Read La Bible en Malgache Eksodosy 30 Bible Online

Eksodosy 30 - La Bible en Malgache bible

Eksodosy 30

¹Manaova koa alitara handoroana ditin-kazo manitra; hazo akasia no hanamboaranao azy.

²Ho iray hakiho* avy ny lafiny efatra, ary hatao efa-joro, ho roa hakiho kosa ny haavony, dia ataovy miray aminy ireo tandrony.

³Petaho takelaka volamena tsy miharo izany, dia ny tampony sy ny lafiny manodidina ary ireo tandrony, ary asio sisiny volamena manodidina azy.

⁴Asio mason-drojo volamena roa eo ambanin’ny sisiny ka ataovy eo amin’ny sisiny roa ireo; amin’ny ilany roa no hanaovanao azy ka ho fitoeran’ny bao hilanjana azy ireo.

⁵Hazo akasia no anaovy ny bao ka petaho takelaka volamena.

⁶Apetraho eo anoloan’ny efitra izay manakona ny vata misy ny Vavolombelona izy io, dia manandrify ny rakotra fanaovam-panavotana eo ambonin’ny Vavolombelona, izay hihaonako aminao.

⁷Ary handoro ditin-kazo mani-pofona eo i Arona, koa isa-maraina, rehefa manamboatra ny fitoeran-jiro, no hanatanterahany azy;

⁸rehefa mampirehitra ireo jiro hariva koa i Arona dia mbola handoro azy ihany; ditin-kazo mani-pofona hodorana mandrakariva eo anatrehan’NY TOMPO, hatramin’ny taranakareo fara aman-dimby izany.

⁹Aza manolotra ditin-kazo manitra tsy izy eo ianareo, na fanatitra dorana manontolo na fanatitra avy amin’ny zavamaniry; ary aza mandraraka fanatitra aidina eo.

¹⁰Ary aoka hanao fanavotana eo amin’ireo tandrony* indray mandeha isan-taona i Arona; indray mandeha isan-taona no hanaovany fanavotana ho azy amin’ny ran’ny fanatitra noho ny ota izay atao fanavotana, ary io dia hatramin’ny taranakareo fara aman-dimby ka ho masina indrindra ho an’NY TOMPO.

¹¹Ary NY TOMPO niteny tamin’i Mosesy indray hoe:

¹²Rehefa manao fanisana ny Zanak’Israely rehetra ianao amin’ny fandaminana azy dia samy handoa avotry ny ainy ho an’NY TOMPO avy ny olona tsirairay, mba tsy hisy areti-mandringana hanjo azy rehefa isaina izy.

¹³Izao no haloan’izay rehetra mandalo ny fanisana: Antsasaky ny sekela avy araka ny sekela masina ka gera roapolo ny sekela iray; eny, antsasaky ny sekela ho anjara fanomezana ho an’NY TOMPO.

¹⁴Izay rehetra voaisa, hatramin’ny roapolo taona no ho miakatra, no handoa ny anjara fanomezana ho an’NY TOMPO.

¹⁵Ny manankarena dia tsy handoa mihoatra noho ny antsasaky ny sekela ary ny mahantra dia tsy handoa latsaka, rehefa mandoa ny anjara fanomezana ho an’NY TOMPO izy hanavotana ny ainareo.

¹⁶Ary handray ny vola avotra amin’ny Zanak’Israely ianao ka hataonao amin’ny fanompoana ao amin’ny tranolay fihaonana*; dia ho fahatsiarovana ho an’ny Zanak’Israely eo anatrehan’NY TOMPO izany, ho avotry ny ainareo.

¹⁷Ary hoy indray NY TOMPO tamin’i Mosesy:

¹⁸Manaova koveta varahina mba ho fidiovana, aoka ho varahina koa ny faladiany; ary apetraho eo anelanelan’ny tranolay fihaonana* sy ny alitara izy io ka asio rano ao anatiny.

¹⁹Eo no hanasan’i Arona sy ireo zanany ny tongony aman-tanany.

²⁰Rehefa hiditra ao amin’ny tranolay fihaonana izy ireo dia hisasa amin’ny rano mba tsy ho faty; tahaka izany, rehefa manakaiky ny alitara hanao fanompoam-pivavahana mba handoro ny fanatitra levonina amin’ny afo ho an’NY TOMPO izy ireo,

²¹dia hanasa ny tongony aman-tanany mba tsy ho faty; ho lalàna maharitra aminy sy ireo zanany hatramin’ny taranany fara aman-dimby izany.

²²Ary NY TOMPO niteny indray tamin’i Mosesy hoe:

²³Makà zava-manitra tsara ho anao, dia miora mitsiranoka dimanjato sekela sy havozomanitra antsasak’izany, dia dimampolo sy roanjato, veromanitra dimampolo sy roanjato,

²⁴kasia dimanjato, araka ny sekela masina, ary diloilon’oliva eran’ny hina*;

²⁵dia amboary ho diloilo fanosorana masina izany, ho zavatra aharoharo, asan’ny mpanao haro manitra, ho diloilo fanosorana masina.

²⁶Dia hosory amin’izany ny tranolay fihaonana* sy ny vata misy ny Vavolombelona,

²⁷ny latabatra mbamin’ny fanaka rehetra momba azy, ny fitoeran-jiro mbamin’ny fanaka momba azy, ny alitara fandoroana ditin-kazo manitra,

²⁸ny alitara fandoroana ny fanatitra dorana manontolo mbamin’ny fanaka rehetra momba azy ary ny koveta sy ny faladiany.

²⁹Hamasino ireo mba ho masina indrindra; ho masina izay rehetra mikasika azy.

³⁰Ary hosory i Arona sy ireo zanany ka hamasino izy ireo mba hanao fisoronana ho Ahy.

³¹Avy eo dia mitenena amin’ny Zanak’Israely hoe: Ity dia ho diloilo fanosorana masina ho Ahy hatramin’ny taranakareo fara aman-dimby.

³²Aoka tsy hisy hihosotra amin’izany, na hisy haka tahaka ny fanamboarana azy na iza na iza; fa masina izany ka ho masina aminareo.

³³Izay rehetra mampiharo izay mitovy amin’izany, ary izay rehetra manosotra izany amin’ny vahiny, dia hofongorana tsy ho amin’ny fireneny.

³⁴Dia hoy koa NY TOMPO tamin’i Mosesy: Makà zava-manitra, dia natafa sy sekeleta ary helbena sy lebona tsy misy fangarony, atao mitovy lanja.

³⁵Ary ataovy ditin-kazo manitra izany, dia zavatra aharoharo araka ny fanaon’ny mpanao haro manitra, misy sira, tsy misy fangarony, ary masina.

³⁶Makà avy amin’izany ka totoy ho tonga vovony tena malemy, dia asio avy amin’izany eo anoloan’ny Vavolombelona ao amin’ny tranolay fihaonana* izay hihaonako aminao; ho masina indrindra ho anareo io.

³⁷Ary ny amin’ny ditin-kazo manitra izay hataonao dia aza mba misy atao mitovy amin’izany ny ho anareo; ho masina aminao ho an’NY TOMPO izany.

³⁸Izay rehetra manamboatra mitovy amin’izany ka mampiasa azy ho fofona manitra dia hofongorana tsy ho amin’ny fireneny.