Read La Bible en Malgache Eksodosy 27 Bible Online

Eksodosy 27 - La Bible en Malgache bible

Eksodosy 27

¹Ataovy amin’ny hazo akasia ny alitara: Dimy hakiho* avy ny lafiny efatra, izany hoe: Ho efamira, ary telo hakiho ny haavony.

²Amboary ataovy miray aminy ny tandroka* eo amin’ny zorony efatra ary petaho takelaka varahina ireo.

³Manaova koveta fandraofan-davenona handraofana ny lavenony ary amboary ny sotron’afony sy ny lovia fandraofany ary ny fitrebiny sy ny fitondrana afony; varahina no hanaovanao ny fanaka rehetra momba azy.

⁴Dia manaova makarakara varahina tahaka ny harato ho eo aminy; ary manamboara mason-drojo varahina efatra hatao eo ambonin’ny harato eo amin’ny zorony efatra.

⁵Ataovy eo ambanin’ny sisin’ny alitara hatreny ambaniny izany ka ny makarakara dia hampisasaka ny haavon’ny alitara.

⁶Manaova bao ho amin’ny alitara, bao amin’ny hazo akasia, ka petaho takelaka varahina.

⁷Ampidiro eo amin’ny mason-drojo ny bao; ny bao dia ho eo amin’ny lafiny roa amin’ny alitara rehefa lanjaina izy.

⁸Hazofisaka no arafeto ho alitara ka ataovy poakaty izany; araka izay naseho taminao tao an-tendrombohitra no hanaovana azy.

⁹Ataovy koa ny kianjan’ny tabernakely*: Eo amin’ny lafiny atsimo dia hisy fefy lamba rongony fotsy madinika voatenona ho amin’ny kianja. Zato hakiho* ny halavany amin’ny lafiny iray;

¹⁰ho roapolo ny andriny ary ho roapolo ny faladiany varahina; ho volafotsy ny fihantonana amin’ny andriny sy ny farango hitohizany.

¹¹Ho tahaka izany koa eo amin’ny lafiny avaratra, amin’ny lavany dia hisy fefy lamba, zato hakiho ny halavany, ho roapolo ny andriny, ho roapolo ny faladiany varahina; ho volafotsy ny fihantonana amin’ireo andriny sy ny farango hitohizany.

¹²Hisy fefy lamba dimampolo hakiho amin’ny sakan’ny kianja amin’ny lafiny andrefana; ho folo ny andriny ary ho folo ny faladiany.

¹³Ho dimampolo hakiho ny sakan’ny kianja eo amin’ny lafiny atsinanana.

¹⁴Ary hisy fefy lamba dimy amby folo hakiho amin’ny sakany iray; ho telo ny andriny ary ho telo ny faladiany.

¹⁵Ary hisy fefy lamba dimy amby folo hakiho amin’ny sakany iray koa, ho telo ny andriny ary ho telo ny faladiany.

¹⁶Eo amin’ny vavahadin’ny kianja dia hasiana vavahady sy lamba roapolo hakiho, manga, volomparasy, jaky ary lamba rongony fotsy madinika voatenona, asan’ny mahay tenona samihafa soratra; ho efatra ny andriny ary ho efatra ny faladiany.

¹⁷Samy hisy farango volafotsy hitohizany ny andry rehetra amin’ny kianja manodidina; ho volafotsy ny fihantonany ary ho varahina ny faladiany.

¹⁸Ny lavan’ny kianja dia ho zato hakiho, ny sakany dia ho dimampolo hakiho ary ny haavony dia ho dimy hakiho ka hatao amin’ny lamba rongony fotsy madinika voatenona izany, ary ho varahina ny faladiany.

¹⁹Ho varahina avokoa ny fiasana rehetra momba ny tabernakely; ary ny tsatòkan-day rehetra momba azy sy ny tsatòkan-dain’ny kianja dia ho varahina koa.

²⁰Asaivo mitondra diloilon’oliva tsy miharo ho eo aminao ny Zanak’Israely, diloilo nofiazana, hatao fanazavana, mba hisy jiro mirehitra tsy miato.

²¹Ao anatin’ny tranolay fihaonana*, dia eo ivelan’ny efitra lamba izay manakona ny Vavolombelona, no handaharan’i Arona sy ny zanany azy ho eo anatrehan’NY TOMPO hatramin’ny hariva ka hatramin’ny maraina; ho lalàna maharitra amin’ny Zanak’Israely izany hatramin’ny taranany fara aman-dimby.