Read La Bible en Malgache Eksodosy 34 Bible Online

Eksodosy 34 - La Bible en Malgache bible

Eksodosy 34

¹Ary hoy NY TOMPO tamin’i Mosesy: Aoka ianao hipaika vato fisaka roa tahaka ireo teo aloha dia hosoratako amin’ireo vato fisaka ireo ny teny izay tamin’ireo vato fisaka teo aloha izay nopotehinao;

²ary aoka ho vonona ianao mandra-paharain’ny andro; dia miakara ho ao amin’ny tendrombohitra Sinay rehefa maraina ka mitsangàna eo anatrehako ao an-tampon’ny tendrombohitra.

³Ary aoka tsy hisy olona hiakatra miaraka aminao, sady aoka tsy hisy olona ho hita eny amin’ny tendrombohitra Sinay rehetra; ary ny ondry aman’osy koa sy ny omby dia aoka tsy hisy handrasana eny akaikin’izany tendrombohitra izany.

⁴Dia nipaika vato fisaka roa tahaka ilay teo aloha i Mosesy, ary nifoha vao maraina izy ka niakatra tao amin’ny tendrombohitra Sinay, araka izay nandidian’NY TOMPO azy; ary noentiny teny an-tanany ny vato fisaka roa.

⁵Ary NY TOMPO nidina tao anatin’ny rahona ka nijanona teo, teo akaikiny, dia nanonona ny anaran’NY TOMPO.

⁶Ary NY TOMPO nandalo teo anatrehany ka niantso hoe: NY TOMPO, NY TOMPO, Andriamanitra mamindra fo sy miantra, mahari-po sady be famindrampo sy fahamarinana,

⁷mitahiry famindrampo ho an’ny olona arivo mandimby, mamela heloka sy fahadisoana ary fahotana, kanefa tsy manamarina ny meloka fa mamaly ny heloky ny ray amin’ny zanaka sy ny zafy hatramin’ny zafiafy sy ny zafindohalika.

⁸Ary i Mosesy dia niondrika haingana tamin’ny tany ka niankohoka,

⁹ary niteny hoe: Tompo ô, raha mba mahita fitia eo imasonao aho dia aoka Ianao, Tompo ô, handeha eo afovoanay ka hamela ny helokay sy ny fahotanay ary handray anay ho lovanao, na firenena mafy hatoka aza ity.

¹⁰Ary hoy NY TOMPO: Indro ny tenako no manao fanekena ka eo anatrehan’ny olonao rehetra no hanaovako zava-mahagaga izay tsy mbola nisy natao tany amin’ny tany manontolo sy tany amin’ny Jentilisa* rehetra; ary ny olona rehetra izay itoeranao dia hahita ny asan’NY TOMPO, fa mahatahotra izay zavatra hataoko miaraka aminao.

¹¹Tandremo izay andidiako anao anio. Indro, horoahiko hiala eo anatrehanao ny Amorita, ny Kananita, ny Hetita, ny Perizita, ny Hivita ary ny Jebosita.

¹²Koa mitandrema, fandrao hanao fanekena amin’ny mponina eo amin’ny tany izay halehanao ianao ka ho fandrika eo afovoanao izany.

¹³Fa ravao ny alitarany, poteho ny tsangambaton-tsampiny ary jinjao ny tsangankazon-tsampy ho an’ny Aserahany*.

¹⁴Fa tsy hiankohoka eo anatrehan’izay andriamanitra hafa ianao; fa NY TOMPO dia saro-piaro, izany rahateo no anarany, satria Andriamanitra saro-piaro Izy.

¹⁵Fandrao ianao hanao fanekena amin’ny mponina eo amin’ny tany ka hijangajanga hanaraka ny andriamaniny sy hamono zavatra hatao fanatitra ho an’ny andriamaniny, na koa hanasa anao izy ka hihinana amin’ny fanatiny ianao;

¹⁶ary fandrao koa haka amin’ny zanany vavy ho vadin’ny zanakao lahy ianao, ary hijangajanga hanaraka ny andriamaniny ny zanany vavy ka hampandeha ny zanakao lahy hijangajanga hanaraka ny andriamaniny.

¹⁷Aza manao andriamanitra narendrika ho anao.

