Read La Bible en Malgache Joba 18 Bible Online

Joba 18 - La Bible en Malgache bible

Joba 18

¹Dia namaly i Bildada sohita hoe:

²Mandra-pahoviana no hanisy fandrika amin’ny teny ianareo? Mba hendre aloha dia vao hiteny izahay.

³Sao ataonareo ho biby anie izahay ka tahaka ny maloto eo imasonareo?

⁴Ry ilay mamiravira tena amin’ny fahatezerana, noho ny aminao va no hahatonga ny tany ho lao ary ny vatolampy hafindra hiala amin’ny toerany?

⁵Eny, ho faty ny jiron’ny ratsy fanahy ary hitsilopilopy ny lelafony;

⁶ny mazava dia hanjary maizina ao amin’ny tranolainy ary ny jirony eo amboniny dia ho faty.

⁷Ny diany izay navitrika teo aloha dia hiha ety ary ny fisainany ihany no handavo azy.

⁸Fa ny tongony ihany no mahatonga azy eo amin’ny fandrika harato ka manitsaka eo amin’ny harato izy;

⁹azon’ny fandrika ny voditongony ary voahazon’ny tadivavarana;

¹⁰miafina ao amin’ny tany ny fandrika haningotra azy ary ny tonta dia efa vonona eny an-dalana.

¹¹Manodidina azy ny fampitahorana mampihorohoro azy ka mampivadi-po azy eny amin’ny alehany rehetra.

¹²Hamely azy ny mosary raha mbola ao amin’ny heriny izy ary efa vonona eo anilany ny fandringanana

¹³ka handany tsikelikely ny hodiny; ny ratsambatany dia lanin’ny lahimatoan’ny fahafatesana.

¹⁴Ongotana hiala amin’ny tranolainy izay nitokiany izy ka hoentinao eo amin’ilay mpanjaka mampahatahotra indrindra.

¹⁵Mahazo mitoetra ao an-dainy ianao: Tsy azy intsony izany; solifara no hafafy amin’ny fonenany.

¹⁶Maina ny fotony ao ambany ary tapaka ny rantsany eo ambony.

¹⁷Ho very tsy ho eo amin’ny tany ny fahatsiarovana azy ary tsy malaza eny ivelany izy.

¹⁸Roahina hiala amin’ny mazava ho any amin’ny maizina izy ary enjehina hiala amin’izao tontolo izao.

¹⁹Tsy manana fara aman-dimby eo amin’ny fireneny izy ka tsy misy olona tavela ao amin’ny toerana nonenany.

²⁰Ny manjo azy dia italanjonan’ny any andrefana ary raiki-tahotra ny any atsinanana.

²¹Izany tokoa no iafaran’ny fonenan’ny ratsy fanahy ary izany no manjo ny toeran’ny tsy mahalala an’Andriamanitra!