Read La Bible en Malgache Eksodosy 40 Bible Online

Eksodosy 40 - La Bible en Malgache bible

Eksodosy 40

¹Ary NY TOMPO niteny tamin’i Mosesy hoe:

²Amin’ny andro voalohany amin’ny volana voalohany dia atsangano ny tabernakely* na ny tranolay fihaonana*.

³Ataovy ao ny vata misy ny Vavolombelona; dia ahantòny ny efitra lamba hanakona ny vata.

⁴Ento ny latabatra ka alaharo izay eo amboniny; ento koa ny fitoeran-jiro ka ampireheto ny jiro.

⁵Ny alitara volamena fandoroana ditin-kazo manitra dia ataovy eo anoloan’ny vata misy ny Vavolombelona, ary ny varavarana lamba dia apetaho eo amin’ny varavaran’ny tabernakely.

⁶Ny alitara fandoroana ny fanatitra dorana manontolo dia apetraho eo anoloan’ny tabernakely na ny tranolay fihaonana.

⁷Apetraho eo anelanelan’ny tranolay fihaonana sy ny alitara ny koveta dia asio rano ao anatiny.

⁸Dia amboary ny kianja manodidina ka ahantòny ny vavahady lamba eo amin’ny vavahadin’ny kianja.

⁹Avy eo dia alao ny diloilo fanosorana ka hosory ny tabernakely sy izay rehetra ao, ary hamasino miaraka amin’ny fanaka rehetra momba azy ka ho masina izany.

¹⁰Hosory ny alitara fandoroana ny fanatitra dorana manontolo sy ny fanaka rehetra momba azy; hamasino ny alitara dia ho masina indrindra.

¹¹Hosory ny koveta sy ny faladiany ka hamasino izany.

¹²Dia ampanatony i Arona sy ireo zanany hankeo anoloan’ny varavaran’ny tranolay fihaonana ka ampandroy amin’ny rano.

¹³Avy eo dia ampiakanjoy an’i Arona ny fitafiana masina ary hosory sy hamasino izy mba hanao ny fanompoam-pisoronana ho Ahy.

¹⁴Ampanatony ireo zanany ka ampiakanjoy azy ny akanjo lava.

¹⁵Dia hosory izy ireo, tahaka ny nanosoranao ny rainy, mba hanao fanompoam-pisoronana ho Ahy. Izany fanosorana azy ireo izany dia ho fisoronana maharitra hatramin’ny taranany fara aman-dimby.

¹⁶Dia nataon’i Mosesy izany, araka izay rehetra nandidian’NY TOMPO azy.

¹⁷Tamin’ny andro voalohany tamin’ny volana voalohany tamin’ny taona faharoa no nananganana ny tabernakely.

¹⁸Nanangana ny tabernakely* i Mosesy; napetrany ny faladiany ary natsangany ny hazofisaka momba azy dia nampidiriny ny barany ary natsangany ny andriny.

¹⁹Novelariny teo ambonin’ny tabernakely koa ny lay ary nataony teo amboniny ny rakotry ny tranolay, araka izay nandidian’NY TOMPO azy.

²⁰Dia nalainy ny Vavolombelona ka napetrany tao anatin’ny vata, ary ny bao dia nataony teo amin’ny vata, ny rakotra fanaovam-panavotana indray dia napetrany teo ambonin’ny vata.

²¹Ary ny vata dia nampidiriny tao amin’ny tabernakely ka nahantony ny efitra lamba fanakonana mba hanakona ny vata misy ny Vavolombelona, araka izay nandidian’NY TOMPO an’i Mosesy.

²²Napetrany tao amin’ny tranolay fihaonana* ny latabatra, teo amin’ny lafiny avaratra amin’ny tabernakely, teo ivelan’ny efitra lamba.

²³Ary nandahatra mofo teo amboniny teo anatrehan’NY TOMPO izy, araka izay nandidian’NY TOMPO an’i Mosesy.

²⁴Ny fitoeran-jiro dia napetrany tao amin’ny tranolay fihaonana, tandrifin’ny latabatra, teo amin’ny lafiny atsimo amin’ny tabernakely.

²⁵Dia nampirehitra ireo jiro teo anatrehan’NY TOMPO izy, araka izay nandidian’NY TOMPO azy.

²⁶Ny alitara volamena dia nataony tao amin’ny tranolay fihaonana, teo anoloan’ny efitra lamba,

²⁷ary nandoro ditin-kazo mani-pofona teo izy, araka izay nandidian’NY TOMPO an’i Mosesy.

²⁸Nataony teo amin’ny varavaran’ny tabernakely ny varavarana lamba.

²⁹Ny alitara fandoroana ny fanatitra dorana manontolo kosa dia napetrany teo anoloan’ny varavaran’ny tabernakely na ny tranolay fihaonana, ary nateriny teo ambonin’io ny fanatitra dorana manontolo sy ny fanatitra avy amin’ny zavamaniry, araka izay nandidian’NY TOMPO an’i Mosesy.

³⁰Ny koveta dia nataony teo anelanelan’ny tranolay fihaonana sy ny alitara ka nasiany rano ho fidiovana tao anatiny.

³¹Teo no nanadiovan’i Mosesy sy i Arona ary ireo zanany ny tongony aman-tanany.

³²Rehefa niditra ao amin’ny tranolay fihaonana mantsy izy ireo ka nanakaiky ny alitara dia nisasa, araka izay nandidian’NY TOMPO an’i Mosesy.

³³Natsangany koa ny kianja manodidina ny tabernakely sy ny alitara ka ny vavahady lamba dia nataony teo amin’ny vavahadin’ny kianja. Dia vitan’i Mosesy ny asa rehetra.

³⁴Ary nanarona ny tranolay fihaonana* ny rahona, ary ny voninahitry NY TOMPO dia nameno ny tabernakely*.

³⁵Tsy afaka niditra tao amin’ny tranolay fihaonana i Mosesy satria ny rahona dia nitoetra teo amboniny, ary ny voninahitry NY TOMPO dia nameno ny tabernakely.

³⁶Rehefa niakatra niala tamin’ny tabernakely ny rahona dia niainga ho amin’izay lalana halehany ny Zanak’Israely.

³⁷Fa raha tsy niakatra kosa ny rahona dia tsy niainga izy, mandra-piavin’izay andro hiakarany indray.

³⁸Fa ny rahon’NY TOMPO dia teo ambonin’ny tabernakely nony andro ary nisy afo teo aminy nony alina, teo imason’ny taranak’Israely rehetra, tamin’ny toerana rehetra nalehany.