Read La Bible en Malgache Eksodosy 26 Bible Online

Eksodosy 26 - La Bible en Malgache bible

Eksodosy 26

¹Ary ny tabernakely* dia hataonao ambainy folo amin’ny lamba rongony fotsy madinika voahasina, lamba manga, volomparasy, jaky; kerobima*, asan’ny mpanenona mahay, no hataonao sorany.

²Ny halavan’ny ambainy iray dia valo amby roapolo hakiho*; ny lambanan’ny ambainy iray koa dia efatra hakiho; hitovy refy ny ambainy rehetra.

³Ambainy dimy no havitrana ho iray; ary ambainy dimy hafa koa dia havitrana ho iray.

⁴Manaova tadivavarana manga ho eo an-tsisin’ny ambainy iray, eo an-tsisin’ny iray efa voavitrana; manaova toy izany koa amin’ny ambainy farany, eo an-tsisin’ny iray efa voavitrana koa.

⁵Tadivavarana dimampolo no hataonao eo amin’ny ambainy iray ary tadivavarana dimampolo koa no hataonao eo amin’ny sisin’ny ambainy amin’ny iray efa voavitrana; koa aoka hifanandrify ny tadivavarana.

⁶Manaova farango volamena dimampolo ka akambano amin’ny farango ny ambainy, dia voakambana ho iray ny tabernakely.

⁷Ary manaova koa ambainy amin’ny volon’osy ho lay handrakofana ny tabernakely; iraika amby folo ny ambainy hataonao.

⁸Ny halavan’ny ambainy iray dia telopolo hakiho ary ny lambanan’ny ambainy iray hafa dia efatra hakiho; hitovy refy ny ambainy iraika amby folo.

⁹Avitrano hikambana ny ambainy dimy ary avitranao hikambana koa ny ambainy enina. Aforeto ny ambainy fahenina amin’ny sakan’ny lay eo anoloana.

¹⁰Manaova tadivavarana dimampolo eo an-tsisin’ny ambainy iray izay farany amin’ny efa voavitrana, ary tadivavarana dimampolo koa ho eo an-tsisin’ny ambainy iray amin’ny iray hafa izay efa voavitrana.

¹¹Manaova farango varahina dimampolo ka ampidiro ho eo amin’ny tadivavarana ireo farango ireo ary akambano ny lay, dia ho iray ihany izany.

¹²Ary izay mihoatra amin’ny ambain’ny lay dia avelao hiraviravy eo ivohon’ny tabernakely ny antsasaky ny ambainy izay mihoatra.

¹³Ary ny iray hakiho avy eo amin’ny lohany roa amin’ny lamba, izay mihoatra amin’ny halavan’ny ambain’ny lay, dia avelao hiraviravy eo amin’ny lafibeny roa amin’ny tabernakely mba handrakotra azy.

¹⁴Manaova koa rakotra ho an’ny lay, ataovy amin’ny hoditr’ondrilahy efa voaloko mena, ary manaova sarony amin’ny hoditra trozona ho eo amboniny.

¹⁵Manaova hazofisaka akasia hatsangana amin’ny tabernakely.

¹⁶Folo hakiho ny haavon’ny hazofisaka iray ary iray hakiho sy sasany ny sakan’ny hazofisaka hafa.

¹⁷Lahiny roa no ho amin’ny hazofisaka iray, misy hasiana izay hikambanany; toy izany no hanaovanao ny hazofisaka rehetra amin’ny tabernakely.

¹⁸Ataovy ny hazofisaka ho amin’ny tabernakely, hazofisaka roapolo ho eo amin’ny lafiny atsimo.

¹⁹Manaova koa faladia volafotsy efapolo ho eo ambanin’ny hazofisaka roapolo, faladia roa avy ho ambanin’ny hazofisaka tsirairay hiorenan’ny lahiny roa.

²⁰Manaova hazofisaka roapolo ho eo amin’ny lafiny faharoa amin’ny tabernakely, dia ny lafiny avaratra.

²¹Manaova faladia volafotsy efapolo, faladia roa avy ho ambanin’ny hazofisaka tsirairay.

²²Ary ny lafiny andrefana amin’ny tabernakely, izay ao aorianany, dia hanaovanao hazofisaka enina.

²³Hazofisaka roa no hataonao eo amin’ny zoron’ny tabernakely amin’ny lafiny aoriana.

²⁴Hakambana ho iray hatrany ambany izy ka hiray tsara hatrany an-tampony, eo amin’ny mason-drojo tokana; ho toy izany avokoa izy roa izay ho eo amin’ny zorony roa.

²⁵Aoka hisy hazofisaka valo sy ny faladiany volafotsy, dia faladia enina amby folo: Faladia roa avy ho ambanin’ny hazofisaka tsirairay.

²⁶Manaova koa barany amin’ny hazo akasia; dimy ho amin’ireo hazofisaka amin’ny lafiny iray amin’ny tabernakely,

²⁷barany dimy ho amin’ireo hazofisaka amin’ny lafiny iray koa amin’ny tabernakely ary barany dimy ho amin’ireo hazofisaka amin’ny lafiny andrefana izay ao aorianany.

²⁸Ary ny barany afovoany, izay eo afovoan’ny hazofisaka, dia hahatratra ny farany roa.

²⁹Ny hazofisaka dia hopetahanao takelaka volamena, ary hataonao volamena koa ireo mason-drojo eo aminy, izay hitoeran’ny barany; petaho takelaka volamena koa ny barany.

³⁰Atsangano ny tabernakely, araka ilay endriny naseho taminao tao an-tendrombohitra.

³¹Manaova efitra lamba manga, volomparasy, jaky ary lamba rongony fotsy madinika voatenona; kerobima, asan’ny mpanenona mahay, no hataonao sorany.

³²Ary ahantòny amin’ny andry hazo akasia efatra izay voapetaka takelaka volamena izany; ho volamena koa ny fihantonany, ary eo amin’ny faladia volafotsy efatra no hiorenany.

³³Ary ny efitra lamba dia ataovy eo ambanin’ireo farango. Dia ampidiro ao anatin’ny efitra lamba ny vata misy ny Vavolombelona; ary ho anareo dia ny efitra lamba no hampisaraka ny fitoerana masina sy ny fitoerana masina indrindra.

³⁴Ataovy eo ambonin’ny vata misy ny Vavolombelona, ao amin’ny fitoerana masina indrindra, ny rakotra fanaovam-panavotana.

³⁵Apetraho eo ivelan’ny efitra ny latabatra ka ny fitoeran-jiro ho tandrifin’ny latabatra amin’ny lafiny atsimo amin’ny tabernakely; ary ny latabatra dia ataovy eo amin’ny lafiny avaratra.

³⁶Manaova koa varavarana lamba eo amin’ny lay, manga, volomparasy, jaky, ary rongony fotsy madinika voatenona, asan’ny mahay tenona samihafa soratra.

³⁷Ary manaova andry hazo akasia dimy ho amin’ny varavarana lamba ka petaho takelaka volamena ireny; ho volamena koa ny fihantonany, ary mandrendreha faladia varahina dimy hiorenany.