Read La Bible en Malgache Joba 20 Bible Online

Joba 20 - La Bible en Malgache bible

Joba 20

¹Dia nandray fitenenana i Zofara namatita hoe:

²Noho izany dia mamaly ahy ny eritreritro; eny, noho ny fihetsiketsehana ato anatiko.

³Reko lalandava ny anatra mampahamenatra ahy ary ny fanahiko dia mamaly ahy avy amin’ny fahalalako.

⁴Tsy fantatrao va fa hatry ny ela; eny, hatrizay nampitoerana ny olona tetỳ ambonin’ny tany

⁵dia vetivety foana ny firavoravoan’ny ratsy fanahy ary indray mipy maso monja ny fifalian’ny mpihatsaravelatsihy?

⁶Fa na dia mipaka amin’ny lanitra aza ny haavony ka mitehika amin’ny rahona ny lohany

⁷dia ho very mandrakizay toy ny dikiny ihany izy; ary izay nahafantatra azy dia hilaza hoe: Aiza izy?

⁸Manidina tahaka ny nofy izy ka tsy ho hita; eny, ampandosirina tahaka ny tsindrimandry amin’ny alina izy.

⁹Ny maso izay mijery dia indray mitopy ihany no ahitany azy ary tsy hahita azy intsony ny fonenany.

¹⁰Ny zanany no hamerin-trosa amin’ny malahelo ary ny tanany ihany no hampody ny harena nangoniny.

¹¹Ny taolany dia feno ny herin’ny fahatanorana, nefa hiara-mandry aminy ao amin’ny vovoka izany.

¹²Na dia mamy ao am-bavany aza ny ratsy ka afeniny ao ambanin’ny lelany,

¹³ary tsitsiny ka tsy foiny fa tehiriziny ao amin’ny lanilaniny ihany,

¹⁴dia hiova ao an-kibony ny haniny, ka aferon’ny menarana no ho ao anatiny.

¹⁵Harena no nateliny nefa haloany indray; loaran’Andriamanitra hiala ao an-kibony izany.

¹⁶Ny poizin’ny menarana no tsetsefiny; hahafaty azy ny lelan’ny menarana.

¹⁷Tsy ho faly mahita renirano izy, dia ony sy riaky ny tantely sy ronono.

¹⁸Tsy azony atelina izay nikelezany aina fa tsy maintsy hampodiny; na dia be aza ny hareny dia tsy ho araka izany ny hafaliany.

¹⁹Efa nampahory sy nahafoy ny reraka izy ka naka trano an-keriny fa tsy mba nanangana.

²⁰Tsy mahalala mionona ny kibony ka tsy mamela na inona na inona tsy ho azony amin’izay notsiriritiny.

²¹Tsy misy tsy tratry ny fitiavany harena tafahoatra ka tsy haharitra ny fiadanany.

²²Ho poriporitra izy na dia mihoa-pampana aza ny fananany; ny fahoriana no hamely azy amin’ny heriny rehetra.

²³Halefan’Andriamanitra hameno ny kibony ny fahatezerany mirehitra; eny, halatsany aminy toy ny ranonorana hatrany amin’ny tsinainy izany.

²⁴Raha mandositra ny vy fiadiana izy dia hahavoa azy miboroaka ny tsipìka varahina;

²⁵tsoahany izany ka mivoaka avy amin’ny tenany; eny, ny manelatselatra dia mivoaka avy amin’ny atiny; tamy manatona azy ny fahatahorana mafy.

²⁶Ny haizim-pito rehetra no voatahiry ho an’ny rakitra soa sarobidiny; afo tsy nisy nandrehitra no handoro azy sady handevona izay sisa ao amin’ny tranolainy.

²⁷Hambaran’ny lanitra ny helony ary hitsangana hiampanga azy ny tany,

²⁸ho voapaoka ny harena tafiditra ao an-tranony; eny, ho levona izany amin’ny andron’ny fahatezeran’Andriamanitra.

²⁹Izany no anjaran’ny ratsy fanahy avy amin’Andriamanitra sy lova voatendrin’Andriamanitra ho azy!