Read La Bible en Malgache Joba 2 Bible Online

Joba 2 - La Bible en Malgache bible

Joba 2

¹Indray andro koa dia avy ireo zanak’Andriamanitra* hiseho teo anatrehan’NY TOMPO dia mba tonga teo koa i Satana* tafaharo taminy, mba hiseho teo anatrehan’NY TOMPO.

²Dia hoy NY TOMPO tamin’i Satana: Avy taiza ianao? Ary namaly NY TOMPO i Satana hoe: Avy nivezivezy teny ambonin’ny tany aho, nandehandeha teny.

³Dia hoy NY TOMPO tamin’i Satana: Efa nandinika an’i Joba mpanompoko va ianao? Fa tsy misy tahaka azy eny ambonin’ny tany, fa olona marina sy mahitsy izy sady matahotra an’Andriamanitra ka mifady ny ratsy. Ary mbola mitana mafy ny fahamarinany ihany izy na dia nanesika Ahy hamongotra azy tsy amin’antony aza ianao.

⁴Ary i Satana dia namaly NY TOMPO hoe: Hoditra fefin’ny hoditra! Eny, izay rehetra ananan’ny olona dia homeny ho fefin’ny ainy.

⁵Fa atsory ange ny tananao ka tendreo ny taolany sy ny nofony raha tsy handa Anao eo imasonao aza izy e!

⁶Dia hoy NY TOMPO tamin’i Satana: Indro, eo an-tananao izy; ny ainy tokana ihany no aza asiana!

⁷Dia niala teo anatrehan’NY TOMPO i Satana ka namely vay ratsy an’i Joba hatreo am-paladiany ka hatrany an-tampon-dohany.

⁸Dia naka tavim-bilany hihaorany izy sady nipetraka teo amin’ny lavenona.

⁹Ary hoy ny vadiny taminy: Mbola mitana ny fahamarinanao ihany va ianao? Mahafoiza an’Andriamanitra ianao, dia aoka ho faty!

¹⁰Fa hoy izy taminy: Tahaka ny tenin’ny vehivavy adala ny teninao! Moa ny soa ihany va no horaisintsika avy amin’Andriamanitra fa tsy ny ratsy koa? Tamin’izany rehetra izany dia tsy nanota tamin’ny molony i Joba.

¹¹Rehefa ren’ny sakaizan’i Joba telo lahy ny fahoriana rehetra izay nanjo azy dia samy niainga avy tany amin’ny fonenany avy izy, dia i Elifaza temanita, i Bildada sohita ary i Zofara namatita. Nifamotoana izy ireo mba handeha hitsapa alahelo sy hampionona azy.

¹²Ary nanopy ny masony teny lavidavitra teny izy telo lahy ka tsy nahafantatra azy, dia nanandratra ny feony ka nitomany; ary samy nandriatra ny akanjobeny avy koa izy rehetra dia nanipy vovoka ho amin’ny lanitra hiraraka amin’ny lohany.

¹³Ary niara-nipetraka teo aminy tamin’ny tany fito andro sy fito alina izy, nefa tsy nisy niteny taminy na dia indraimbava akory aza satria hitany fa mafy loatra ny fahoriany.