Read La Bible en Malgache Joba 12 Bible Online

Joba 12 - La Bible en Malgache bible

Joba 12

¹Dia namaly i Joba hoe:

²Marina ary fa ianareo ihany tokoa no olombelona ary hiara-maty aminareo ny fahendrena!

³Kanefa izaho dia mba manan-tsaina tahaka anareo ihany koa; tsy latsaka noho ianareo aho; fa iza moa no tsy nahalala izay zavatra toy izany?

⁴Tonga fihomehezan’ny sakaizako aho, dia izaho izay niantso an’Andriamanitra ka novaliny; eny, tonga fihomehezana ny olona marina tsy manan-tsiny.

⁵Latsa no anjaran’ny ozoim-pahoriana! Izany no hevitry ny olo-miadana; eny, efa vonona ho an’izay mangozohozo izany.

⁶Mandry fehizay ny tranolain’ny mpitohatoha ary mitoetra tsy manahy izay sahy mampahatezitra an’Andriamanitra; eny, izay mihazona an’Andriamaniny eo an-tanany.

⁷Kanefa anontanio ange ny biby fa hampianatra anao izy ary ny voromanidina fa hanambara aminao izy;

⁸makà saina amin’ny tany dia hampianatra anao izy; ary ny hazandrano any an-dranomasina no hampahafantatra anao.

⁹Iza no tsy mahalala raha mandinika ireny rehetra ireny, fa ny nanao izany dia ny tanan’NY TOMPO

¹⁰izay mitana ny ain’ny zavamananaina rehetra sy ny fofonain’ny olombelona rehetra?

¹¹Moa tsy ny sofina va no mamantatra ny teny? Ary tsy ny vava va no manandrana ny hanina?

¹²Ao amin’ny fotsy volo ny fahendrena ary ny fahelavelona no ahazoam-pahalalana.

¹³Ao amin’Andriamanitra kosa no misy fahendrena sy hery. Izy no manana fanoloran-tsaina sy fahalalana.

¹⁴Indro, izay ravany dia tsy hatsangana intsony; izay olona hidìny dia tsy hovohana.

¹⁵Indro, mihazona ny rano Izy dia ritra iny ary alefany indray ka manimba ny tany.

¹⁶Izy no manana hery sy tena fahendrena; samy eo an-tanany avokoa ny voafitaka sy ny mpamitaka.

¹⁷Alàny voninahitra ny mpanolotsaina ary ataony very saina ny mpitsara.

¹⁸Vahàny ny fanapahan’ny mpanjaka ka sikina no ampanaoviny azy.

¹⁹Alàny voninahitra ny mpisorona ary azerany ny mafy orina hatry ny ela.

²⁰Koroiny ny lahatenin’ny mahay ary esoriny ny hazavan-tsain’ny zokiolona.

²¹Mandrotsaka fandatsana amin’ny andriandahy Izy ary mampiketraka ny fehikibon’ny matanjaka.

²²Manala rakotra izay lalina Izy mba tsy ho maizina ary mitondra ny aloky ny fahafatesana ho eo amin’ny mazava.

²³Mahalehibe ny firenena Izy nefa mandringana azy koa; mampihahaka ny firenena Izy nefa mitondra azy hody indray.

²⁴Mahavery saina ny loholona amin’ny tany Izy ary mampirenireny azy any amin’ny tany efitra tsy misy lalana;

²⁵mitsapatsapa amin’ny maizina tsy misy mavaza ireo ary mampivembena azy tahaka ny olona mamo Izy.