Read La Bible en Malgache Joba 15 Bible Online

Joba 15 - La Bible en Malgache bible

Joba 15

¹Dia nandray fitenenana i Elifaza temanita:

²Tokony handahatra hevi-dravina va ny olon-kendry ka hameno ny kibony amin’ny rivotra avy any atsinanana?

³Hamaly amin’ny teny tsy mahasoa sy ny teny tsy mahatsara va izy?

⁴Eny, foananao ny fahatahorana an’Andriamanitra ary tampenanao ny dinika eo anatrehany;

⁵fa ny helokao no manesika ny vavanao ary mifidy ny fitenin’ny olom-petsy ianao.

⁶Ny vavanao ihany no manameloka anao fa tsy izaho ary ny molotrao ihany no mamely anao.

⁷Ianao va no olombelona nateraka voalohany? Sa, naloaky ny kibo talohan’ny havoana va ianao?

⁸Ianao va nihaino teo amin’ny filankevitra teo amin’Andriamanitra ka voarombakao ho anao irery ny fahendrena?

⁹Inona no fantatrao ka tsy mba fantatray koa na saina azonao ka tsy ato aminay koa?

¹⁰Ny zokiolona sy ny fotsy volo dia misy ato aminay; eny, olona ela niainana noho ny rainao aza.

¹¹Ataonao ho tsinontsinona va ny fampiononana avy amin’Andriamanitra sy ny teny natao taminao amin’ny halemem-panahy?

¹²Nahoana no dia entin’ny fonao ianao? Ary nahoana no mikimpikimpy foana ny masonao

¹³ka miefonefona amin’Andriamanitra ianao sady miteniteny foana ny vavanao?

¹⁴Inona ny zanak’olombelona no mba hadio izy? Ary izay tera-behivavy no mba ho marina?

¹⁵Indro ireo masiny aza dia tsy mahatoky Azy ary ny lanitra aza dia tsy madio eo imasony;

¹⁶koa mainka fa izay vetaveta sy tena ratsy, dia ny olona izay misotro heloka toy ny rano!

¹⁷Hanambara aminao aho ka mihainoa ahy, fa izay efa hitako no hotantaraiko,

¹⁸dia zavatra notorin’ny olon-kendry fa tsy nafeniny, dia izay azony avy tamin’ny razany.

¹⁹Ireny ihany no nomena ny tany ary tsy nisy olona hafa firenena nisisika teo aminy.

²⁰Mijalijaly amin’ny androny rehetra ny ratsy fanahy, na firy na firy ny taona voatendry ho an’ny mpampihorohoro.

²¹Feo mampitahotra no ren’ny sofiny ary na dia miadana aza izy dia avy hamely azy ihany ny mpandroba.

²²Tsy manantena ho afaka amin’ny maizina izy; miandry azy ny sabatra.

²³Mirenireny hitady izay hohaniny izy ka miteny hoe: Aiza re? Fantany fa antomotra azy ny andro maizina.

²⁴Fahoriana sy fahaporetana no mampitahotra azy. Mandresy azy ireo tahaka ny mpanjaka efa vonona ho amin’ny ady

²⁵satria nanatsotra ny tanany hanohitra an’Andriamanitra izy ary nirehareha hanohitra ny Tsitoha.

²⁶Mimaona amin’ny hamafian-katoka izy hamely Azy, dia amin’ny vohon’ny ampingany matevina.

²⁷Rakotry ny tavy ny tarehiny ary mivalon-kotraka ny andilany;

²⁸nefa honina ao amin’ny tanàna rava izy, dia ao amin’ny trano tsy tokony hitoeran’olona, izay voatendry ho korontam-bato.

²⁹Tsy hanankarena intsony izy sady tsy haharitra ny heriny ka tsy ho vokatra ambonin’ny tany ny fananany.

³⁰Tsy ho afaka hiala amin’ny maizina izy; ny solofony dia hikainkona azon’ny lelafo; ho levon’ny fofonain’Andriamanitra izy.

³¹Aoka tsy ho voafitaka hatoky zava-poana izy, fa zava-poana no ho valiny homena azy.

³²Raha mbola tsy tonga aza ny fetrandrony dia manjo azy izany ary tsy ho maitso ny sampany.

³³Ho tahaka ny voaloboka manintsana ny voany manta izy ary ho tahaka ny hazo oliva mampiraraka ny voniny.

³⁴Fa tsy ho vanona ny ankohonan’ny mpihatsaravelatsihy ary ho lanin’ny afo ny tranolain’ny mpitoroka.

³⁵Torontoronina fampahoriana izy ka miteraka fasiahana ary ny kibony dia mamorom-pitaka.