Read La Bible en Malgache Eksodosy 6 Bible Online

Eksodosy 6 - La Bible en Malgache bible

Eksodosy 6

¹Dia hoy NY TOMPO tamin’i Mosesy: Ankehitriny, ho hitanao izay hataoko amin’i Farao. Fa hisy tanana mahery hamelany azy handeha, ary hisy tanana mahery handroahany azy amin’ny taniny.

²Ary Andriamanitra niteny tamin’i Mosesy hoe: Izaho no TOMPO.

³Tamin’ny anarako hoe ANDRIAMANITRA TSITOHA no nisehoako tamin’i Abrahama sy Isaka ary i Jakoba, fa ny anarako hoe NY TOMPO tsy mbola nahafantarany Ahy.

⁴Ary naoriko taminy koa ny fanekeko hanomezako azy ny tany Kanana, dia ny tany fivahinianany izay efa nitoerany toy ny mpivahiny.

⁵Ary koa, Izaho efa nandre ny fitarainan’ny Zanak’Israely izay ampanompoin’ny Ejiptiana ka tsaroako ny fanekeko.

⁶Noho izany, lazao amin’ny Zanak’Israely hoe: Izaho no TOMPO; hitondra anareo hivoaka ho afaka amin’ny fanompoana mafy izay ampanaovin’ny Ejiptiana anareo Aho ka hanafaka anareo amin’ny fanompoana azy; sandry atsotra sy fitsarana lehibe no hanavotako anareo.

⁷Dia halaiko ho Ahy ianareo mba ho oloko ary Izaho ho Andriamanitrareo; dia ho fantatrareo fa Izaho no TOMPO Andriamanitrareo izay mitondra anareo mivoaka ho afaka amin’ny fanompoana mafy izay ampanaovin’ny Ejiptiana anareo.

⁸Hampiditra anareo any amin’ny tany izay nananganako tanana mba homena an’i Abrahama sy Isaka ary i Jakoba Aho; dia homeko ho fanananareo izany. Izaho no TOMPO.

⁹Ary nilaza izany tamin’ny Zanak’Israely i Mosesy. Nefa tsy nihaino an’i Mosesy izy ireo noho ny fahakiviany amin’ny fanompoana tsy ara-drariny.

¹⁰Ary NY TOMPO niteny tamin’i Mosesy hoe:

¹¹Mandehana ka lazao i Farao, mpanjakan’i Ejipta, mba hamela ny Zanak’Israely hiala amin’ny taniny izy.

¹²Nefa niteny teo anatrehan’NY TOMPO i Mosesy hoe: Indro, na dia ny Zanak’Israely aza dia tsy nihaino ahy, koa ahoana no hihainoan’i Farao ahy, nefa izaho dia tsy voafora molotra?

¹³Ary NY TOMPO niteny tamin’i Mosesy sy i Arona ka nanome teny azy momba ny Zanak’Israely sy momba an’i Farao, mpanjakan’i Ejipta, mba hamoahana ny Zanak’Israely avy amin’ny tany Ejipta.

¹⁴Ireto avy ny lohan’ny fianakaviany: Ny zanakalahin’i Robena, lahimatoan’Israely, dia i Hanoka, i Palo, i Hezrona ary i Karmy; ireo no fokom-pirenen’i Robena.

¹⁵Ary ny zanakalahin’i Simeona dia i Jemoela, i Jamina, i Ohada, i Jakina, i Zohara ary i Saoly, zanakalahin’ny vehivavy Kananita; ireo no fokom-pirenen’i Simeona.

¹⁶Ary izao no anaran’ny zanakalahin’i Levy, araka ny taranany, dia i Gersona sy i Kehata ary i Merary; fito amby telopolo amby zato taona ny andro niainan’i Levy.

¹⁷Ny zanakalahin’i Gersona dia i Libny sy i Simey, araka ny fokom-pireneny.

¹⁸Ny zanakalahin’i Kehata dia i Amrama, i Jizara, i Hebrona ary i Oziela. Telo amby telopolo amby zato taona ny andro niainan’i Kehata.

¹⁹Ny zanakalahin’i Merary dia i Maly sy i Mosy. Ireo no fokom-pirenen’ny levita*, araka ny taranany.

²⁰Ary i Amrama dia naka an’i Jokebeda anabavin-drainy ho vadiny, dia niteraka an’i Arona sy i Mosesy taminy izy. Fito amby telopolo amby zato taona ny andro niainan’i Amrama.

²¹Ary ny zanakalahin’i Jizara dia i Kora sy i Nefega ary i Zikry.

²²Ny zanakalahin’i Oziela dia i Misaela sy i Elzafana ary i Sitirỳ.

²³Ary i Arona dia naka an’i Eliseba, zanakavavin’i Aminadaba sady anabavin’i Nasona, ho vadiny; dia niteraka an’i Nadaba sy i Abiho ary i Eleazara sy Itamara taminy izy.

²⁴Ary ny zanakalahin’i Kora dia i Asira sy i Elkana ary i Abiasafa. Ireo no fokom-pirenen’ny Koraìta.

²⁵Ary i Eleazara, zanakalahin’i Arona, dia naka vady avy tamin’ny zanakavavin’i Potiela, ary niteraka an’i Finehasa taminy. Ireo no lohan’ny fianakavian’ny levita, araka ny fokom-pireneny.

²⁶Ireo no Arona sy Mosesy, izay nilazan’NY TOMPO hoe: Ento ny Zanak’Israely hivoaka avy any amin’ny tany Ejipta araka ny antokony.

²⁷Ireo no niteny tamin’i Farao, mpanjakan’i Ejipta, fa hitondra ny Zanak’Israely hivoaka avy any Ejipta. Ireo no Mosesy sy Arona.

²⁸Tamin’ny andro izay nitenenan’NY TOMPO tamin’i Mosesy teo amin’ny tany Ejipta

²⁹dia hoy NY TOMPO tamin’i Mosesy: Izaho no TOMPO. Lazao amin’i Farao, mpanjakan’i Ejipta, izay rehetra lazaiko aminao.

³⁰Nefa niteny teo anatrehan’NY TOMPO i Mosesy hoe: Indro, tsy voafora molotra aho, koa amin’ny fomba ahoana no hihainoan’i Farao ahy?