Read La Bible en Malgache Eksodosy 25 Bible Online

Eksodosy 25 - La Bible en Malgache bible

Eksodosy 25

¹Ary NY TOMPO niteny tamin’i Mosesy indray hoe:

²Mitenena amin’ny Zanak’Israely mba hitondra anjara fanomezana ho Ahy izy; avy amin’ny olona rehetra izay entanin’ny fony no handraisanareo izay anjara atolony ho Ahy.

³Ary izao no anjara fanomezana izay horaisinareo avy aminy: Volamena, volafotsy, varahina,

⁴lamba manga, volomparasy, jaky, ary lamba rongony fotsy madinika, volon’osy,

⁵hoditr’ondrilahy efa voaloko mena, hoditra trozona, hazo akasia,

⁶diloilo hatao fanazavana, zavamanitra ho amin’ny diloilo fanosorana sy ho ditin-kazo mani-pofona,

⁷vato berila ary vato alatsaka an-tranontranony amin’ny efoda* sy amin’ny saron-tratra.

⁸Asaivo manao fitoerana masina ho Ahy izy dia honina eo aminy Aho.

⁹Araka izay rehetra hasehoko aminao no ho endriky ny tabernakely* sy ny fanaka rehetra momba azy, dia araka izany no hanaovanao azy.

¹⁰Ary ampanaovy vata amin’ny hazo akasia izy: Roa hakiho* sy sasany ny lavany, iray hakiho sy sasany ny sakany ary iray hakiho sy sasany ny haavony.

¹¹Petaho takelaka volamena tsy miharo ilay izy. Samy hopetahanao takelaka volamena avokoa ny atiny sy ny ivelany, ary asio sisiny volamena manodidina eo amboniny.

¹²Ary mandrendreha mason-drojo volamena efatra hatao aminy ka ataovy eo amin’ny zorony efatra, koa mason-drojo volamena roa eo amin’ny lafiny iray ary mason-drojo volamena roa eo amin’ny lafiny iray hafa.

¹³Manaova bao hazo akasia ka petaho takelaka volamena

¹⁴dia ampidiro ho eo amin’ny mason-drojo volamena eo amin’ny lafin’ny vata ny bao hilanjana azy.

¹⁵Ao amin’ny mason-drojon’ny vata no hitoeran’ny bao ary tsy hesorina eo izy.

¹⁶Ataovy ao anatin’ny vata ny Vavolombelona izay homeko anao.

¹⁷Avy eo dia manaova rakotra fanaovam-panavotana amin’ny volamena tsy miharo: Roa hakiho sy sasany ny lavany ary iray hakiho sy sasany ny sakany.

¹⁸Manaova koa kerobima* volamena roa; vongana iray amin’ny rakotra fanaovam-panavotana, eo amin’ny sakany roa, no hanaovanao azy roa.

¹⁹Ny kerobima iray dia ataovy amin’ny sakany iray ary ny kerobima iray kosa dia amin’ny sakany iray: Vongana iray amin’ny rakotra fanaovam-panavotana no hanaovanareo ny kerobima roa, eo amin’ny sakany roa.

²⁰Ary aoka ny elatry ny kerobima hivelatra eo ambony mba hanaloka ny rakotra fanaovam-panavotana; ary hifanatrika ny tavany sady hanatrika ny rakotra fanaovam-panavotana koa.

²¹Dia apetraho eo ambonin’ny vata ny rakotra fanaovam-panavotana; ao anatin’ny vata no asio ny Vavolombelona izay homeko anao.

²²Eo no hihaona aminao Aho ka avy eo ambonin’ny rakotra fanaovam-panavotana no hitenenako aminao, eo anelanelan’ny kerobima roa izay eo ambonin’ny vata misy ny Vavolombelona; eo no hambarako anao izay rehetra hampanaoviko holazainao amin’ny Zanak’Israely.

²³Manaova latabatra hazo akasia: Roa hakiho* ny lavany, iray hakiho ny sakany ary iray hakiho sy sasany ny haavony.

²⁴Petaho takelaka volamena tsy miharo izany sady asio sisiny volamena ny manodidina azy.

²⁵Dia asio tranony manodidina azy, felatanana iray, ary asio sisiny volamena manodidina.

²⁶Ary manaova mason-drojo volamena efatra hatao aminy ka ataovy eo amin’ny zorony efatra izay eo amin’ny tongony efatra ireo:

²⁷Eo akaikin’ny tranony no hasiana ny mason-drojo volamena ho fitoeran’ny bao ilanjana ny latabatra.

²⁸Hazo akasia no anaovy ny bao ka petaho takelaka volamena; amin’ireo no hilanjana ny latabatra.

²⁹Ary ataovy ny loviany sy ny loviany kely ary ny fitoeran-divainy sy ny kapoakany ho fandrarahana fanatitra; volamena tsy miharo no hanaovanao ireo.

³⁰Asio mofo atao fanatitra eo ambonin’ny latabatra, ho eo anatrehako mandrakariva.

³¹Manaova koa fitoeran-jiro volamena tsy miharo; vongana iray no hanefenao ny fitoeran-jiro. Vongana iray ihany no hanefenao ny faladiany, ny tahony, ny foto-boniny, ny bokony ary ny voniny.

³²Hisy rantsany enina misampana eo an-daniny roa ka rantsany telo amin’ny fitoeran-jiro no eo an-daniny iray ary rantsany telo amin’ny fitoeran-jiro no eo an-daniny iray hafa.

³³Hisy foto-boniny telo, hatao tahaka ny vonin’ny amanda, mbamin’ny bokony sy ny voniny eo amin’ny rantsany iray; ary foto-boniny telo koa no hatao tahaka ny vonin’ny amanda, mbamin’ny bokony sy ny voniny eo amin’ny rantsany iray hafa; dia toy izany avokoa amin’ny rantsany enina amin’ny fitoeran-jiro.

³⁴Ary eo amin’ny fitoeran-jiro dia hisy foto-boniny efatra, hatao tahaka ny vonin’ny amanda, miaraka amin’ny bokony sy ny voniny,

³⁵bokony iray no eo ambanin’ny rantsany roa sady miray aminy, bokony iray koa no eo ambanin’ny rantsany roa sady miray aminy ary bokony iray koa no eo ambanin’ny rantsany roa sady miray aminy; izany hoe amin’ny rantsany enina izay miray amin’ny fitoeran-jiro.

³⁶Hiray avokoa ny bokony sy ny rantsany, sady ho voatefy amin’ny vongana volamena tokana tsy miharo izy rehetra.

³⁷Ary ataovy ny jirony fito ka apetaho eo amin’ny fitoeran-jiro dia ampireheto eo aminy ireo mba hanazava ny anoloany.

³⁸Ary ny hetin-jirony sy ny fitoeran-davenon-jirony dia ataovy volamena tsy miharo.

³⁹Volamena tsy miharo, talenta* iray, no hanaovana azy mbamin’ireny fanaka rehetra ireny.

⁴⁰Aoka mba hataonao araka ny endriny izay naseho taminao tao an-tendrombohitra izany.