Read La Bible en Malgache Joba 14 Bible Online

Joba 14 - La Bible en Malgache bible

Joba 14

¹Ny olona tera-behivavy! Vitsy andro izy sady vontom-pahoriana.

²Toy ny voninkazo izy: Mitsimoka dia mihamalazo. Mihelina tahaka ny aloka izy ka tsy maharitra.

³Kanefa amin’izay toy izany foana no ampihiratanao ny masonao ka izay izaho avy no entinao hifandahatra Aminao amin’ny fitsarana!

⁴Iza no olona madio ateraky ny tsy madio? Tsy misy na dia iray akory aza.

⁵Raha voafetra ny androny ary voatendrinao ny isan’ny volana iainany ary asianao fefy tsy azony ihoarana

⁶dia mitodiha tsy hanatrika azy Ianao mba hitsaharany ka hifaliany amin’ny androny toy ny mpikarama.

⁷Fa azo antenaina ny hazo satria na dia kapaina aza izy dia mbola hitsimoka indray ka tsy maintsy hisy ny solofony;

⁸na dia efa tonga antitra ao anaty tany aza ny fotony ary maty ao amin’ny vovoka ny vatany,

⁹raha mahare ny fofon-drano izy, dia hitsimoka indray ka handrahaka tahaka ny hazo tanora nambolena.

¹⁰Fa ny olona kosa dia maty ka miampatra; eny, miala aina ny olona, dia aiza izy?

¹¹Misintona ny rano ka miala amin’ny ranomasina; mihena ny ony ka ritra,

¹²ary toy izany koa ny olona; mandry izy ka tsy hiarina intsony; eny, raha mbola misy koa ny lanitra dia tsy hahatsiaro izy na hofohazina amin’ny torimasony.

¹³Enga anie ka hanafina ahy any amin’ny fitoeran’ny maty* Ianao ka hanafina ahy mandra-pahafaka ny fahatezeranao ary hanendry fetrandro ho ahy ka hahatsiaro ahy.

¹⁴Raha maty ny olona, moa mety ho velona indray va izy? Raha izany dia hiandry aho mandritra ny fotoam-panompoako, mandra-pahatongan’ny fanafahana ahy.

¹⁵Dia hiantso Ianao ary hamaly Anao aho ary mba halahelo ny asan’ny tananao Ianao.

¹⁶Ankehitriny, manisa ny diako Ianao; nefa amin’izay fotoana izay, tsy handinika ny fahotako Ianao,

¹⁷fa ho voaisy tombo-kase ny kitapo misy ny fahadisoako, ary ho voalalotrao tsy ho hita ny heloko.

¹⁸Kanefa na dia ny tendrombohitra aza raha mianjera dia ho potika ary ny vatolampy dia hifindra hiala amin’ny toerany;

¹⁹lanin’ny rano ny vato ary indaosin’ny riaka ny vovo-tany; toy izany no fanimbanao ny fanantenan’ny zanak’olombelona.

²⁰Mandresy azy ho mandrakizay Ianao dia lasa izy; manova ny tarehiny Ianao, avy eo dia mandroaka azy.

²¹Omem-boninahitra va ny zanany? Tsy fantany akory izany. Voaetry va ireo? Tsy hitany akory izany.

²²Ny mihatra amin’ny nofony ihany no mampanaintaina azy ary ny mihatra amin’ny tenany ihany no mampitaraina azy.