Read La Bible en Malgache Eksodosy 23 Bible Online

Eksodosy 23 - La Bible en Malgache bible

Eksodosy 23

¹Aza manangan-tsaho foana. Aza mifandray tanana amin’ny ratsy fanahy ho vavolombelona mampidi-doza.

²Aza manaraka ny maro hanao ratsy; ary aza mety hanao vavolombelona amin’ny adin’olona ka hivily hanaraka ny maro hamadika ny rariny.

³Aza miangatra amin’ny mahantra amin’ny adiny eo amin’ny fitsarana.

⁴Raha hitanao diso lalana ny ombin’ny fahavalonao, na ny borikiny, dia averenonao any aminy izany.

⁵Raha hitanao lavo voatsindrin’ny entana ny borikin’izay mankahala anao dia aza malaina hamonjy azy fa ampionao izy hamaha izany.

⁶Aza mamily izay rariny ananan’ny mahantra eo aminao, amin’ny adiny eo amin’ny fitsarana.

⁷Manalavira izay teny lainga, ary aza mamono ny tsy manan-tsiny sy izay marina ianao; fa tsy hanamarina ny meloka Aho.

⁸Aza mandray kolikoly, fa ny kolikoly dia mahajamba ny mason’ny mahiratra sy mamadika ny tenin’ny marina.

⁹Aza mampahory vahiny, fa ianareo dia mahalala ny toe-pon’ny vahiny, satria efa mba vahiny tany amin’ny tany Ejipta ihany ianareo.

¹⁰Enin-taona no hamafazanao amin’ny taninao sy hanangonanao ny vokatra;

¹¹fa amin’ny taona fahafito kosa dia hatsahatrao tsy hovolena izany mba hisy hohanin’ny mahantra ao amin’ny firenenao; ary izay sisan’ireo kosa dia mba hohanin’ny biby any an-tsaha. Toy izany koa no hataonao amin’ny tanim-boalobokao sy amin’ny tanin’olivanao.

¹²Henemana no hanaovanao ny raharahanao, fa amin’ny andro fahafito dia hitsahatra ianao mba hialan’ny ombinao sy ny borikinao sasatra, ary mba hakan’ny zanaky ny mpanompovavinao sy ny vahiny aina.

¹³Tandremo izay rehetra nolazaiko taminareo ka aza manonona izay anaran’andriamanitra hafa akory ianareo; aza avela ho re avy amin’ny vavanao izany.

¹⁴Intelo isan-taona no hanaovanao andro firavoravoana ho Ahy.

¹⁵Tandremo ny andro firavoravoana fihinanana ny mofo tsy misy masirasira; hafitoana no hihinananao ny mofo tsy misy masirasira, araka izay nampanaoviko anao amin’ny fotoanandro amin’ny volana Abiba*, fa tamin’izany no nivoahanao avy tany Ejipta; ary aoka tsy hisy hiseho amin’ny tanam-polo eo anatrehako, tsy mitondra fanatitra.

¹⁶Tandremo koa ny andro firavoravoana amin’ny fijinjana ny voaloham-bokatry ny asanao izay nafafinao tany an-tsaha, sy ny andro firavoravoana amin’ny fanangonana amin’ny faran’ny taona, raha manangona ny vokatry ny asanao avy any an-tsaha ianao.

¹⁷Intelo isan-taona no hisehoan’ny lehilahy rehetra aminareo eo anatrehan’NY TOMPO Andriamanitra.

¹⁸Aza manolotra ny ran’ny zavatra vonoina hatao fanatitra ho Ahy ianao raha mbola misy masirasira ao aminao; aza avela ho tra-maraina ny jaboran’ny zavatra vonoina amin’ny andro firavoravoana ho Ahy.

¹⁹Ny santatry ny voaloham-bokatry ny taninao dia hoentinao ao amin’ny tranon’NY TOMPO Andriamanitrao. Aza mahandro zanak’osy amin’ny rononon-dreniny[12].

²⁰Indro Aho maniraka Anjely eo alohanao hiaro anao eny an-dalana sady hitondra anao any amin’ny toerana izay namboariko.

²¹Mitandrema eo anatrehany ka mihainoa ny feony ary aza manao izay mahatezitra Azy; fa tsy hamela ny fahotanareo Izy satria ny anarako no ao Aminy.

²²Fa raha mihaino ny feony tokoa ianao ka manao izay rehetra lazaiko dia ho fahavalon’ny fahavalonao sy ho rafin’ny rafinao Aho.

²³Fa handeha eo alohanao ny Anjeliko ka hitondra anao any amin’ny Amorita, ny Hetita, ny Perizita, ny Kananita, ny Hivita ary ny Jebosita, dia hofongorako ireny.

²⁴Aza miankohoka eo anatrehan’ny andriamanitr’ireny ianao, na manompo azy, na manao toy ny fanaony; fa aringano tokoa izy ary poteho tanteraka ireo tsangambaton-tsampiny.

²⁵Fa manompoa NY TOMPO Andriamanitrareo dia hitahy ny haninao sy ny ranonao Izy, ary hesoriko aminao ny aretina.

²⁶Tsy hisy ho afa-jaza na ho momba ao amin’ny taninao. Hataoko feno ny isan’ny andronao.

²⁷Hampandehaniko eo anoloanao ny fahatahorana Ahy ka hampifanaritahiko ny firenena rehetra izay alehanao ary hampandosiriko eo anoloanao ny fahavalonao rehetra.

²⁸Hampandehaniko eo anoloanao ny fanenitra handroaka ny Hivita sy ny Kananita ary ny Hetita eo alohanao.

²⁹Tsy handroaka azy eo alohanao amin’ny taona iray Aho, fandrao ho lao ny tany ka hihamaro ny bibidia hamely anao.

³⁰Tsikelikely no handroahako azy eo alohanao mandra-pahatonganao ho maro ka handova ny tany.

³¹Hataoko hatrany amin’ny Ranomasina Mena ka hatrany amin’ny Ranomasin’ny Filistina ny sisin’ny taninao, ary hatrany amin’ny tany efitra ka hatrany amin’ny ony Eofrata; fa hanolotra ny mponina amin’ny tany ho eo an-tananareo Aho ary handroaka azy eo alohanao ianao.

³²Aza manao fanekena aminy na amin’ny andriamaniny.

³³Tsy honina eo amin’ny taninao ireny, fandrao hampanota anao Amiko izy raha manompo ny andriamaniny ianao ka ho fandrika ho anao izany.