Read La Bible en Malgache Joba 16 Bible Online

Joba 16 - La Bible en Malgache bible

Joba 16

¹Dia namaly i Joba hoe:

²Efa nandre zavatra maro toy izany aho; mpampionona mahasorena foana ianareo rehetra.

³Efa tapitra va izay ny bedibedy foana? Sa mbola misy manesika anao hamaly ahy ihany?

⁴Izaho kosa dia mba nahazo niteny tahaka anareo raha mba tamin’ny toerana misy ahy ianareo; eny, ho nahazo nandahatra teny hoenti-mamely anareo aho ary nahazo mihifikifi-doha aminareo;

⁵nahazo nampahery anareo tamin’ny vavako aho ary nahazo nampitony ny alahelonareo ny fampiononana nataon’ny molotro.

⁶Fa raha miteny aho dia tsy mitsahatra ny alaheloko; ary raha mangina aho, ahoana no hialany amiko?

⁷Fa ankehitriny dia efa nandemy ahy Izy; naringanao ny ankohonako rehetra.

⁸Nampifezaka ny tenako Ianao ka tonga vavolombelona mamely ahy izany. Mitsangana hiampanga ahy ny fahiazako ka tondro-maso mifanatrika izany.

⁹Amin’ny fahatezerany no amiravirany sy andrafiany ahy, mihidy vazana amiko Izy; eny, miseho ho fahavaloko Izy ka mampivandravandra ny masony amiko;

¹⁰nisanasana vava tamiko ny olona; latsa no noentiny namely ny takolako; mitambatra hamely ahy izy.

¹¹Efa voatolotr’Andriamanitra ho amin’ny ratsy fanahy aho ary natsipiny ho eo an-tanan’ny mpanota.

¹²Tamin’ilay izaho tsy nanana ahiahy iny dia nanozongozona ahy Izy; nosamboriny tamin’ny hatoko aho ka nomontsaniny ary natsangany indray ho marika hokendreny.

¹³Manodidina ahy ny zana-tsipìkany; mamaky ahy hatrany anatiko Izy ka tsy miantra ary mandraraka ny aferoko ho amin’ny tany.

¹⁴Tsy mitsahatra manisy banga amiko Izy ka miroatra hamely ahy tahaka ny mpiady mahery.

¹⁵Lamba fisaonana no voazaitrako hanarona ny hoditro ary nalako baraka teo amin’ny vovoka ny tandroko*.

¹⁶Teramenan’ny fitomaniana ny tavako ary eo amin’ny hodimasoko ny aloky ny fahafatesana.

¹⁷Kanefa tsy misy eto an-tanako izay mba nalaina an-keriny ary madio ny vavaka ataoko.

¹⁸Ry tany ô, aza manarona ny rako ary aoka tsy ho voahazona ny fitarainako!

¹⁹Fa na dia ankehitriny izao aza, indro, any an-danitra ny Vavolombeloko; eny, ny Mpiantoka ahy dia any amin’ny avo.

²⁰Mihomehy ahy ny sakaizako; mandrotsa-dranomaso eo anatrehan’Andriamanitra kosa aho

²¹mba hanamarina ahy olombelona eo anatrehany Izy ary hanafa-tsiny ahy zanak’olombelona amin’ny sakaizako.

²²Fa efa kely sisa ny taona hiainako ka handeha any amin’ny lalana izay tsy hiverenako intsony aho.