¹⁸Tandremo ny andro firavoravoana, dia ny andro fihinanana ny mofo tsy misy masirasira. Hafitoana no hihinananao ny mofo tsy misy masirasira, araka izay nandidiako anao, amin’ny fotoana voatendry, dia amin’ny volana Abiba*, fa tamin’ny volana Abiba no nivoahanao avy tany Ejipta.

¹⁹Izay voalohan-teraka rehetra no Ahy, dia ny lahy amin’ny voalohan-teraky ny bibinao, na omby na ondry aman’osy;

²⁰fa ny voalohan-teraky ny boriky kosa dia hosoloanao zanak’ondry; ary raha tsy hanolo azy ianao dia hofolahinao ny vozony; ary ny lahimatoa rehetra amin’ny zanakao dia havotanao. Ary aoka tsy hisy hiseho amin’ny tanam-polo, tsy hitondra fanatitra eo anatrehako.

²¹Henemana no hiasanao, fa amin’ny andro fahafito dia hitsahatra ianao; na dia amin’ny fotoana fitrandrahan-tany sy amin’ny fotoana fijinjana aza dia hitsahatra ihany ianao.

²²Tandremo ny andro firavoravoana amin’ireo Herinandro[13], amin’ny fanaterana ny voaloham-bokatra rehefa mijinja ny varimbazaha sy ny andro firavoravoana amin’ny fanangonam-bokatra amin’ny fitsingerenan’ny taona.

²³Intelo isan-taona ny lehilahy rehetra aminao no hiseho eo anatrehan’NY TOMPO, Andriamanitry ny Israely.

²⁴Fa handroaka firenena eo alohanao Aho ka hanitatra ny faritaninao; ary tsy hisy olona hitsiriritra ny taninao rehefa miakatra hiseho eo anatrehan’NY TOMPO Andriamanitrao intelo isan-taona ianao.

²⁵Aza manolotra ny ran’ny zavatra vonoina hatao fanatitra ho Ahy ianao, raha mbola misy masirasira ao aminao; ary aza avela ho tra-maraina ny zavatra vonoina hatao fanatitra ho Ahy amin’ny andro firavoravoana amin’ny Paska.

²⁶Ny santatra amin’ny voaloham-bokatry ny taninao dia haterinao ho ao amin’ny tranon’NY TOMPO Andriamanitrao. Aza mahandro zanak’osy amin’ny rononon-dreniny[14].

²⁷Farany, hoy NY TOMPO tamin’i Mosesy: Soraty ireo teny ireo, fa araka ireo teny ireo no nanaovako fanekena aminao sy amin’ny Israely.

²⁸Dia teo amin’NY TOMPO efapolo andro sy efapolo alina izy sady tsy nihinan-kanina na nisotro rano. Ary nosoratan’NY TOMPO tamin’ny vato fisaka ny tenin’ny fanekena, dia ny Teny Folo[15].

²⁹Ary nidina avy eo an-tendrombohitra Sinay i Mosesy. Ary teny an-tanany ny vato roa izay nisy ny Vavolombelona tamin’izy nidina avy teo an-tendrombohitra, ary tsy fantany fa namirapiratra ny hoditry ny tavany noho ny nitenenany taminy.

³⁰Nony hitan’i Arona sy ny Zanak’Israely rehetra i Mosesy fa indro, namirapiratra ny hodi-tavany, dia natahotra azy izy ireo.

³¹Nefa niantso azy ireo i Mosesy ka niverina ho eo aminy i Arona sy ny lohan’ny fiangonana rehetra; dia niteny taminy i Mosesy.

³²Taorianan’izany dia nanakaiky koa ny Zanak’Israely rehetra; ary nandidy azy ireo i Mosesy araka izay rehetra nolazain’NY TOMPO taminy tao amin’ny tendrombohitra Sinay.

³³Rehefa tapitra ny teny nataon’i Mosesy taminy dia nasiany sarona ny tavany.

³⁴Ary rehefa niditra teo anatrehan’NY TOMPO i Mosesy hiteny Aminy dia nanaisotra ny saron-tava mandra-pialany teo. Dia niala teo izy ka nilaza tamin’ny Zanak’Israely izay nandidiana azy.

³⁵Ary hitan’ny Zanak’Israely ny tavan’i Mosesy ka indro, namirapiratra ny hoditry ny tavany; dia nasaron’i Mosesy ny tavany indray ny saron-tava mandra-pidiny hiteny Aminy fanindroany.