Read La Bible en Malgache Joba 11 Bible Online

Joba 11 - La Bible en Malgache bible

Joba 11

¹Dia nandray fitenenana i Zofara namatita hoe:

²Moa tsy hovaliana va ny teny be toy izany? Ary moa raha maro vava dia ho marina va?

³Ny bedibedinao va no hampangina ny olona? Dia haniratsira ianao ka tsy hisy handresy lahatra?

⁴Hoy ianao: Madio ny teny nalahatro ary tsy nanan-tsiny teo imasonao aho.

⁵Enga anie ka hiteny Andriamanitra ka hiloa-bava hamaly anao!

⁶Dia hasehony aminao ny fahendrena miafina fa tsy hita lany izany, koa ho fantatrao fa navelan’Andriamanitra ny helokao sasany.

⁷Takatry ny sainao va ny fomban’Andriamanitra? Ary hitanao va hatrany amin’ny fahatanterahan’ny Tsitoha?

⁸Avo tahaka ny lanitra izany ka inona no hainao atao? Lalina noho ny fitoeran’ny maty* izany ka inona no fantatrao?

⁹Mihoatra noho ny tany ny fivelarany ary lehibe noho ny ranomasina.

¹⁰Raha mandroso Izy ka misambotra ary manao fitsarana dia iza moa no mahasakana Azy?

¹¹Fa Izy mahafantatra ny olon-dratsy ary hitany ny heloka na dia tsy mandinika akory aza Izy.

¹²Fa ny fahendren’olombelona dia fahendrena poakaty ary raha vao teraka izy dia toy ny zanaky ny borikidia.

¹³Fa raha ampanatrehinao Azy ny fonao ary atantinao Aminy ny tananao

¹⁴ka misy heloka eo an-tananao dia ario lavitra izany ary aza avela hisy ratsy hitoetra ao an-dainao;

¹⁵dia hahazo hanandratra ny tavanao tsy misy tsiny ianao, koa hijoro tsara ary tsy hatahotra;

¹⁶fa ho hadinonao ny fahorianao: toy ny rano efa nandalo no hahatsiarovanao azy.

¹⁷Ary hamirapiratra lavitra noho ny mitataovovonana ny andronao; na dia sendra manjombona aza dia ho tonga tahaka ny maraina.

¹⁸Hatoky ianao satria misy ny fanantenana; eny, hijery manodidina ianao ka handry tsy amin’ahiahy.

¹⁹Dia ho tafandry ianao fa tsy hisy hanaitaitra ary maro no hila sitraka aminao.

²⁰Fa ny mason’ny ratsy fanahy kosa dia ho pahina ka ho levona avokoa ny toeram-pialofany ary ny fialana aina ihany no hany sisa azony antenaina.