’ny elatry ny voromahery ary ny nitondrako anareo ho atỳ Amiko.

⁵Ankehitriny, raha hihaino ny feoko tokoa ianareo ka hitandrina ny fanekeko, dia ho fananako sarobidy indrindra mihoatra noho ny firenena rehetra ianareo; fa Ahy ny tany rehetra.

⁶Dia ho fanjaka-mpisorona sy ho firenena masina ho Ahy ianareo. Ireo teny ireo no holazainao amin’ny Zanak’Israely.

⁷Dia nandeha i Mosesy ka nampiantso ny loholon’ny vahoaka, ary nalahany teo anatrehany ireo teny rehetra ireo, izay nandidian’NY TOMPO azy.

⁸Dia indray miredona namaly ny olona rehetra ka niteny hoe: Izay teny rehetra nolazain’NY TOMPO dia hotanterahinay. Ary noentin’i Mosesy tany amin’NY TOMPO kosa ny tenin’ny olona.

⁹Hoy indray NY TOMPO tamin’i Mosesy: Indro, hankeo aminao ao anatin’ny rahona maizina Aho, mba ho ren’ny olona Aho raha miteny aminao ka hino anao mandrakariva izy. Dia nambaran’i Mosesy tamin’NY TOMPO ny tenin’ny olona.

¹⁰Ary hoy NY TOMPO tamin’i Mosesy: Mandehana ho eny amin’ny olona ka manamasìna azy anio sy ampitso, ary ampanasao ny fitafiany izy ireo.

¹¹Aoka samy hiomana ho amin’ny andro fahatelo izy, fa amin’ny andro fahatelo no hidinan’NY TOMPO ho eo imason’ny olona rehetra eo an-tampon’ny tendrombohitra Sinay.

¹²Dia hanisy fefy manodidina ho an’ny olona ianao ka hiteny hoe: Mitandrema ianareo mba tsy hiakatra ao an-tendrombohitra na hikasika ny sisiny akory aza. Fa na iza na iza mikasika ny tendrombohitra dia hovonoina ho faty.

¹³Tsy hisy tanana hikasika azy fa hotoraham-bato tokoa, na hotifirina tsipìka tokoa, na biby na olona, ary tsy mba hovelomina. Rehefa manao feo lavareny ny anjomara, vao hiakatra ho ao an-tendrombohitra ny olona.

¹⁴Dia nidina avy tao an-tendrombohitra i Mosesy ka nankeny amin’ny olona; ary nanamasina azy izy ka samy nanasa ny fitafiany ny olona.

¹⁵Hoy koa izy tamin’ny olona: Miomàna ianareo ho amin’ny andro fahatelo; aza manakaiky vehivavy akory.

¹⁶Tamin’ny marainan’ny andro fahatelo dia nisy kotrokorana sy tselatra ary rahona matevina teo amin’ny tendrombohitra; nisy koa feon’anjomara mafy dia mafy ka toran-kovitra ny olona rehetra izay teo amin’ny toby.

¹⁷Ary nitondra ny olona niainga avy teo an-toby i Mosesy mba hihaona amin’Andriamanitra; nijanona teo am-pototry ny tendrombohitra izy ireo.

¹⁸Ary ny tendrombohitra Sinay manontolo dia nivoa-tsetroka satria NY TOMPO nidina teo amboniny tao anaty afo; niakatra tahaka ny setroky ny lafaoro lehibe ny setroka, ary nihorohoro mafy ny tendrombohitra Sinay manontolo.

¹⁹Nihamafy hatrany ny feon’ny anjomara sady nitatatata. Dia niteny i Mosesy ary Andriamanitra namaly azy tao anatin’ny kotroka.

²⁰Nidina nankeo an-tendrombohitra Sinay, teo an-tampon’ny tendrombohitra NY TOMPO; ary niantso an’i Mosesy hankeo an-tampon’ny tendrombohitra NY TOMPO, dia niakatra i Mosesy.

²¹Ary hoy NY TOMPO tamin’i Mosesy: Midìna dia ampitandremo ny olona, fandrao hisisika hankao amin’NY TOMPO izy mba hijery ka ho betsaka ny maty.

²²Ary aoka koa ny mpisorona izay manakaiky NY TOMPO hanamasina ny tenany, fandrao hamely azy tampoka NY TOMPO.

²³Dia hoy i Mosesy tamin’NY TOMPO: Tsy afaka miakatra ho eto amin’ny tendrombohitra Sinay ny olona, fa Ianao nandidy anay hoe: Fefeo ny tendrombohitra ka hamasino.

²⁴Ary hoy NY TOMPO taminy: Mandehana midina; avy eo dia miakara ianao ka ento miaraka aminao i Arona; fa ny mpisorona sy ny olona kosa dia aza avela hisisika hiakatra ho ao amin’NY TOMPO, fandrao handringana azy ireo Izy!

²⁵Ary nidina nankeny amin’ny olona i Mosesy ka niteny taminy.