Read La Bible en Malgache Eksodosy 24 Bible Online

Eksodosy 24 - La Bible en Malgache bible

Eksodosy 24

¹Ary hoy Izy tamin’i Mosesy: Miakara any amin’NY TOMPO ianao sy i Arona, i Nadaba, i Abiho ary fitopolo lahy amin’ny loholon’ny Israely ka miankohofa eny lavitra eny ianareo.

²I Mosesy irery no hanakaiky NY TOMPO, fa ireo hafa dia tsy hanakaiky, ary ny olona koa dia tsy hiakatra miaraka aminy.

³Dia tonga nanambara tamin’ny olona ny teny rehetra izay nolazain’NY TOMPO sy ny fitsipika rehetra i Mosesy. Ary niara-niredona namaly ny olona rehetra hoe: Ny teny rehetra izay nolazain’NY TOMPO dia hotanterahinay.

⁴Ary nanoratra ny teny rehetra nolazain’NY TOMPO i Mosesy, dia nifoha vao maraina izy ka nanorina alitara teo am-pototry ny tendrombohitra sy tsangambato roa amby folo, araka ireo fokon’ny Israely roa amby folo.

⁵Dia naniraka ny zatovo teo amin’ny Zanak’Israely izy ka nitondra fanatitra dorana manontolo ireo sady namono vantotra ombilahy hatao fanati-pihavanana ho an’NY TOMPO.

⁶Ary nalain’i Mosesy ny antsasaky ny ra ka nataony tao anaty lovia, ary ny antsasaky ny ra kosa dia nafafiny teo amin’ny alitara.

⁷Dia naka ny bokin’ny fanekena izy ka namaky azy teo anatrehan’ny olona. Ary hoy ny olona: Izay rehetra nolazain’NY TOMPO dia hotanterahinay sy hekenay.

⁸Ary nalain’i Mosesy ny ra ka nafafiny tamin’ny olona, sady hoy izy: Indro ny ran’ny fanekena izay nataon’NY TOMPO taminareo ny amin’izany teny rehetra izany.

⁹Dia niakatra i Mosesy, i Arona, i Nadaba, i Abiho ary fitopolo lahy tamin’ny loholon’ny Israely.

¹⁰Dia nahita ny Andriamanitry ny Israely izy ireo; ny teo ambanin’ny tongony dia toy ny fanganohanon’ny safira vita rarivato, toy ny lanitra mihitsy ny famirapiratany.

¹¹Nefa tsy nanatsotra ny tanany tamin’ireo lehiben’ny Zanak’Israely Izy, dia nahita an’Andriamanitra izy ireo ary nihinana sy nisotro.

¹²Ary hoy NY TOMPO tamin’i Mosesy: Miakara eto Amiko eto an-tendrombohitra ka mitoera eto dia homeko anao ny vato fisaka izay misy ny lalàna sy ny didy izay nosoratako mba hampianarina azy ireo.

¹³Dia niainga i Mosesy sy i Josoa mpanompony ka i Mosesy dia niakatra nankao amin’ny tendrombohitr’Andriamanitra.

¹⁴Ary hoy izy tamin’ny loholona: Andraso eto izahay mandra-piverinay eto aminareo. Indro i Arona sy i Hora dia eto aminareo; koa raha misy olona manana ady, aoka hankeo amin’izy roalahy izy.

¹⁵Dia niakatra tao amin’ny tendrombohitra i Mosesy, ary ny rahona dia nanarona ny tendrombohitra.

¹⁶Ary ny voninahitry NY TOMPO nitoetra teo ambonin’ny tendrombohitra Sinay, ary ny rahona dia nanarona azy henemana. Fa tamin’ny andro fahafito Izy no niantso an’i Mosesy teo afovoan’ny rahona.

¹⁷Ary tahaka ny afo mandevona no fijery ny voninahitry NY TOMPO teo an-tampon’ny tendrombohitra teo imason’ny Zanak’Israely.

¹⁸Dia niditra tao afovoan’ny rahona i Mosesy ka niakatra nankao amin’ny tendrombohitra. Ary nitoetra tao amin’ny tendrombohitra efapolo andro sy efapolo alina izy.