Read La Bible en Malgache Eksodosy 39 Bible Online

Eksodosy 39 - La Bible en Malgache bible

Eksodosy 39

¹Tamin’ny lamba manga, volomparasy ary jaky no nanaovana ny fitafiana fitondra amin’ny fanompoana ao amin’ny fitoerana masina, ary natao ny fitafiana masina ho an’i Arona araka izay nandidian’NY TOMPO an’i Mosesy.

²Dia nanao ny efoda* tamin’ny volamena, lamba manga, volomparasy, jaky ary ny lamba rongony fotsy madinika voahasina izy[17].

³Ary namisaka ny volamena ho takelaka manify izy dia nandidididy azy ho kofehy volamena ka nataony tady miaraka amin’ny kofehy manga, volomparasy, jaky ary ny lamba rongony fotsy madinika, asan’ny mpanenona mahay.

⁴Nataony nisy soroka izay nihazona ny efoda tamin’ny tendrony roa avy.

⁵Ary ny fehikibo momba ny efoda, izay teo amboniny, dia niray taminy sady nitovy tarehy taminy, ary nataony volamena, lamba manga, volomparasy, jaky ary kofehy rongony fotsy madinika voahasina, araka izay nandidian’NY TOMPO an’i Mosesy.

⁶Nasiany randram-bolamena manodidina kosa ny vato berila dia nosoratany taminy, araka ny fanoratana fitombo-kase, ny anaran’ny Zanak’Israely.

⁷Ary nataony teo amin’ny soroky ny efoda ny vato, ho vato fahatsiarovana ho an’ny Zanak’Israely, araka izay nandidian’NY TOMPO an’i Mosesy.

⁸Dia nataony ny saron-tratra, izay asan’ny mpanenona mahay, tahaka ny nanaovana ny efoda*, dia tamin’ny volamena, lamba manga, volomparasy, jaky ary ny rongony fotsy madinika voahasina.

⁹Efa-joro miforitra roa no nanaovany ny saron-tratra, irain-jehy avy ny lafiny efatra sady niforitra roa izany.

¹⁰Dia nasiany vato alatsaka an-tranontranony izany, vato efatra andalana: Ny andalana voalohany dia karnelia sy topaza ary emeraoda;

¹¹ny andalana faharoa dia robisy sy safira ary oniksa;

¹²ny andalana fahatelo dia opala sy agata ary ametista;

¹³ary ny andalana fahefatra dia krizolita sy berila ary jaspy. Nasiany randram-bolamena manodidina ny fitoerany avy.

¹⁴Ny vato dia nalahatra araka ny anaran’ny fokon’ny Zanak’Israely, roa amby folo araka ny anarany avy. Izy ireo dia nitondra ny anaran’ny foko roa amby folo, voasoratra toy ny amin’ny fitombo-kase.

¹⁵Nasiany rojo kely volamena tsy miharo, mifanolana toy ny tady, teo amin’ny saron-tratra.

¹⁶Nataony koa ny randram-bolamena roa sy mason-drojo volamena roa; ny mason-drojo dia natao teo amin’ny zorony roa ambony amin’ny saron-tratra.

¹⁷Ny tady volamena roa dia nataony teo amin’ny mason-drojo roa izay amin’ny zorony roa ambany amin’ny saron-tratra.

¹⁸Ny lanin’ny tady roa dia nataony teo amin’ny randram-bolamena roa, ary nataony teo amin’ny soroky ny efoda, teo anoloana.

¹⁹Nataony indray koa ny mason-drojo volamena roa, natsofony teo amin’ny zorony roa ambany amin’ny saron-tratra, amin’ny sisiny anatiny izay mikasika ny efoda.

²⁰Mbola nanao mason-drojo volamena roa koa izy ka napetany teo ambanin’ny soroka roa amin’ny efoda, eo anoloany, akaikin’ny fikambanany, ary eo ambonin’ny fehikibo momba ny efoda.

²¹Kofehy manga no namehezany ny mason-drojon’ny saron-tratra tamin’ny mason-drojon’ny efoda, mba ho eo ambonin’ny fehikibo momba ny efoda ny saron-tratra ka tsy hikisaka hiala eo, dia araka izay nandidian’NY TOMPO an’i Mosesy.

²²Nataony indray ny akanjobe misy ny efoda*, asan’ny mpanenona, ka nataony miloko manga tokam-bolo.

