Read La Bible en Malgache Joba 19 Bible Online

Joba 19 - La Bible en Malgache bible

Joba 19

¹Dia namaly i Joba hoe:

²Mandra-pahoviana no hampalahelovanareo ny fanahiko sy hanorotoroanareo ahy amin’ny fiteny?

³Efa impolo izay no nanaratsianareo ahy; tsy menatra ny hampahory ahy ianareo.

⁴Raha diso tokoa aho dia izaho ihany no andrian’ny fahadisoako.

⁵Raha mirehareha amiko kosa ianareo ka mampiaiky ahy ho nanao izay mahamenatra

⁶dia aoka ho fantatrareo fa Andriamanitra no efa nampitanondrika ahy ka efa naningotra ahy tamin’ny fandrika haratony.

⁷Indro, miantso mafy aho hoe: Loza! Nefa tsy misy mamaly ahy; mitaraina aho, nefa tsy mahita rariny!

⁸Ny lalako dia nofefeny ka tsy afa-mandroso aho; nasiany haizina eo amin’ny lalana alehako.

⁹Ny voninahitro dia nalany tamiko ary nesoriny ny satroboninahitra teo an-dohako.

¹⁰Efa nandrava ahy manodidina Izy ka efa ho faty aho; efa nofongorany tahaka ny hazo ny fanantenako.

¹¹Nampirehetiny tamiko ny fahatezerany ka nataony ho fahavalony aho.

¹²Miara-mandroso ny antokon’ny miaramilany ary manandratra tovon-tany hamelezany ahy izy ka mitoby manodidina ny tranolaiko.

¹³Ny rahalahiko dia efa nampanalaviriny ahy ary ny olona nahazatra ahy dia mihafahafa amiko avokoa.

¹⁴Tsy misy eto intsony ny havako ary ny sakaizako dia efa nanadino ahy.

¹⁵Ny vahiny izay mitoetra ao an-tranoko sy ny mpanompovaviko aza dia samy manao ahy ho olon-kafa; tonga olon-ko azy eo imasony aho.

¹⁶Antsoiko ny mpanompoko nefa tsy namaly ahy izy; mifona aminy amin’ny vavako aho.

¹⁷Ny fofonaiko dia mahaloiloy ny vadiko ary maharikoriko ny zanak’Ineny aho.

¹⁸Eny, ny ankizilahy madinika aza dia mamingavinga ahy; raha te hitsangana aho dia miteny mamely ahy ireny.

¹⁹Na dia izay nifankazatra tamiko indrindra aza dia manao ahy ho zava-betaveta ary izay olon-tiako dia mivadika ho fahavaloko.

²⁰Ny taolako dia miraikitra amin’ny hoditro sy ny nofoko ary ny akanjonifiko ihany no hany sisa azoko enti-mandositra.

²¹Mamindrà fo amiko, mamindrà fo amiko ianareo, ry sakaizako ô, fa namely ahy ny tanan’Andriamanitra.

²²Nahoana no manenjika ahy tahaka an’Andriamanitra koa ianareo ka tsy mety afa-po amin’ny nofoko?

²³Enga anie ka ho voasoratra ny teniko! Enga anie ka ho voasokitra ao amin’ny boky ireny!

²⁴Enga anie ka ho voasoratra amin’ny vy fanoratana sady voaisy firaka eo amin’ny vatolampy ho mandrakizay izy!

²⁵Kanefa raha izaho dia fantatro fa velona ny Mpanavotra ahy ka hitsangana any am-parany eo ambonin’ny vovoka Izy.

²⁶Ary rehefa levona ny hoditro, izao simba izao, sady afaka amin’ny nofoko aho, dia hahita an’Andriamanitra;

²⁷eny, izaho no hahita Azy ary ny masoko no hijery fa tsy olon-kafa. Efa matim-paniriana ny saiko ato anatiko.

²⁸Raha hoy ianareo: Fomba ahoana no hanenjehantsika azy? Dia hohitantsika ao anatiny ny fototry ny mahameloka azy.

²⁹Dia matahora ny sabatra ianareo; fa ny fahatezerana dia heloka mendrika ny hovalian-tsabatra mba ho fantatrareo fa misy fitsarana.