Read La Bible en Malgache Eksodosy 29 Bible Online

Eksodosy 29 - La Bible en Malgache bible

Eksodosy 29

¹Ary izao no zavatra hataonao amin’izy ireo mba hanamasinana azy hanao fisoronana ho Ahy: Makà vantotra ombilahy iray sy ondrilahy roa tsy misy kilema,

²mofo tsy misy masirasira sy mofo tsy misy masirasira voaharo diloilo ary mofo manify tsy misy masirasira sady voahosotra diloilo; kobam-barimbazaha tsara toto no hanamboarana ireo.

³Ataovy ao anaty harona iray ireny ka ento amin’io harona io; ary ny vantotra ombilahy sy ny ondrilahy roa dia ento koa.

⁴Ary ento kosa i Arona sy ny zanany hankeo amin’ny varavaran’ny tranolay fihaonana* ka ampandroy amin’ny rano.

⁵Dia ento ireo fitafiana ka ampiakanjoy an’i Arona ny akanjo lava sy ny akanjobe misy ny efoda* ary ny efoda sy ny saron-tratra, ary afehezo azy ny fehikibo momba ny efoda;

⁶ary ataovy eo amin’ny lohany ny fehiloha ary apetraho eo amin’ny fehiloha ny diadema masina.

⁷Ary alao ny diloilo fanosorana ka andraraho amin’ny lohany dia hosory izy.

⁸Ento koa ireo zanany ka ampiakanjoy akanjo lava.

⁹Afehezo azy ireo ny fehikibo, dia amin’i Arona sy ireo zanany; asatrohy azy ireo koa ny satroka boribory; fa ho azy ireo ny fisoronana; ho lalàna maharitra izany. Dia toy izany no hanokananao an’i Arona sy ireo zanany.

¹⁰Ary asaivo entina ho eo anoloan’ny tranolay fihaonana ny vantotra ombilahy; ary aoka i Arona sy ireo zanany hametraka ny tanany amin’ny lohan’ny vantotra ombilahy;

¹¹dia vonoy eo anatrehan’NY TOMPO ny vantotra ombilahy, eo anoloan’ny varavaran’ny tranolay fihaonana;

¹²ary analao ny ran’ity vantotra ombilahy ity dia ahosory eo amin’ireo tandroky* ny alitara amin’ny fanondronao, ary ny ra sisa rehetra kosa dia araraho eo am-pototry ny alitara;

¹³dia alao ny jabora mandrakotra ny taovany rehetra sy ny ila atiny lehibe ary ny voany roa mbamin’ny fonom-boany ka doroy eo ambonin’ny alitara ireo ho fofona;

¹⁴fa ny henan’ny vantotra ombilahy sy ny hodiny ary ny tain-drorohany kosa dia doroy amin’ny afo eny ivelan’ny toby ho fanatitra noho ny ota.

¹⁵Alao indray ny ondrilahy iray ka aoka i Arona sy ireo zanany hametraka ny tanany amin’ny lohan’ny ondrilahy;

¹⁶dia vonoy izy ka tantazo ny rany dia afafazo manodidina amin’ny lafin’ny alitara;

¹⁷ary teteho tsara ny ondrilahy dia sasao ny taovany sy ny tongony ka ataovy eo ambonin’ireo voatetika miaraka amin’ny lohany;

¹⁸ary doroy ho fofona eo ambonin’ny alitara ilay ondrilahy manontolo ho fanatitra dorana manontolo ho an’NY TOMPO, dia hanitra ankasitrahana, fanatitra levonina amin’ny afo ho an’NY TOMPO.

¹⁹Mbola makà ondrilahy hafa koa; ary aoka hametraka ny tanany amin’ny lohan’io ondrilahy io i Arona sy ireo zanany;

²⁰vonoy ny ondrilahy ka analao ny rany, dia ahosory amin’ny tendron’ny ravin-tsofina havanan’i Arona sy amin’ny tendron’ny ravin-tsofina havanan’ireo zanany, ary amin’ny ankiben-tanany havanana sy amin’ny ankiben-tongony havanana; ny ra sisa kosa dia afafazo manodidina amin’ny lafin’ny alitara rehetra.

²¹Ary analao ny ra izay eo ambonin’ny alitara sy ny diloilo fanosorana ka afafazo amin’i Arona sy amin’ny fitafiany ary amin’ireo zanany sy amin’ny fitafian’ireo zanany koa; dia ho masina izy sy ny fitafiany ary ireo zanany sy ny fitafian’ireo zanany koa.

²²Alao indray ny jaboran’ny ondrilahy sy ny hofany ary ny jabora mandrakotra ny taovany sy ny ila atiny lehibe sy ny voany roa mbamin’ny jabora mandrakotra azy ary ny feny havanana, fa ondrilahy fanokanana io;

²³ary makà mofo iray, dia mofo iray voaisy diloilo, mofo manify iray izay eo amin’ny harona misy ny mofo tsy misy masirasira, izay eo anatrehan’NY TOMPO;

²⁴ary ataovy eo an-tanan’i Arona sy eo an-tanan’ireo zanany izy rehetra ka ataovy fanatitra asandratra eo anatrehan’NY TOMPO ireo.

