Read La Bible en Malgache Eksodosy 28 Bible Online

Eksodosy 28 - La Bible en Malgache bible

Eksodosy 28

¹Ampanatony anao avy eo anivon’ny Zanak’Israely i Arona rahalahinao mbamin’ireo zanany mba hanao fisoronana ho Ahy izy, dia i Arona, i Nadaba, i Abiho, i Eleazara ary Itamara, zanak’i Arona.

²Manaova fitafiana masina ho an’i Arona rahalahinao ho mariky ny voninahitra sy ny fahamboniany.

³Koa mitenena amin’izay manan-talenta, izay nofenoiko fanahim-pahendrena, mba hanao ny fitafian’i Arona hanamasinana azy mba hanaovany fisoronana ho Ahy.

⁴Izao no fitafiana izay hataon’ireo: Saron-tratra, efoda*, akanjobe, akanjo lava tenom-boaroy, fehiloha ary fehikibo. Hanao fitafiana masina ho an’i Arona rahalahinao sy ho an’ireo zanany izy ireo, mba hanaovany fisoronana ho Ahy.

⁵Halain’ireo ny volamena, lamba manga, volomparasy, jaky ary ny lamba rongony fotsy madinika.

⁶Dia aoka izy hanao ny efoda* amin’ny volamena, lamba manga, volomparasy, jaky ary lamba rongony fotsy madinika, asan’ny mpanenona mahay.

⁷Hisy soroka roa eo amin’ny sisiny roa mba hampikambana azy.

⁸Ary ny fehikibo momba ny efoda, izay eo amboniny, dia hiray aminy sady hitovy fomba aminy, dia hatao amin’ny volamena, lamba manga, volomparasy, jaky ary lamba rongony fotsy madinika voatenona.

⁹Ary makà vato berila roa ka soraty eo aminy ny anaran’ny Zanak’Israely:

¹⁰Ny anaran’ny enina dia amin’ny vato iray ary ny anaran’ny enina hafa kosa dia amin’ny vato iray, araka ny fizokiany.

¹¹Amin’ny asan’ny mpanora-bato, tahaka ny fanoratana fitombo-kase, no hanoratanao ny vato roa, araka ny anaran’ny Zanak’Israely ary asio randram-bolamena manodidina.

¹²Ataovy eo amin’ny soroky ny efoda ny vato roa, ho vato fahatsiarovana ho an’ny Zanak’Israely. Ary i Arona dia hitondra ireo anarany ireo eo amin’ny sorony roa, eo anatrehan’NY TOMPO ho fahatsiarovana.

¹³Ary manaova randram-bolamena

¹⁴sy rojo kely volamena tsy miharo roa; mirandrana toy ny tady no hanaovanao ireo, ary hapetakao eo amin’ny randram-bolamena ireo rojo kely toy ny tady ireo.

¹⁵Ary manaova saron-tratra fitsarana, asan’ny mpanenona mahay. Toy ny nanaovana ny efoda* no hanaovanao azy: Volamena, lamba manga, volomparasy, jaky ary lamba rongony fotsy madinika voatenona.

¹⁶Ho efa-joro miforitra roa ilay izy ary irain-jehy avy ny lafiny efatra.

¹⁷Asio vato alatsaka an-tranontranony koa ka efatra andalana: Ny andalana voalohany dia karnelia sy topaza ary emeraoda;

¹⁸ny andalana faharoa dia robisy sy safira ary oniksa;

¹⁹ny andalana fahatelo dia opala sy agata ary ametista;

²⁰ny andalana fahefatra kosa dia krizolita sy berila ary jaspy. Asio randram-bolamena ny fitoerany avy.

²¹Ny vato dia alaharo araka ny anaran’ny Zanak’Israely, roa amby folo araka ny anarany; hisy soratra toy ny amin’ny fitombo-kase izany, ho amin’ny foko roa amby folo araka ny anarany avy.

²²Asio rojo kely volamena tsy miharo, mirandrana toy ny tady eo amin’ny saron-tratra.

²³Petaho mason-drojo volamena roa koa eo amin’ny saron-tratra; ataovy eo amin’ny zorony roa, izay amin’ny zorony roa ambony amin’ny saron-tratra ireo mason-drojo roa ireo.

²⁴Ary ny tady volamena roa dia ataovy eo amin’ny mason-drojo roa, izay amin’ny zorony roa ambony amin’ny saron-tratra.

