Read La Bible en Malgache Eksodosy 37 Bible Online

Eksodosy 37 - La Bible en Malgache bible

Eksodosy 37

¹Ary nanao ny vata tamin’ny hazo akasia i Bezalila; roa hakiho* sy sasany ny lavany, iray hakiho sy sasany ny sakany ary iray hakiho sy sasany ny haavony;

²nopetahany takelaka volamena tsy miharo tao anatiny sy teo ivelany; ary nasiany sisiny volamena manodidina.

³Nandrendrika mason-drojo volamena efatra hatao aminy koa izy ka nataony teo amin’ny tongony[16] efatra, dia roa no teo amin’ny lafiny iray, ary mason-drojo roa no teo amin’ny lafiny iray koa.

⁴Ary nanao bao tamin’ny hazo akasia izy ka nopetahany takelaka volamena.

⁵Nampidiriny ho ao amin’ny mason-drojo izay eo amin’ny lafin’ny vata ny bao hilanjana azy.

⁶Ary nanao rakotra fanaovam-panavotana tamin’ny volamena tsy miharo izy: Roa hakiho sy sasany ny lavany ary iray hakiho sy sasany ny sakany.

⁷Dia nanao kerobima* volamena roa izy; iray vongana amin’ny rakotra fanaovam-panavotana no nanaovany azy roa,

⁸koa ny kerobima iray dia nataony teo amin’ny sakany iray ary ny kerobima iray kosa dia teo amin’ny sakany iray hafa; iray vongana amin’ny rakotra fanaovam-panavotana no nanaovany ny kerobima roa, dia teo amin’ny sakany roa.

⁹Ary nivelatra teo ambony ny elatry ny kerobima ka nalofan’io elany io ny rakotra fanaovam-panavotana; nifanatrika ny tavany sady nanatrika ny rakotra fanaovam-panavotana koa.

¹⁰Nanao ny latabatra tamin’ny hazo akasia koa izy; roa hakiho* ny lavany, iray hakiho ny sakany ary iray hakiho sy sasany ny haavony.

¹¹Nopetahany takelaka volamena tsy miharo izy io sady nasiany sisiny volamena manodidina azy.

¹²Nasiany sisiny felatanana iray manodidina azy ary nasiany sisiny volamena ny manodidina.

¹³Nandrendrika mason-drojo volamena efatra hatao aminy izy ka nataony teo amin’ny zorony efatra eo amin’ny tongony efatra:

¹⁴Eo akaikin’ny sisiny no nisy ny mason-drojo ho fitoeran’ny bao hilanjana ny latabatra.

¹⁵Ary nanao ny bao tamin’ny hazo akasia izy hilanjana ny latabatra ka nopetahany takelaka volamena.

¹⁶Nanao ny fanaka izay eo ambonin’ny latabatra indray izy, dia ny loviany sy ny loviakeliny ary ny kapoakany sy ny fitoeran-divainy ho fandrarahana fanatitra; volamena tsy miharo no nanaovany ireo.

¹⁷Nanao ny fitoeran-jiro tamin’ny volamena tsy miharo indray koa izy; notefena ny fitoeran-jiro; vongana iray aminy ny faladiany, ny tahony, ny foto-boniny, ny bokony ary ny voniny.

¹⁸Nisy rantsany enina tamin’ny ilany roa, dia rantsany telo tamin’ny fitoeran-jiro amin’ny ilany iray, ary rantsana telo tamin’ny fitoeran-jiro amin’ny ilany iray hafa koa;

¹⁹teo amin’ny rantsany iray dia nisy foto-boniny telo natao tahaka ny vonin’ny amanda, mbamin’ny bokony sy ny voniny; teo amin’ny sampany iray koa dia nisy foto-boniny telo natao tahaka ny vonin’ny amanda, mbamin’ny bokony sy ny voniny; dia toy izany avokoa tamin’ny rantsany enina tamin’ny fitoeran-jiro.

²⁰Teo amin’ny fitoeran-jiro dia nisy foto-boniny efatra natao tahaka ny vonin’ny amanda, mbamin’ny bokony sy ny voniny,

²¹dia bokony iray no eo ambanin’ny rantsany roa sady miray aminy, ary bokony iray no eo ambanin’ny rantsany roa sady miray aminy, ary bokony iray no eo ambanin’ny rantsany roa koa sady miray aminy; amin’ny rantsany enina izay miray amin’ny fitoeran-jiro izany.

²²Ny bokony sy ny rantsany dia niray taminy avokoa; izy rehetra dia natao vongana iray tamin’ny volamena iray tsy miharo.

²³Nataony tamin’ny volamena tsy miharo ny jirony fito sy ny hetin-jirony sy ny fitoeran-davenon-jirony.

²⁴Volamena tsy miharo, talenta* iray, no nanaovany azy io mbamin’ny fanaka rehetra momba azy.

²⁵Ary nanao ny alitara fandoroana ditin-kazo manitra tamin’ny hazo akasia izy: Iray hakiho* avy ny lafiny efatra, dia efa-joro tsy mivadi-mandry izany; ary roa hakiho ny haavony; nataony miray aminy ny tandrony.

²⁶Ary nopetahany takelaka volamena tsy miharo izany, dia ny tampony sy ny lafiny manodidina ary ny tandrony; nasiany sisiny volamena manodidina io.

²⁷Nasiany mason-drojo volamena roa teo ambanin’ny sisiny ka nataony teo amin’ny zorony efatra ireo ho fitoeran’ny bao hilanjana azy.

²⁸Hazo akasia no nanaovany ny bao ka nopetahany takelaka volamena.

²⁹Nanao ny diloilo fanosorana masina izy, mbamin’ny zava-manitra manentona tsy miharo, asan’ny mpanao haro manitra.