Read La Bible en Malgache Joba 1 Bible Online

Joba 1 - La Bible en Malgache bible

Joba 1

¹Nisy lehilahy iray tany amin’ny tany Oza, Joba no anarany. Marina sy mahitsy izany lehilahy izany sady natahotra an’Andriamanitra ka nifady ny ratsy.

²Niteraka fito lahy sy telo vavy izy.

³Ny fananany dia ondry aman’osy fito arivo, rameva telo arivo, omby arivo, borikivavy dimanjato ary mpanompo marobe. Nanankarena be mihoatra noho ny zanaky ny Atsinanana rehetra izany lehilahy izany.

⁴Fanaon’ny zanany lahy ny nifanasa ka nitety ny tranony avy, ary nandefa iraka naka ny anabaviny telo mirahavavy izy hiara-mihinana sy misotro aminy.

⁵Ary isaky ny tapitra nitsingerina ireo andro fanasana ireo dia nandefa iraka haka azy i Joba ka nanamasina ireny. Nifoha vao maraina izy ka nanolotra fanatitra dorana manontolo araka ny isan’izy rehetra; fa hoy i Joba: Fandrao nanota ny zanako ka nandà an’Andriamanitra tao am-pony. Izany no nataon’i Joba mandrakariva.

⁶Indray andro, nony avy ireo zanak’Andriamanitra* mba hiseho teo anatrehan’NY TOMPO, dia mba tonga teo koa i Satana* tafaharo taminy.

⁷Dia hoy NY TOMPO tamin’i Satana: Avy taiza ianao? Dia namaly NY TOMPO i Satana hoe: Avy nivezivezy teny ambonin’ny tany aho, nandehandeha teny.

⁸Hoy NY TOMPO tamin’i Satana: Efa nandinika an’i Joba mpanompoko va ianao? Fa tsy misy tahaka azy eny ambonin’ny tany, fa olona marina sy mahitsy izy sady matahotra an’Andriamanitra ka mifady ny ratsy.

⁹Ary i Satana dia namaly NY TOMPO hoe: Moa tsy fanantenan-javatra ihany va no atahoran’i Joba an’Andriamanitra?

¹⁰Tsy Ianao va no nanao fefy manodidina azy sy manodidina ny tranony ary manodidina izay ananany rehetra? Notahinao ny asan’ny tanany ka manenika ny tany ny omby aman’ondriny.

¹¹Fa atsory ange ny tananao ka tendreo izay ananany rehetra raha tsy handa Anao eo imasonao aza izy e!

¹²Dia hoy NY TOMPO tamin’i Satana: Indro, eo an-tananao izay ananany rehetra; fa ny tenany ihany no aza kasihin’ny tananao. Dia niala teo anatrehan’NY TOMPO i Satana.

¹³Indray andro, raha nihinana sy nisotro divay tao an-tranon’ny zokiny lahimatoa ny zanany lahy sy ny zanany vavy,

¹⁴dia nisy iraka tonga tany amin’i Joba ka nilaza hoe: Teo am-piasana ny omby ary nandrasana teo anilany ny borikivavy;

¹⁵nisy Sabeana namely azy tampoka ka namabo azy ary ny mpanompo dia nasiany tamin’ny lelan-tsabatra. Izaho dia izaho irery ihany no afa-nandositra hilaza aminao.

¹⁶Raha mbola niteny izy dia nisy iray koa tonga ka nilaza hoe: Nilatsaka avy tany an-danitra ny afon’Andriamanitra ary nandoro ny ondry aman’osy sy ny mpanompo ka nandevona azy. Izaho dia izaho irery ihany no afa-nandositra hilaza aminao.

¹⁷Raha mbola niteny izy dia nisy iray koa tonga ka nilaza hoe: Nisy Kaldeana nanao telo toko, niroatra nankeny amin’ny rameva izy ireo ka namabo azy ary ny mpanompo dia nasiany tamin’ny lelan-tsabatra. Izaho dia izaho irery ihany no afa-nandositra hilaza aminao.

¹⁸Raha mbola niteny izy dia nisy iray koa tonga ka nilaza hoe: Ny zanakao lahy sy ny zanakao vavy dia nihinana sy nisotro divay tao an-tranon’ny zokiny lahimatoa;

¹⁹ary indro, nisy rivotra mahery avy tany an-tany efitra ka namely ny zoron-trano efatra, dia nianjera tamin’ny zatovo ny trano ka maty izy rehetra. Izaho dia izaho irery ihany no afa-nandositra hilaza aminao.

²⁰Dia nitsangana i Joba ka nandriatra ny akanjobeny ary nanaratra ny lohany dia niankarapoka tamin’ny tany

²¹sady niteny hoe: Nitanjaka no nivoahako avy tany an-kibon’Ineny ary mitanjaka no hiverenako any; NY TOMPO no nanome ary NY TOMPO no nanaisotra; isaorana anie ny anaran’NY TOMPO!

²²Tamin’izany rehetra izany dia tsy nanota i Joba na nanome tsiny an’Andriamanitra.