²⁵Ataovy eo amin’ny soroky ny efoda anoloana kosa ny lanin’ny tady roa.

²⁶Dia manaova koa mason-drojo volamena roa ka ataovy amin’ny zorony roa ambany amin’ny saron-tratra, amin’ny sisiny anatiny, izay mifanolotra amin’ny efoda.

²⁷Ary manaova koa mason-drojo roa ka ataovy eo amin’ny soroka roa amin’ny efoda, dia ao ambaniny, eo anoloany, akaikin’ny fihaonany, eo ambonin’ny fehikibo momba ny efoda.

²⁸Kofehy manga no hamehezana ny mason-drojon’ny saron-tratra amin’ny mason-drojon’ny efoda, mba ho eo ambonin’ny fehikibo momba ny efoda ny saron-tratra ka tsy hikisaka hiala eo.

²⁹Ary i Arona dia hitondra ny anaran’ny Zanak’Israely eo amin’ny saron-tratra fitsarana mifanolotra amin’ny fony rehefa miditra ao amin’ny fitoerana masina izy mba ho fahatsiarovana mandrakariva eo anatrehan’NY TOMPO.

³⁰Ataovy eo amin’ny saron-tratra fitsarana ny Orima sy ny Tomima; ho eo amin’ny fon’i Arona izany rehefa miditra eo anatrehan’NY TOMPO izy. Hoentin’i Arona eo amin’ny fony mandrakariva eo anatrehan’NY TOMPO ny fitsarana ny Zanak’Israely.

³¹Ataovy lamba manga avokoa ny akanjobe misy ny efoda*.

³²Asio vozony eo afovoany ary aoka hisy sisiny voatenona manodidina ny vozony, tahaka ny vozon’ny akanjo fiarovan-tratra, mba tsy haharovitra azy.

³³Asio sarin’ampongabendanitra miloko manga, volomparasy, jaky, manodidina eny amin’ny moron-tongony, ary lakolosy kely volamena kosa eo anelanelany manodidina;

³⁴io dia lakolosy kely volamena sy sarin’ampongabendanitra mifanelanelana manodidina eny amin’ny morontongotry ny akanjobe.

³⁵Hiakanjoan’i Arona izany rehefa manao ny fanompoam-pivavahana izy, mba ho re ny fanenony rehefa miditra ao amin’ny fitoerana masina eo anatrehan’NY TOMPO sy rehefa miala ao izy, mba tsy hahafaty azy.

³⁶Manaova koa takelaka volamena tsy miharo ka asio soratra eo aminy, araka ny fanoratana fitombo-kase hoe: NOHAMASININA HO AN’NY TOMPO.

³⁷Asio kofehy manga izy io ka ataovy eo amin’ny fehiloha, fa eo anoloan’ny fehiloha no hasiana azy.

³⁸Ho eo ambonin’ny handrin’i Arona izy io mba hitondran’i Arona ny heloky ny zava-masina izay hohamasinin’ny Zanak’Israely amin’ny fanomezany masina rehetra; ho eo amin’ny handriny mandrakariva izy io mba hankasitrahana ny olona eo anatrehan’NY TOMPO.

³⁹Ataovy amin’ny rongony fotsy madinika tenom-boaroy ny akanjo lava ary manaova fehiloha amin’ny lamba rongony fotsy madinika sy fehikibo, asan’ny mahay tenona samihafa soratra.

⁴⁰Manaova koa akanjo lava ho an’ireo zanak’i Arona dia anamboary fehikibo izy ireo; ary manaova ihany koa satroka boribory ho azy ireo ho mariky ny voninahitra sy ny fahamboniana.

⁴¹Dia ampiakanjoy an’i Arona rahalahinao sy ireo zanany ireo; ary hosory izy ireo dia atokàny sy hamasino mba hanao fisoronana ho Ahy.

⁴²Ary manaova kalisaonina fohy amin’ny lamba rongony fotsy ho azy hanarona ny fitanjahany hatramin’ny maojany ka hatramin’ny feny.

⁴³Ary hiakanjoan’i Arona sy ireo zanany ireo rehefa miditra ao amin’ny tranolay fihaonana* izy ireo, na manakaiky ny alitara hanao fanompoam-pivavahana ao amin’ny fitoerana masina, mba tsy hahazoany heloka hahafaty azy; ho lalàna maharitra aminy sy amin’ny taranany mandimby azy izany.