Read La Bible en Malgache Joba 10 Bible Online

Joba 10 - La Bible en Malgache bible

Joba 10

¹Maharikoriko ahy ny aiko! Hamoaka ny fitarainako aho ary hiteny noho ny fangidian’ny fanahiko.

²Hiteny amin’Andriamanitra aho hoe: Aza manameloka ahy! Mba ampahalalao ahy izay anton’ny iadianao amiko!

³Mahafaly Anao va ny hampahory sy hanary ny efa nisasaran’ny tananao ka hamirapiratra amin’ny fisainan’ny ratsy fanahy Ianao?

⁴Manana maso nofo va Ianao na mijery tahaka ny fijerin’ny zanak’olombelona?

⁵Tahaka ny andron’ny zanak’olombelona va ny andronao na tahaka ny taonan’ny olombelona va ny taonanao

⁶no dia mikaroka izay heloko Ianao ary mikatsaka izay fahotako,

⁷na dia fantatrao aza fa tsy mba ratsy fanahy aho ary tsy misy mahavonjy amin’ny tananao?

⁸Ny tananao ihany no namorona ahy ka nanisy endrika izao tenako rehetra izao, kanjo levoninao indray aho izao!

⁹Miangavy Anao aho, tsarovy fa notefenao toy ny tanimanga aho, koa hamerina ahy amin’ny vovoka indray va Ianao!

¹⁰Tsy naidinao toy ny ronono va aho ka nampandrinao toy ny rononomandry?

¹¹Eny, notafianao hoditra sy nofo aho ary norarinao tamin’ny taolana sy ny ozatra.

¹²Aina sy famindrampo no nomenao ahy ary ny fiahianao no niaro ny fofonaiko.

¹³Saingy izao no nafeninao tao am-ponao; eny, fantatro fa tao Aminao izao:

¹⁴Raha manota aho dia mamantatra ahy Ianao ka tsy manafaka ahy amin’ny heloko.

¹⁵Raha meloka aho dia lozako! Ary na dia marina aza aho dia tsy ho sahy miandrandra satria feno henatra sady mahatsiaro fahoriana aho.

¹⁶Fa raha sahy miandrandra aho dia hihaza ahy tahaka ny liona masiaka Ianao ary hiverina indray Ianao ka ho mahagaga ny famelinao ahy.

¹⁷Mbola hanangana vavolombelona vaovao mandrakariva hanameloka ahy Ianao ary hampitombo ny fahatezeranao amiko; fahavalo mifanontona no mamely ahy.

¹⁸Koa nahoana no namoaka ahy foana avy tany am-bohoka Ianao? Fa raha tsy izany dia ho niala aina aho ka tsy mba nisy maso nahita ahy akory,

¹⁹ary efa toy ny tsy ary aho ka noentina avy tany an-kibo ho any am-pasana.

²⁰Tsy vitsy va ny androko? Koa mitsahara Ianao, mihataha mba hakako aina kely,

²¹dieny tsy mbola lasa ka tsy hiverina intsony aho, dia ho any amin’ny tanin’ny haizina sy ny aloky ny fahafatesana,

²²ho any amin’ny tany maizim-pito, dia ny an’ny aloky ny fahafatesana sy ny fikorontanana sady maizim-pito ny famirapiratana any!