²³Ny vozon’ny akanjo ivelany dia teo afovoany tahaka ny vozon’ny akanjo fiarovan-tratra, ary nisy sisiny manodidina ny vozony mba tsy haharovitra azy.

²⁴Teo amin’ny morontongotry ny akanjobe dia nasiany sarin’ampongabendanitra miloko manga, volomparasy, jaky voahasina;

²⁵ary nanaovany lakolosy kely volamena tsy miharo, koa ny lakolosy kely dia natao teo anelanelan’ny ampongabendanitra tamin’ny morontongotry ny akanjobe manodidina, dia teo anelanelan’ny ampongabendanitra:

²⁶Lakolosy sy sarin’ampongabendanitra no mifanelanelana manodidina eo amin’ny morontongotry ny akanjobe izay hoentiny manao ny fanompoam-pivavahana, araka izay nandidian’NY TOMPO an’i Mosesy.

²⁷Lamba rongony fotsy madinika no nanaovany ny akanjo lava, asan’ny mpanenona, ho an’i Arona sy ny zanany.

²⁸Lamba rongony fotsy madinika koa no nanaovany ny fehiloha, ary ny satroka tsara tarehy ihany koa dia nataony tamin’ny lamba rongony fotsy madinika; ny kalisaonina fohy dia nataony tamin’ny lamba rongony fotsy madinika voahasina.

²⁹Ny fehikibo koa dia lamba rongony fotsy madinika voahasina, lamba manga, volomparasy ary jaky, asan’ny mpahay tenona samihafa soratra, araka izay nandidian’NY TOMPO an’i Mosesy.

³⁰Ary ny takelaka ho eo amin’ny diadema masina dia nataony amin’ny volamena tsy miharo sady nasiany soratra, araka ny fanoratana amin’ny fitombo-kase, hoe: NOHAMASININA HO AN’NY TOMPO.

³¹Dia nasiany kofehy manga hamehezana azy amin’ny fehiloha eo ambony, dia araka izay efa nandidian’NY TOMPO an’i Mosesy.

³²Dia vita ny asa rehetra tamin’ny tabernakely*, dia ny tranolay fihaonana*, satria efa nanatanteraka izay rehetra nandidian’NY TOMPO an’i Mosesy ny Zanak’Israely.

³³Dia noentiny teo amin’i Mosesy ny tabernakely, dia ny tranolay sy ny fanaka rehetra momba azy, ny farangony sy ny hazofisaka ary ny barany, ny andriny, ny faladiany,

³⁴ny rakotra hoditr’ondrilahy efa voaloko mena, ny sarona hoditra trozona, ny efitra lamba fanakonana,

³⁵ny vatan’ny Vavolombelona sy ny baony ary ny rakotra fanaovam-panavotana,

³⁶ny latabatra sy ny fanaka rehetra momba azy ary ny mofo atao fanatitra,

³⁷ny fitoeran-jiro volamena tsy miharo sy ireo jiro, dia ireo jiro izay halahatra eo aminy sy ny fanaka rehetra momba azy, ny diloilo hatao fanazavana,

³⁸ny alitara volamena, ny diloilo fanosorana, ny ditin-kazo mani-pofona, ny varavarana lamba ho eo amin’ny varavaran’ny tranolay,

³⁹ny alitara varahina sy ny makarakara varahina ho eo aminy ary ny baony sy ny fanaka rehetra momba azy, ny koveta sy ny faladiany,

⁴⁰ny fefy lamba eo amin’ny kianja sy ny andriny ary ny faladiany sy ny vavahady lamba eo amin’ny vavahadin’ny kianja, ny kofehiny, ny tsatòkan-day ary ny fiasana rehetra momba ny tabernakely, dia ny tranolay fihaonana,

⁴¹ny fitafiana fitondra amin’ny fanompoana, izay hoenti-manao fanompoam-pivavahana ao amin’ny fitoerana masina ho an’i Arona mpisorona ary ny fitafian’ireo zanany izay hoenti-manao fisoronana.

⁴²Araka izay rehetra nandidian’NY TOMPO an’i Mosesy, dia toy izany no nanaovan’ny Zanak’Israely ny asa rehetra.

⁴³Ary nijery ny asa rehetra i Mosesy ka indro, efa natao araka izay nandidian’NY TOMPO izany. Dia nitsodrano ny olona i Mosesy.