Read La Bible en Malgache Eksodosy 5 Bible Online

Eksodosy 5 - La Bible en Malgache bible

Eksodosy 5

¹Rehefa afaka izany dia nankao amin’i Farao i Mosesy sy i Arona ka niteny taminy hoe: Izao no lazain’NY TOMPO, Andriamanitr’Israely: Avelao ny oloko handeha mba hanao andro firavoravoana ho Ahy any an-tany efitra.

²Hoy anefa i Farao: Iza moa NY TOMPO no hekeko teny ka hamelako ny Israely handeha? Tsy fantatro izay TOMPO ka tsy havelako handeha ny Israely.

³Dia hoy izy roa lahy: Andriamanitry ny Hebreo no nihaona taminay. Koa trara antitra ianao, avelao izahay handeha lalan-kateloana any an-tany efitra hamono zavatra hatao fanatitra ho an’NY TOMPO Andriamanitray, fandrao hamely anay amin’ny areti-mandringana na amin’ny sabatra Izy.

⁴Dia hoy ny mpanjakan’i Ejipta taminy: Nahoana ianareo, ry Mosesy sy i Arona, no manakivy ny olona amin’ny asany? Mandehana any amin’ny asa fanompoanareo!

⁵Ary hoy koa i Farao: Indro, efa maro ankehitriny ny olona eto amin’ny tany ka hampitsahatra azy amin’ny fanompoany va ianareo?

⁶Io andro io ihany, i Farao dia nandidy ireo mpampiasa ny vahoaka sy ireo mpifehy azy hoe:

⁷Aza omenareo mololo hanaovana biriky tahaka ny teo aloha intsony ny olona; izy ihany no aoka handeha hanangona mololo!

⁸Kanefa ny isan’ny biriky izay fanaony teo aloha dia mbola ampanaovy azy ihany fa aza ahenanareo; kamo mantsy izy ireo, koa izany no itarainany hoe: Aoka izahay handeha hamono zavatra hatao fanatitra ho an’Andriamanitray!

⁹Hamafiso ny fanompoan’ny olona mba ho lany andro amin’izany izy, fa aza avela ho variana amin’izay lainga foana!

¹⁰Dia nandeha ny mpampiasa ny olona mbamin’ny mpifehy azy ka niteny tamin’ireo hoe: Izao no lazain’i Farao: Tsy hanome mololo anareo intsony aho;

¹¹fa mandehana ianareo ka manangòna mololo any amin’izay hahitanareo any, ary ny fanompoanareo dia tsy hahena na dia kely akory aza.

¹²Dia niely manerana ny tany Ejipta rehetra ny olona mba hifako vodivary ho solon’ny mololo.

¹³Ary ny mpampiasa dia nandodona azy ireo hoe: Vitao ny asanareo, izay anjara fanompoana isanandro, tahaka ny fony mbola nisy mololo ihany!

¹⁴Ary ny mpifehy ny Zanak’Israely izay notendren’ny mpampiasa avy amin’i Farao hifehy azy dia nokapohina ka nanontaniana hoe: Ahoana no tsy nahavitanareo ny anjaranareo tamin’ny fanaovana ny biriky omaly sy androany, tahaka ny teo aloha?

¹⁵Dia nankao amin’i Farao ny mpampiasa ny Zanak’Israely ka nitaraina taminy hoe: Nahoana no manao toy izany amin’ny mpanomponao ianao?

¹⁶Tsy omena mololo tsinona izahay mpanomponao, nefa mbola tenenina ihany izahay hoe: Ataovy ny biriky! Ary indro izahay mpanomponao foana no nokapohina nefa ny vahoakanao no diso!

¹⁷Fa hoy i Farao: Olona kamo ianareo, olona kamo! Koa izany no itenenanareo hoe: Aoka izahay handeha hamono zavatra hatao fanatitra ho an’NY TOMPO!

¹⁸Ankehitriny, mandehana, tanteraho ny fanompoanareo, fa tsy hisy mololo homena anareo, nefa ny anjara birikinareo dia mbola hovitainareo ihany.

¹⁹Hitan’ireo mpifehy ny Zanak’Israely fa efa azon-doza izy noho ny nilazana hoe: Tsy hahenanareo ny isan’ny birikinareo amin’ny anjara fanompoana isanandro.

²⁰Koa rehefa niala avy tao amin’i Farao izy ireo dia tafahaona tamin’i Mosesy sy i Arona izay nijanona niandry azy.

²¹Hoy izy ireo tamin’i Mosesy sy i Arona: NY TOMPO anie hijery sy hitsara anareo, satria efa nataonareo mangidy hoditra eo anatrehan’i Farao sy eo anatrehan’ny mpanompony izahay ka nasianareo sabatra eo an-tanany hamonoany anay.

²²Ary niverina ho any amin’NY TOMPO i Mosesy ka niteny hoe: TOMPO ô, nahoana no nahatonga loza tamin’ity firenena ity Ianao? Nahoana re no naniraka ahy Ianao?

²³Fa hatrizay nankanesako tao amin’i Farao mba hiteny amin’ny anaranao izay dia nahatonga loza tamin’ity firenena ity izy; nefa Ianao tsy nanafaka ny olonao akory!