Read La Bible en Malgache Eksodosy 7 Bible Online

Eksodosy 7 - La Bible en Malgache bible

Eksodosy 7

¹Dia hoy NY TOMPO tamin’i Mosesy: Jereo, efa nataoko andriamanitra ho an’i Farao ianao; ary i Arona rahalahinao kosa dia ho mpaminaninao.

²Ianao no hilaza izay rehetra handidiako anao, ary i Arona rahalahinao kosa no hiteny amin’i Farao, mba hamelany ny Zanak’Israely hiala avy ao amin’ny taniny.

³Ary Izaho hanamafy ny fon’i Farao ka hanamaro ny famantarana sy ny fahagagana izay hataoko eto amin’ny tany Ejipta.

⁴Tsy hihaino anareo i Farao ka hamely an’i Ejipta ny tanako, ary fitsarana lehibe no hitondrako ny antokon’ny Zanak’Israely oloko hiala amin’ny tany Ejipta.

⁵Dia ho fantatry ny Ejiptiana fa Izaho no TOMPO, rehefa manatsotra ny tanako amin’i Ejipta Aho ka hitondra ny Zanak’Israely hivoaka avy eo anivony.

⁶Dia nataon’i Mosesy sy i Arona izany. Araka izay nandidian’NY TOMPO azy no nataony.

⁷Valopolo taona i Mosesy ary telo amby valopolo taona i Arona, fony niteny tamin’i Farao izy mirahalahy.

⁸Hoy NY TOMPO tamin’i Mosesy sy i Arona:

⁹Raha miteny aminareo i Farao hoe: Manaova famantarana, dia lazao amin’i Arona hoe: Raiso ny tehinao ka atsipazo eo anatrehan’i Farao dia ho tonga menarana iny.

¹⁰Dia nankao amin’i Farao i Mosesy sy i Arona ka nanatanteraka izay nandidian’NY TOMPO. Natsipin’i Arona teo anatrehan’i Farao sy teo anatrehan’ny mpanompony ny tehiny ka tonga menarana.

¹¹Nefa nampiantsoan’i Farao ny olon-kendry sy ny mpanao ody; ary ireo ombiasin’i Ejipta ireo dia mba nanao toy izany koa tamin’ny sikidiny.

¹²Dia samy nanipy ny tehiny avy izy ireo ka tonga menarana ireny. Nefa natelin’ny tehin’i Arona ny tehin’ireo.

¹³Dia nihamafy ny fon’i Farao ka tsy nihaino azy mirahalahy izy, araka izay efa nolazain’NY TOMPO.

¹⁴Ary hoy NY TOMPO tamin’i Mosesy: Mafy fo i Farao ka mandà tsy hamela ny olona handeha.

¹⁵Mankanesa ao aminy ianao rahampitso maraina; indro, handeha ho any amoron-drano izy; mijanòna eo amoron’i Neily ianao mandra-piaviny; ary ny tehina, ilay niova ho menarana, dia hoentinao eny an-tananao,

¹⁶dia lazao aminy hoe: NY TOMPO, Andriamanitry ny Hebreo, no naniraka ahy hankaty aminao hilaza hoe: Avelao ny oloko handeha mba hanompoany Ahy any an-tany efitra. Nefa indro, tsy nihaino ianao mandraka ankehitriny.

¹⁷Koa izao no lazain’NY TOMPO: Izao no hahafantaranao fa Izaho no TOMPO: Indro, ny tehiko etỳ an-tanako no hikapohako ny rano ao Neily ka ho tonga ra izany.

¹⁸Dia ho faty ny hazandrano ao Neily ka ho maimbo i Neily, ary tsy ho afaka hisotro ny rano avy ao Neily intsony ny Ejiptiana.

¹⁹Nanafatra an’i Mosesy koa NY TOMPO hoe: Lazao amin’i Arona hoe: Raiso ny tehinao ka atsory eo ambonin’ny ranon’i Ejipta ny tananao, dia eny ambonin’ny sampan-dranony, eny ambonin’ny lakandranony, eny ambonin’ny heniheniny ary eny ambonin’ny kamoriny rehetra, mba ho tonga ra ireny. Ary hisy ra manerana ny tany Ejipta manontolo, na amin’ny fitoeran-drano hazo na amin’ny fitoeran-drano vato.

²⁰Nataon’i Mosesy sy i Arona, araka izay nandidian’NY TOMPO, izany ka nanainga ny tehina izy dia nikapoka ny rano tao Neily teo imason’i Farao sy teo imason’ny mpanompony, ary tonga ra ny rano rehetra tao Neily

²¹ka maty ny hazandrano izay tao amin’i Neily. Tonga maimbo i Neily ka tsy azon’ny Ejiptiana nosotroina ny rano avy ao. Ary ny ra dia nanerana ny tany Ejipta manontolo.

²²Nefa mba nanao toy izany tamin’ny sikidiny koa ny ombiasy tany Ejipta dia nihamafy ny fon’i Farao ka tsy nihaino azy mirahalahy izy, araka izay efa nolazain’NY TOMPO.

²³Niverina nankao an-tranony i Farao sady tsy mba nahoany akory ny zava-nitranga.

²⁴Dia nihady rano hosotroiny teny amoron’i Neily teny ny Ejiptiana rehetra fa tsy azony nisotroana ny rano tao Neily.

²⁵Fito andro no lasa taorianan’ny namelezan’NY TOMPO an’i Neily.

²⁶Dia hoy NY TOMPO tamin’i Mosesy: Mankanesa ao amin’i Farao ka lazao aminy hoe: Izao no lazain’NY TOMPO: Avelao ny oloko handeha mba hanompo Ahy.

²⁷Fa raha mandà tsy hamela azy handeha ianao, indro Aho hamely ny taninao rehetra amin’ny sahona;

²⁸dia ho feno sahona i Neily, ary hiakatra ireny ka hiditra ao an-tranonao, ao an’efitrano fandrianao, eny ambonin’ny farafaranao, any amin’ny tranon’ny mpanomponao, any amin’ny vahoakanao ary eny amin’ny fatanao sy eny amin’ny vilia fanaova-mofonao.

²⁹Hiakaran’ny sahona eo aminao sy ny vahoakanao ary ny mpanomponao rehetra.