Read La Bible en Malgache Eksodosy 4 Bible Online

Eksodosy 4 - La Bible en Malgache bible

Eksodosy 4

¹Dia namaly i Mosesy hoe: Indro, tsy hino ahy na hihaino ny feoko izy ireo fa hilaza hoe: Tsy niseho taminao NY TOMPO!

²Hoy NY TOMPO taminy: Inona moa iny an-tananao iny? Dia hoy izy: Tehina.

³Ary hoy Izy: Atsipazo amin’ny tany iny. Dia natsipiny tamin’ny tany izany ka tonga menarana ary nandositra azy i Mosesy.

⁴Ary hoy NY TOMPO tamin’i Mosesy: Atsory ny tananao ka raiso amin’ny rambony iny. Dia natsotrany ny tanany ka noraisiny izany ary tonga tehina teo an-tanany indray.

⁵Izany dia mba hinoan’ireo fa efa niseho taminao NY TOMPO, Andriamanitry ny razany, dia Andriamanitr’i Abrahama sy Andriamanitr’Isaka ary Andriamanitr’i Jakoba.

⁶Hoy koa NY TOMPO taminy: Atsofohy ao an-tratranao ny tananao. Dia natsofony tao an-tratrany ny tanany, koa nony notsoahiny dia indro, boka ny tanany ka fotsy tahaka ny orampanala.

⁷Ary hoy indray Izy: Atsofohy ao amin’ny tratranao indray ny tananao. Dia natsofony tao an-tratrany indray ny tanany, koa nony notsoahiny tamin’ny tratrany dia indro, niverina tahaka ny teo aloha indray.

⁸Raha tsy hino anao izy ireo ka tsy hihaino ny feon’ny famantarana voalohany dia hino ny feon’ny famantarana manaraka.

⁹Raha toa ka tsy hino izany famantarana roa izany aza izy, na tsy hihaino ny feonao, dia haka rano avy ao Neily ianao ka hararakao amin’ny tany maina izany; fa izay rano alainao avy ao Neily dia ho tonga ra eo amin’ny tany maina.

¹⁰Ary hoy i Mosesy tamin’NY TOMPO: Tompo ô, mifona aminao aho, fa olona tsy mahay mandaha-teny, na hatramin’ny taloha, na hatramin’izao itenenanao amin’ny mpanomponao izao aza; votsa vava sy miadam-piteny anie aho e!

¹¹Dia hoy NY TOMPO taminy: Iza moa no nanome vava ho an’ny olona? Ary iza no mampahamoana, na mampaharenina, na mampahiratra, na mampahajamba? Tsy Izaho TOMPO va?

¹²Koa ankehitriny, mandehana, fa Izaho no homba ny vavanao ka hanoro anao izay holazainao.

¹³Nefa hoy izy: Tompo ô, mifona aminao aho, iraho izay hafa tianao hirahina.

¹⁴Dia nirehitra tamin’i Mosesy ny fahatezeran’NY TOMPO ka hoy Izy: Tsy ao ihany va i Arona levita* rahalahinao? Fantatro fa mahay mandaha-teny izy. Ary indro koa, avy hitsena anao izy. Koa rehefa mahita anao izy dia ho faly ny fony.

¹⁵Dia hiteny aminy ianao ka hametraka ny teny ao am-bavany; ary Izaho homba ny vavanao sy ny vavany ka hanoro anareo izay hataonareo.

¹⁶Ary izy no ho solovavanao hiteny amin’ny olona, ary ianao kosa dia ho solon’Andriamanitra ho azy.

¹⁷Dia hoentinao eny an-tananao io tehina io, izay hanaovanao ireo famantarana ireo.

¹⁸Dia lasa nandeha i Mosesy ka niverina nankany amin’i Jetro rafozany ary niteny taminy hoe: Miangavy anao aho, aoka aho handeha hiverina any amin’ny rahalahiko izay any Ejipta ka hijery na mbola velona ihany izy na tsia. Ary hoy i Jetro tamin’i Mosesy: Mandehana amin’ny fiadanana!

¹⁹Hoy NY TOMPO tamin’i Mosesy tany Midiana: Mandehana miverina any Ejipta fa efa maty ny olona rehetra izay nifofo ny ainao.

²⁰Dia nalain’i Mosesy ny vadiny sy ireo zanany lahy ka nampitaingeniny boriky dia niverina ho any amin’ny tany Ejipta izy. Ary noentin’i Mosesy teny an-tanany ilay tehin’Andriamanitra.

²¹Dia hoy NY TOMPO tamin’i Mosesy: Amin’izao fiverenanao mankany Ejipta izao, indreo ireo famantarana rehetra izay nataoko eo an-tananao, dia ataovy eo anatrehan’i Farao, fa Izaho hanamafy ny fony ka tsy handefa ny olona izy.

²²Dia lazao amin’i Farao hoe: Izao no lazain’NY TOMPO: Israely no zanako lahy, lahimatoako.

²³Koa efa nolazaiko taminao hoe: Avelao ny zanako handeha mba hanompo Ahy; kanjo nandà tsy namela azy handeha ianao; koa indro Aho hamono ny zanakao lahy, ny lahimatoanao.

²⁴Nony tany an-dalana, tao amin’ny fandriam-bahiny i Mosesy, dia nitsena azy NY TOMPO ka nitady hamono azy.

²⁵Dia naka fiharatra vato i Zipora ka namora ny zanany, ary izay nesoriny dia nakasony ny tongony ka hoy izy: Vady azoko tamin’ny fandatsahan-dra ianao!

²⁶Dia niala taminy Izy rehefa hoy Ravehivavy hoe: Vady azo tamin’ny fandatsahan-dra ianao, noho ny famorana.

²⁷Hoy NY TOMPO tamin’i Arona: Mandehana mitsena an’i Mosesy any an-tany efitra. Dia lasa nandeha izy ka nifanena taminy tao amin’ny tendrombohitr’Andriamanitra, dia nanoroka azy.

²⁸Ary nambaran’i Mosesy tamin’i Arona izay teny rehetra nanirahan’NY TOMPO azy sy izay famantarana rehetra nandidiany azy.

²⁹Dia lasa nandeha i Mosesy sy i Arona ka nanangona ny loholon’ny Zanak’Israely rehetra.

³⁰Dia nolazain’i Arona ny teny rehetra izay nolazain’NY TOMPO tamin’i Mosesy sady nataony teo imason’ny olona ny famantarana.

³¹Dia nino ny olona. Rehefa reny fa NY TOMPO efa namangy ny Zanak’Israely ka efa nitsinjo ny fahoriany dia niankohoka tamin’ny tany izy ka nivavaka.