Read La Bible en Malgache Joba 17 Bible Online

Joba 17 - La Bible en Malgache bible

Joba 17

¹Efa ho ritra ny aiko, efa mitsilopilopy ny androko, efa miandry ahy ny fasana.

²Eny, mpaneso avokoa no manodidina ahy ary tsy mamela ahy hahita torimaso ny filany ady amiko.

³Miangavy anao aho, aoka ny tenanao ihany no hiantoka ahy aminao; fa iza moa no hanaiky hiantoka ahy?

⁴Fa ny fon’ireto dia voahidinao tsy hidiran’ny fahalalana; koa izany no tsy hanandratanao azy.

⁵Toy ny lehilahy manasa ny sakaizany hizara fananana izy nefa pahina ny mason’ny zanany.

⁶Ary efa nanao ahy ho ambentinteny amin’ny firenena Izy ary ny tavako ho fandrora.

⁷Efa pahina ny masoko noho ny alahelo; efa toy ny aloka ny rantsambatako rehetra.

⁸Ankona noho izany ny olona mahitsy ary ny tsy manan-tsiny dia mihendratra mahita ny mpihatsaravelatsihy.

⁹Fa ny marina dia mifikitra tsara amin’ny alehany ary izay madio tanana no hitombo hery.

¹⁰Ianareo rehetra ireo, avia! Miverena e! Tsy mahita olon-kendry eo aminareo aho.

¹¹Mihelina ny androko, voaongotra ny fikasako, dia izay hevitra nofikirin’ny foko indrindra.

¹²Ny alina dia ataon’ireny ho antoandro ary ny mazava dia ho efa akaiky, nefa tamy ihany ny maizina.

¹³Raha mbola misy antenaiko dia ny fitoeran’ny maty* fonenako ihany; ao amin’ny maizina no hamelarako ny fandrianako.

¹⁴Ny fasana no nantsoiko hoe: Ianao ho raiko! Ary ny kankana: Ianao no reniko sy anabaviko!

¹⁵Fa aiza ary ny fanantenako? Ary iza no mahita azy?

¹⁶Midina any amin’ny vavahadin’ny fitoeran’ny maty izany raha miara-mahita fitsaharana ao amin’ny vovoka izahay.