Read La Bible en Malgache Eksodosy 35 Bible Online

Eksodosy 35 - La Bible en Malgache bible

Eksodosy 35

¹Ary namory ny fiangonana i Mosesy, dia ny Israely manontolo, ka niteny taminy hoe: Izao no teny nandidian’NY TOMPO hotanterahina:

²Henemana no hanaovanao raharaha, fa ny andro fahafito dia ho masina aminareo, ho tena andro fitsaharana ho an’NY TOMPO; izay rehetra manao raharaha amin’io andro io dia hovonoina ho faty.

³Aza mampirehitra afo amin’ny andro Sabata any amin’izay rehetra itoeranareo.

⁴Ary niteny tamin’ny fiangonana, dia ny Israely manontolo, i Mosesy hoe: Izao no teny izay nandidian’NY TOMPO hotanterahina:

⁵Makà anjara fanomezana ho an’NY TOMPO avy amin’izay anananareo: Izay rehetra entanin’ny fony dia aoka hitondra anjara fanomezana ho an’NY TOMPO, dia volamena, volafotsy, varahina,

⁶lamba manga, volomparasy, jaky, lamba rongony fotsy madinika ary volon’osy,

⁷hoditr’ondrilahy voaloko mena, hoditra trozona, hazo akasia,

⁸diloilo hatao fanazavana, zava-manitra ho amin’ny diloilo fanosorana sy ho ditin-kazo mani-pofona,

⁹ary vato berila sy vato halatsaka an-tranontranony ho amin’ny efoda* sy ho amin’ny saron-tratra.

¹⁰Ary aoka ny manan-talenta rehetra eo aminareo ho avy ka hanao izay rehetra nandidian’NY TOMPO,

¹¹dia ny tabernakely*, ny tranolainy, ny rakotra momba azy, ny farangony, ny hazofisaka momba azy sy ny barany ary ny andriny sy ny faladiany,

¹²ny vata sy ny baony ary ny rakotra fanaovam-panavotana sy ny efitra lamba fanakonana,

¹³ny latabatra sy ny baony mbamin’ny fanaka rehetra momba azy ary ny mofo atao fanatitra,

¹⁴ny fitoeran-jiro ho fanazavana mbamin’ny fanaka momba azy sy ny jirony ary ny diloilo hatao fanazavana,

¹⁵ny alitara fandoroana ditin-kazo manitra ary ny baony, ny diloilo fanosorana sy ny ditin-kazo mani-pofona, ny varavarana lamba ho eo amin’ny varavaran’ny tabernakely,

¹⁶ny alitara fandoroana ny fanatitra dorana manontolo sy ny harato varahina ho eo aminy ary ny baony sy ny fanaka rehetra momba azy, ary ny koveta sy ny faladiany,

¹⁷ny fefy lamba ho amin’ny kianja, ny andriny sy ny faladiany ary ny vavahady lamba ho eo amin’ny vavahadin’ny kianja,

¹⁸ny tsatòkan-dain’ny tabernakely sy ny tsatòkan-dain’ny kianja sy ny kofehiny,

¹⁹ny fitafiana fitondra amin’ny fanompoana, hoentiny manao fanompoam-pivavahana ao amin’ny fitoerana masina, ny fitafiana masina ho an’i Arona mpisorona ary ny fitafian’ireo zanany hoentiny manao raharaham-pisoronana.

²⁰Dia niala teo anatrehan’i Mosesy ny fiangonana, dia ny Israely manontolo.

²¹Dia nanatona ny olona rehetra izay nohetsehin’ny fony sy izay rehetra nentanin’ny fanahiny avy ka samy nitondra ny anjara fanomezany ho an’NY TOMPO hanaovana ny tranolay fihaonana* sy ny fanompoana rehetra momba azy ary ny fitafiana masina.

²²Ary ny olona rehetra na lahy na vavy dia nitondra izay rehetra nanentanan’ny fony azy, dia fisisika, kavina, peratra, mason-drojo volamena, firavaka volamena isan-karazany; toy izany koa ny olona rehetra izay nanolotra volamena ka nataony fanatitra asandratra ho an’NY TOMPO.

²³Ary ny olona rehetra izay nanana lamba manga, volomparasy, jaky, lamba rongony fotsy madinika, volon’osy, hoditr’ondrilahy voaloko mena ary hoditra trozona, dia nitondra ireo.

²⁴Izay rehetra nanatitra volafotsy sy varahina ho anjara fanomezana dia nitondra izany ho an’NY TOMPO; ary izay rehetra nanana hazo akasia hanaovana zavatra ho amin’ny fanompoana dia nitondra izany koa.

²⁵Ny vehivavy rehetra nanan-talenta namoly tamin’ny tanany dia nitondra izay nofolesiny, dia ny kofehy manga, volomparasy, jaky ary ny lamba rongony fotsy madinika.

²⁶Ary ny vehivavy rehetra nanan-talenta ka nazoto am-po dia namoly volon’osy.

²⁷Ny loholona dia nitondra ny vato berila sy ny vato halatsaka an-tranontranony ho amin’ny efoda sy ho amin’ny saron-tratra,

²⁸ary ny zava-manitra sy ny diloilo hatao fanazavana sy ho amin’ny diloilo fanosorana ary ho amin’ny ditin-kazo mani-pofona.

²⁹Ny lehilahy sy ny vehivavy rehetra izay nampirisihin’ny fony dia hitondra izay hanaovana ny zavatra rehetra nandidian’NY TOMPO hotanterahin’i Mosesy; ireny Zanak’Israely rehetra ireny dia nitondra fanatitra an-tsitrapo ho an’NY TOMPO.

³⁰Ary hoy i Mosesy tamin’ny Zanak’Israely: Indro, efa notononin’NY TOMPO anarana i Bezalila, zanak’i Ory, zanak’i Hora, avy amin’ny fokon’i Joda,

³¹ka efa nofenoiny fanahin’Andriamanitra, mba hananany talenta sy fahiratan-tsaina ary fahalalana ny amin’ny taozavatra samihafa,

³²toy ny famolavolana asa kanto, ny fiasana volamena sy volafotsy ary varahina,

³³ny fanamboarana vato alatsaka an-tranontranony sy ny fandrafetana hazo, hanaovana izay asa kanto samihafa rehetra.

³⁴Ny fahaizana mampianatra koa dia efa nataon’Andriamanitra tao am-pony, dia izy sy i Oholiaba, zanak’i Ahisamaka avy amin’ny fokon’i Dana.

³⁵Ary efa nofenoiny talenta izy roa lahy hanaovany ny taozavatra samihafa, dia ny an’ny mpanao sokitra sy ny mpanao asa kanto ary ny asan’ny mpanenona mahay tenona samihafa soratra, dia amin’ny kofehy manga, volomparasy, jaky ary amin’ny lamba rongony fotsy madinika ary ny an’ny mpanenona, mba hanaovana ny asa samihafa sy hamoronana asa kanto.