Read La Bible en Malgache Eksodosy 20 Bible Online

Eksodosy 20 - La Bible en Malgache bible

Eksodosy 20

¹Dia nilaza izao teny rehetra izao Andriamanitra:

²Izaho no TOMPO Andriamanitrao izay nitondra anao nivoaka avy tany amin’ny tany Ejipta, tamin’ny trano nanandevozana.

³Aza manana andriamanitra hafa fa Izaho ihany.

⁴Aza manao sarin-javatra voasokitra, na izay mety ho endriky ny zavatra izay eny amin’ny lanitra ambony, na izay etỳ amin’ny tany ambany, na izay any amin’ny rano ambanin’ny tany.

⁵Aza miankohoka eo anatrehany ary aza manompo azy; fa Izaho, TOMPO Andriamanitrao, dia Andriamanitra saro-piaro ka mamaly ny heloky ny ray amin’ny zanaka hatramin’ny zafiafy sy ny zafindohalika, dia amin’izay mankahala Ahy,

⁶nefa mamindra fo kosa amin’ny olona arivo mandimby izay tia Ahy ka mitandrina ny didiko.

⁷Aza manonona foana ny anaran’NY TOMPO Andriamanitrao, fa tsy hataon’NY TOMPO ho tsy manan-tsiny izay manonona foana ny anarany.

⁸Mahatsiarova ny andro Sabata hanamasina azy.

⁹Henemana no hiasanao sy hanaovanao ny raharahanao rehetra.

¹⁰Fa Sabatan’NY TOMPO Andriamanitrao ny andro fahafito; koa aza manao raharaha akory ianao amin’izany, na ny zanakao lahy, na ny zanakao vavy, na ny mpanompolahinao, na ny mpanompovavinao, na ny biby fiompinao, na ny vahininao izay tafiditra eo am-bavahadinao.

¹¹Fa henemana no nanaovan’NY TOMPO ny lanitra sy ny tany sy ny ranomasina mbamin’izay rehetra ao aminy, dia nitsahatra Izy tamin’ny andro fahafito. Izany no nitahian’NY TOMPO ny andro Sabata sy nanamasinany azy.

¹²Manajà ny rainao sy ny reninao mba ho maro andro ianao eo amin’ny tany izay omen’NY TOMPO Andriamanitrao anao.

¹³Aza mamono olona.

¹⁴Aza mijangajanga.

¹⁵Aza mangalatra.

¹⁶Aza mety ho vavolombelona mandainga hanameloka ny namanao.

¹⁷Aza mitsiriritra ny tranon’ny namanao; aza mitsiriritra ny vadin’ny namanao, na ny mpanompolahiny, na ny mpanompovaviny, na ny ombiny, na ny borikiny, na izay mety ho an’ny namanao.

¹⁸Ary nandre ny kotroka sy ny feon’ny anjomara ary nahita ny tselatra sy ny tendrombohitra nivoa-tsetroka ny olona rehetra, koa nony nahita izany izy ireo dia toran-kovitra sady nijanona terỳ lavitra terỳ.

¹⁹Dia hoy izy ireo tamin’i Mosesy: Aoka ihany ianao no hiteny aminay dia hihaino izahay; fa aoka tsy Andriamanitra no hiteny aminay fandrao maty izahay.

²⁰Dia hoy i Mosesy tamin’ny olona: Aza matahotra; fa tonga Andriamanitra mba hizaha toetra anareo, ary mba ho eo anoloanareo ny fahatahorana Azy, mba tsy hanotanareo.

²¹Dia nijanona teny lavitra teny ny olona, fa i Mosesy kosa dia nanakaiky ny haizim-pito izay nitoeran’Andriamanitra.

²²Ary hoy NY TOMPO tamin’i Mosesy: Izao no holazainao amin’ny Zanak’Israely: Ianareo dia efa nahita fa avy tany an-danitra no nitenenako taminareo.

²³Aza manao andriamanitra volafotsy ho fanampiko, ary aza manao andriamanitra volamena ho anareo.

²⁴Alitara tany no hataonao ho Ahy ka eo amboniny no hanoloranao ny fanatitra doranao manontolo sy ny fanati-pihavananao, dia ny ondry aman’osinao sy ny ombinao. Eo amin’ny toerana rehetra izay ampahatsiarovako ny anarako no hanatonako anao sy hitahiako anao.

²⁵Ary raha alitara vato no hataonao ho Ahy dia aza atao amin’ny vato voapaika; satria raha manainga ny fandrakao eo aminy ianao dia handoto azy.

²⁶Ary aza asiana ambaratonga hiakaranao ho eo amin’ny alitarako mba tsy ho hita eo ny fitanjahanao.