²⁵Dia raiso avy amin’ny tanany ireo avy eo ka doroy hanome fofona eo ambonin’ny alitara, miaraka amin’ny fanatitra dorana manontolo, ho hanitra ankasitrahana eo anatrehan’NY TOMPO, dia fanatitra levonina amin’ny afo ho an’NY TOMPO.

²⁶Alao indray ny tratran’ny ondrilahy fanokanana an’i Arona ka ataovy fanatitra asandratra eo anatrehan’NY TOMPO; dia izay no ho anjaranao.

²⁷Ary hamasino ny tratran’ny fanatitra asandratra sy ny feny izay nalaina avy tamin’ny fanatitra, dia izay nasandratra sy izay nalaina avy tamin’ny ondrilahy fanokanana, dia izay ho an’i Arona sy izay ho an’ny zanany.

²⁸Ary ho anjara mandrakizay ho an’i Arona sy ho an’ny taranany avy amin’ny Zanak’Israely izany, fa anjara fanomezana; ary hisy anjara fanomezana ho an’NY TOMPO, haterin’ny Zanak’Israely avy amin’ny fanati-pihavanany rehetra.

²⁹Ary ny fitafiana masina izay an’i Arona dia ho an’ireo zanany mandimby azy koa hanosorana azy sy hanokanana azy.

³⁰Hiakanjo azy hafitoana izay iray amin’ny zanany ho mpisorona handimby azy, dia izay miditra ao amin’ny tranolay fihaonana hanao fanompoam-pivavahana ao amin’ny fitoerana masina.

³¹Alao avy eo ny ondrilahy fanokanana ka ahandroy eo amin’ny fitoerana masina iray ny henany.

³²Ary hohanin’i Arona sy ireo zanany eo anoloan’ny varavaran’ny tranolay fihaonana ny henan’ny ondrilahy sy ny mofo izay ao anatin’ny harona.

³³Izy ireo no hihinana ireo zavatra ireo, izay nanaovana fanavotana ho azy, mba hanokanana sy hanamasinana azy; fa tsy mba hihinana ny vahiny satria masina ireo.

³⁴Ary raha misy sisa tsy lany amin’ny henan’ny fanatitra fanokanana, na amin’ny mofo, ka tra-maraina, dia hodoranao amin’ny afo ny sisa tsy lany fa tsy hohanina satria masina.

³⁵Dia manaova izany amin’i Arona sy ireo zanany, araka izay rehetra nandidiako anao; hafitoana no hanokananao azy ireo.

³⁶Ary vantotra ombilahy iray no haterinao isanandro ho fanatitra noho ny ota, hanaovana fanavotana; ary diovy ny alitara amin’ny fanaovanao fanavotana ho azy; dia hosory koa izy hanamasinana azy.

³⁷Hafitoana no hanaovanao fanavotana ho an’ny alitara sy hanamasinanao azy; dia ho masina indrindra ny alitara ary ho masina izay rehetra mikasika azy.

³⁸Ary izao no hatolotrao eo ambonin’ny alitara: Zanak’ondry izay herintaona, roa isanandro isanandro,

³⁹koa ny zanak’ondry iray dia hatolotrao amin’ny maraina ary ny zanak’ondry iray kosa dia hatolotrao amin’ny hariva;

⁴⁰miampy koba tsara toto ampahafolon’ny efaha*, voaharo amin’ny diloilo nofiazana ampahefatry ny hina*, sy divay ampahefatry ny hina, ho fanatitra aidina miaraka amin’ilay zanak’ondry iray.

⁴¹Ary ny zanak’ondry faharoa kosa dia hatolotrao amin’ny hariva. Fanatitra avy amin’ny zavamaniry sy fanatitra aidina tahaka ny natao tamin’ny fanatitra maraina no hampiarahinao aminy, ho hanitra ankasitrahana, dia fanatitra levonina amin’ny afo ho an’NY TOMPO.

⁴²Ho fanatitra mandrakariva, dorana manontolo izany, hatramin’ny taranakareo fara aman-dimby, eo anoloan’ny varavaran’ny tranolay fihaonana* eo anatrehan’NY TOMPO, dia ao amin’izay hihaonako aminareo, hitenenako aminao.

⁴³Ary hihaona amin’ny Zanak’Israely ao Aho ka hohamasinin’ny voninahitro izy.

⁴⁴Ary hohamasiniko ny tranolay fihaonana sy ny alitara; ary hohamasiniko koa i Arona sy ireo zanany mba hanao fisoronana ho Ahy.

⁴⁵Honina eo amin’ny Zanak’Israely Aho ka ho Andriamaniny.

⁴⁶Ary ho fantany fa Izaho no TOMPO Andriamaniny izay nitondra azy nivoaka avy tany amin’ny tany Ejipta, mba honenako eo aminy; Izaho no TOMPO Andriamaniny.